Au sa Vakaitavi Tiko Vakalevu?

1. Na cava ena yalolailai kina e dua na lotu vaKarisito yalodina?

¹ O a bau taroga na taro ya? De dua o sa sega ni vakaitavi vakalevu ena cakacaka vakaitalatala ena gauna qo baleta nomu bula vaqase, tautauvimate, se na levu ni nomu icolacola ena vuvale, e vakavuna mo yalolailai. E kaya e dua na tacida yalewa e tolu na luvena, ni so na gauna e yalolailai ni vakayagataka e levu na gauna kei na kaukaua me qarava kina nona vuvale, e lailai ga na ka e rawa ni cakava ena cakacaka vakaitalatala. Na cava ena vukei keda me veiraurau noda rai?

2. Na cava e namaka vei keda o Jiova?

² Na Ka e Namaka Vei Keda o Jiova: E macala ni o keda kece eda na rairai via vakalevutaka noda cakacaka vakaitalatala. Ia e tiko na duidui levu ena ka eda via cakava kei na ka e rawa nida cakava. Na noda via vakalevutaka noda cakacaka e vakaraitaka nida sega ni lomavakacegu. Ia meda nanuma ni o Jiova e kila vinaka ni vakaiyalayala na ka eda rawa ni cakava, e sega gona ni namaka vakasivia meda cakava na ka eda sega ni rawata. (Same 103:​13, 14) Na cava e namaka vei keda? Meda qaravi koya mai vu ni lomada ena kena e vinaka duadua.​​—⁠Kolo. 3:​23.

3. Eda na kila vakacava na ka eda rawa ni cakava ena cakacaka vakaitalatala?

³ Na cava ena vukei keda meda kila kina na ka eda rawa ni cakava? Meda kerea na veivuke i Jiova me rawa nida kila na keda ituvaki dina. (Same 26:⁠2) Ena rawa ni veivuke tale ga e dua na noda itokani matua lotu vaKarisito e kilai keda vinaka, ena rawa ni vosa tale ga vakadodonu ke gadrevi eso na ka meda cakacaka kina. (Vkai. 27:⁠9) Koya gona, meda nanuma ni yaga meda dau vakalewa tale na keda ituvaki ke sa veisau.​​—⁠Efeso 5:​10.

4. Meda raica vakacava na noda dau vakadreti vakaivolatabu me baleta na cakacaka vakaitalatala?

⁴ Noda Rai me Baleta na Veivakadreti: Ena gauna ni veitaucici, o ira na sarasara era na sega ni veivakayalolailaitaki ia era na veivakauqeti mera yacova kina na nodra isausau o ira na cici. E vakatale ga kina na veivakayaloqaqataki kei na veivakadreti vakaivolatabu eda rogoca ena soqoni, kei na noda ivola meda ‘kua tale ni lokuyara ni vunautaka na vosa’ e yaga vei keda, sega ni kena ibalebale ni tawayaga na noda sasaga. (2 Tim. 4:⁠2) Nida saga meda cakava ena noda vinaka kece, eda nuidei ni na sega ni guilecava o Jiova na noda ‘cakacaka kei na noda kauai dina.’​​—⁠Iper. 6:​10.