Ka me Nanumi ena Soqo ni Veiwasewase
Porokaramu ni Soqo: Ena dola na vanua ni soqo ena 8 ena mataka. Ena tekivu na ivakatagi ena 9:20 ena siga tolutolu qori. E dodonu meda sa dabe kece ena gauna qori me rawa ni tekivu vinaka na porokaramu. Na porokaramu ena cava tiko ena 4:55 ena yakavi ni Vakaraubuka kei na Vakarauwai, ia ena Sigatabu ena cava ena 3:45.
‘Vakacaucautaki Jiova ena Sere’: Era dau vakacaucautaki Jiova ena sere na dauveiqaravi ni Kalou ena gauna makawa, se tiki bibi tale tiko ga ni sokalou dina ena gauna qo na ivakatagi. (Same 28:7) E dau tekivutaki na noda soqo ni veiwasewase ena ivakatagi. Qo e sega ni vakatagi wale ga, e vakarautaki me rawa nida kila qai sokaloutaki Jiova. Ni kacivaka o Jeameni ni sa vakarau tekivu na ivakatagi, qori na gauna meda dabe da qai rogoca vinaka sara na ivakatagi. Nida cakava qori, eda vakaraitaka nida raica vakabibi na nodra sasaga na lewe ni matasere ni Watchtower orchestra. E veiyabaki era dau gole vakarua e Patterson mai Niu Yoka na tacida qori nira sauma ga na nodra ivodovodo mera vakarautaka kina na ivakatagi totoka meda marautaka ena gauna qo. Nida sa rogoca vinaka na ivakatagi, meda duavata mada ga nida vakacaucautaki Jiova ena lagati ni noda Sere ni Matanitu.
Vakele Motoka: Ena vanua kece e vakayacori kina na soqo ni veiwasewase, e tiko na vanua e vakarautaki ni vakele motoka. Vei ira e levu nodra motoka, ke rawa moni kauta ga yani e dua. O ira na vakaleqai na ituvaki ni yagodra e vakarautaki na vanua me vakelei kina nodra motoka.
iDabedabe: Ni dola na vanua ni soqo ena veimataka, eda kerei meda kua ni vakusakusa ena vanua eda taleitaka meda dabe kina me vaka eda veisisivi kei ira na tacida. Na yalo ni vakuai keda ena uqeti keda meda nanumi ira eso tale e vakaraitaka nida lotu vaKarisito dina, ena uqeti ira tale ga eso tale mera vakalagilagia na Kalou. (Joni 13:34, 35; 1 Kor. 13:5; 1 Pita 2:12) Me maroroi ga na idabedabe me baleti ira eda vodo vata mai na motoka, noda vuvale se ira noda vuli iVolatabu. Kerei me kua ni biu na iyaya ena idabedabe o na sega ni vakayagataka. Nomuni veitokoni ena tikina qo ena rawa kina vei ira eso tale mera vakayagataka na idabedabe qori. Sa vakarautaki tale ga na nodra idabedabe na itabaqase kei ira na malumalumu. E sega ni levu na vanua e vakarautaki, ena vinaka me dua ga se rua e veivuke me rau dabe vata kei na itabaqase se malumalumu.
Rakorako Noda iSulusulu: Noda isulusulu ena gauna ni soqo me veiganiti qai rakorako, me kua ni vakaraitaka na isulusulu e takalevu e vuravura. (1 Tim. 2:9) Meda qarauna me kua ni yakusurasura na keda irairai nida lako se biubiu mai na otela, ni bera se oti na soqo. Eda marautaka gona meda dara noda ivakatakilakila ni soqo, meda kua kina ni madua na vunau ena gauna veiganiti. Na keda irairai kei na noda itovo vinaka ena soqo ni veiwasewase sa roro tiko mai qo ena uqeti ira na yalomalumalumu mera rogoca na itukutuku veivakabulai ni iVolatabu, ena vakamarautaki Jiova tale ga.—Sefa. 3:17.
Veinanumi Nida Vakayagataka na iYaya Vakalivaliva: Eda vakaraitaka na itovo vinaka ena gauna ni soqo nida veisautaka na rorogo ni noda iyaya vakalivaliva me kua ni veivakasosani. Ke da veitaba, katokatoni ena vidio, na tablet, se so tale, meda veinanumi nida sega ni vakasosani ira eso tale se vakaosooso e matadra. Eda na sega tale ga ni vakau itukutuku ena talevoni se kompiuta ena gauna e vakacagau tiko kina na soqo.
