Vakadamurimuria Nodra Vakabauta

1. Na cava eda na vulica ena Vuli iVolatabu ni iVavakoso ena macawa ni Okotova 19?

¹ Ena macawa ni Okotova 19, 2015 eda na vulica na ivola Vakadamurimuria Nodra Vakabauta ena Vuli iVolatabu ni iVavakoso. Na ivola qo e vakamacalataki ira na 14 na tagane kei na yalewa era vakabauta. E vukei keda na ivola qo meda raitayaloyalotaki ira na dauveiqaravi qori, eda na raici ira nira bula dina nira sotava na ituvaki dredre ena nodra qaravi Jiova. E vakamacalataki tale ga kina na lesoni e rawa ni yaga vei keda nikua.—Iper. 6:12.

2. Vakamacalataka eso na lewenivola na Vakadamurimuria Nodra Vakabauta.

² Lewenivola: E tiko ena ivola qo na ituvatuva ni gauna kei na mape meda kila kina na vanua kei na gauna era bula kina. Kena ikuri, na wase yadua e tiko kina na ulutaga, “Vakasamataka mada . . . ,” ena vukei keda meda vakasamataka vakatitobu na kedra italanoa da qai bulataka na ka eda vulica kina. E vutuniyau na ivola qo ena levu ni droini e rokataki, e matata, qai dikevi vinaka, ena rawarawa kina noda raitayaloyalotaka.

3. Na cava meda cakava me yaga kina vei keda na ivola qo?

³ E Yaga Vakacava Vei Keda: E uqeti keda dina na ivola mai na iLawalawa Dauvakatulewa: “Raitayaloyalotaka na ka o wilika, mo vakila sara ga. Biuti iko ena kedra ituvaki, mo raica sara ga na ka era raica. Vakatauvatana na veika era cakava ena dua na ituvaki kei na ka o na rairai cakava ena ituvaki ya.” Noda vakasamataka e sega ni kena ibalebale meda vakilakila, ia meda raitayaloyalotaka na ka e tukuni ena iVolatabu kei ira era talanoataki tiko. Ke da via cakava qo ena vinakati na gauna kei na vakasama vakatitobu. (Niem. 8:8) Ke tekivu na vuli ena loma ni dua na wase, ena railesuva o koya e taura tiko na vuli ena loma ni 30- ina 60-na sekodi na ka sa vulici oti. Ni sa oti na vuli, e rawa ni tarogi e dua se rua na taro ni railesuvi ke sega ni tiko na ulutaga “Vakasamataka Mada . . . ”

4. Na cava meda vulica kina na ivola Vakadamurimuria Nodra Vakabauta?

⁴ Na vuravura qo e saga e veisiga me vakamalumalumutaka noda vakabauta. Na ivola na Vakadamurimuria Nodra Vakabauta kei na Vale ni Vakatawa e yavutaki kina na ulutaga qo, e nona iloloma o Jiova me vaqaqacotaka kina noda vakabauta. (Jeme. 1:17) Meda vakayagataka vinaka mada ga noda tiko ena Vuli iVolatabu ni iVavakoso e veimacawa, da qai vakaitavi vakalevu nida vulica tiko na ivola qo!