Meda Dau Tu Vakarau ni Veisureti ena Vuli iVolatabu
1. Na cava e wili ena noda vakayacora na itavi a lesia o Jisu ena Maciu 28:19, 20?
1 A lesia vei keda o Jisu na itavi meda ‘veivakavulici, meda veivakatisaipelitaki.’ (Maciu 28:19, 20) Koya gona, meda tu vakarau e veigauna meda veisureti ena vulici ni iVolatabu, sega ni muanimacawa ga sa tuvanaki oti tu. Ena rairai yaga na vakatutu qo.
2. O cei meda sureta ena vulici ni iVolatabu?
2 Veisureti: Nida vakamatauna meda veisureti ena vulici ni iVolatabu, ena rawarawa tale ga noda kunea e dua e via vuli. (Dauv. 11:6) O bau saga mo veisureti sara ga vakadodonu? E dua na ivavakoso mai Merika era saga vagumatua mera cakava qori ena dua na vula taucoko. Dua na ka nodra marau ni tekivu kina e 42 na vuli iVolatabu vou! Meda kua ni nanuma nira sa kila tiko na tataleitaki eda sikova nida via vakavulici ira ena iVolatabu. Ena noda veisiko tarava, vakacava meda sureti ira mera vulica na iVolatabu? E sega ni dua na kena leqa ke ra sega ni vakadonuya, ia eda rawa ni vakabulabulataka tiko ga na tataleitaki sa tiko rawa. Eda sa bau tarogi ira eda tiko veitikivi, ira na wekada, o ira eda cakacaka vata, kei ira eda vuli vata ke ra via vulica na iVolatabu? Eda rawa ni tarogi ira tale ga na noda vuli iVolatabu ke tiko eso na nodra itokani se na wekadra era na taleitaka mera vuli.
3. Na ivukevuke yaga cava me tekivutaki kina na vuli iVolatabu? Eda rawa ni vakayagataka ena gauna cava?
3 iVukevuke Yaga: E yaga vakalevu ena tekivutaki ni vuli iVolatabu na tikidua, O Via Kila na Ka Dina? Eda rawa ni solia qo vei taukeinivale ke ciqoma na ivola tale eso se sega. E rawa ni vakayagataki nida vunau ena yalava ni bisinisi, e salatu, nida volavola, se nida veisikovi lesu. Eda rawa ni biuta tale ga ena vale e lala. Ena vinaka meda kauta tiko nida vodo basi se so tale na sala ni veilakoyaki, nida lai volivoli se cakacaka. E vakamacalataki vakalekaleka ena tabana emuri na ituvatuva ni noda vuli iVolatabu kei na ivola Kaya na iVolatabu.
4. Eda na vakayagataka vakacava na tikidua Kila na Ka Dina me tekivu kina na vuli iVolatabu?
4 Ni o solia na tikidua vua drau veivosaki, dusia vua na taro ena imatai ni tabana qai taroga, “Na taro cava o dau lomatarotarotaka tu?” Drau raica vata na kena isau ena tikidua, qai wilika se vakamacalataka na ituvatuva ni vuli iVolatabu ena tabana emuri. Oti, vakaraitaka vua na ulutaga ena ivola Kaya na iVolatabu e tiko kina eso tale na kena ivakamacala, solia na ivola, qai tuvanaka na siga mo lesuvi koya kina me tomani nomudrau veivosaki.
5. Na cava meda dau tu vakarau kina ni veisureti ena vulici ni iVolatabu?
5 Era se tiko ena noda yalava o ira era via kila se cava sara mada e kaya na iVolatabu. Nida dau tu vakarau meda veisureti ena vulici ni iVolatabu, eda na marau vakalevu nida vukei ira eso tale mera muria na sala e basika ina bula.—Maciu 7:13, 14.