Toro Voleka Vei Jiova

1. Na cava eda na vulica tale kina na ivola Toro Voleka Vei Jiova?

¹ Eda a vulica na ivola Toro Voleka Vei Jiova ena Maji 2004. A vukei ira e levu na vuli qo mera ciqoma sara ga na veisureti: “Toro voleka yani vua na Kalou ena qai toro voleka mai vei kemuni.” (Jeme. 4:⁠8) Ia me tekivu mai na gauna oya era sa papitaiso e Viti e sivia nira le 700, qai levu na ka vou era sa lako mai na isoqosoqo i Jiova. Eda na vulica tale na ivola qo me vukei keda kece meda vakatitobutaka na noda veiwekani kei koya.

2. Na cava meda cakava me yaga kina vei keda na noda vulica na ivola qo?

² Eda na tekivu vulica ena Vuli iVolatabu ni iVavakoso ena Maji na ivola Toro Voleka Vei Jiova. Na cava meda cakava me yaga kina vei keda na ka e vulici? E bibi na vakavakarau. Ena tuvanaki e vica ga na parakaravu me vulici e veimacawa. Qo ena rawa kina ni levu na gauna o na vakamacalataka mai vu ni lomamu na veika o vulica ena nomu vakavakarau, qai vakasamataka tale ga vakatitobu. Kuria qori, ena lailai ga na parakaravu ena vulici ena macawa ena railesuvi kina e dua na wase, me rawa ni veivosakitaki kina na kato.

3. Ena vakayagataki vakacava na kato “Taro me Vakananumi”?

³ Tekivu ena wase 2 sa tiko kina na kato e kena ulutaga “Taro me Vakananumi,” e koto ena icavacava kece ni wase. Ni sa veivosakitaki oti na iotioti ni parakaravu ni dua na wase, me qai veivosakitaki na kato. Qo ena levu kina na gauna vei ira eso tale mera vakamacala ena tikinivolatabu era sa dikeva oti mai. (Vkai. 20:⁠5) Me ikuri ni taro sa tiko ena kato, so na gauna ena taroga na tacida e taura na vuli: “Na cava o vulica me baleti Jiova ena itukutuku qo? E tara vakacava nomu bula? Ena yaga vakacava qo mo vukei ira kina eso tale?” Me nona isausau o koya e taura na vuli me uqeti ira mera vakamacala mai vu ni lomadra, me kua ni nona inaki me veitarotarogitaka na veitikina e sega soti ni bibi.

4. Ena yaga vakacava vei iko na vuli qo?

⁴ Na ivola Toro Voleka Vei Jiova e duatani vei ira na ivola tale eso. E vakacaucautaki o Jiova ena ivola kece e tabaka “na dauveiqaravi e yalodina e vuku,” ia na ivola qo e veivosakitaki vakatabakidua kina na nona itovo talei. (Maciu 24:45-47) Meda vakanamata gona ina gauna eda sa na vulica kina! Ena yaga vakalevu vei keda na noda vulica vakatitobu na itovo i Jiova. Me vukei keda mada ga na vuli qo meda toro voleka yani vua na Tamada vakalomalagi, me rawa tale ga nida vukei ira tale eso mera cakava vaka kina.