Vakasigalevu: Yalovinaka kauta ga mai na kemu, kua ni biuta na vanua ni soqo mo lai vaqara kemu ivakasigalevu. Ena vinaka me vakayagataki na katoniwaililiwa lailai e rawa ni biu toka ga ena ruku ni dabedabe. E sega ni vakatarai ena vanua ni soqo na bola ni kakana lelevu e dau vakayagataki ena vakatakakana, na bilo se itawatawa ni kakana lase se iloilo.
Cau: Eda rawa ni vakaraitaka noda vakavinavinaka ena noda cau me baleta na cakacaka e vuravura raraba nida tiko ena soqo ni veiwasewase. Ke vakayagataki na jeke mo cau ena soqo qo, me qai volai kina na “Jehovah’s Witnesses of Fiji.” E rawa ni vakayagataki tale ga na credit se debit card.
O ira na vakayagataka na icula me baleta na mate ni suka e dodonu me maroroi vinaka, me kua ni biu ena kava ni benu ena vanua ni soqo se otela ni rawa ni veivakaleqai.
Vakacalaka: Yalovinaka me qarauni na mavoa e rawa ni yaco ni o lutu se tarabe. Na ivava e dau vakavuna vakalevu na vakacalaka ena veiyabaki, vakabibi na ivava titeqe. Ena vinaka meda dara na ivava e rakorako qai matau me rawarawa noda lako ena kabakaba kei na vanua tale eso ena vanua ni soqo.
Qiqinigone kei na iDabedabe: Me kua ni kau mai ena vanua ni soqo na qiqinigone kei na idabedabe e dau vakayagataki e tautuba. E vakatarai ga na idabedabe ni gone se na safety seat me tiko volekata ga na idabedabe nei tubutubu.
Kaloni: Eso na soqo ni veiwasewase e vakayacori ena loma ni vale ni sarasara e vakayagataki ga kina na cagi vakalivaliva. E ka vakayalololoma ke da vakayagataka ga vakarauta na kaloni de na qai vakaleqai ira eso na kaukaua ni kena iboi.—1 Kor. 10:24.
Fomu ni Kerekere me Lai Sikovi (S-43): Me vakayagataki na fomu qori me vakaleweni kina na kena itukutuku na tataleitaki eda vunau tawalokuci vua ena soqo ni veiwasewase. Ni sa vakaleweni oti me qai soli ena Tabana ni iVola se soli vua na vunivola ni ivavakoso o lewena.
Valenikana: Me vakarokorokotaki na yaca i Jiova ena noda itovo nida tiko ena valenikana. Nomu isulusulu me vakaraitaka ni o dua na italatala vaKarisito.
Otela:
Yalovinaka kua ni kerea me maroroi tiko e vica vata na rumu o qai sega ni vakayagataka, me kua tale ga ni levu era tiko ena nomu rumu ke sega ni vakatarai qori.
Meda kua ni vakadaroya na vakarautaki ni rumu, vakavo ga ke dua na leqa tawanamaki, me vakaraitaki vakatotolo ena otela me rawa ni soli vei ira era vinakata mera vakayagataka na rumu. (Maciu 5:37) Ke o vakadarodaro, vakadeitaka me tiko vei iko na kena naba. Ena sega ni vakasukai vei iko na ilavo ni ivakadei ke o vakadarodaro ni oti e 48 na aua.
Nanuma tiko ni o vakayagataka na debit se credit card ni o curu ena otela, e kena ivakarau mera taura tu vakawawa na ilavo ena nomu card me saumi kece kina na isau ni rumu, ni vakacacani e dua na ka se yaco na leqa ena gauna kece o tiko kina. Ena sega ni rawa ni o vakayagataka e dua na ilavo qori me yacova ni sa saumi oti kece nomu bili ni oti e vica na siga nomu biubiu.
Mo kauta ga na qiqi e dau vakavodoki kina na kato se iyaya ena gauna o sa via vakayagataka kina, vakasuka vakatotolo me rawa nira vakayagataka eso tale.
Ke ivakarau ena nomu vanua, solia e dua na ilavo ni vakavinavinaka vei ira na veiqaravi ena otela era kauta na nomu kato se iyaya, se o ira na samaka nomu rumu.
Vakasaqa ga ena rumu ke vakatarai kina.
Me kua ni vakayagataki vakaveitalia na kakana, kofi, se ice e vakarautaki me baleti ira na tiko ena otela.
Me vakaraitaki ena veigauna kece na itovo e umani ena vua ni yalo tabu nida veivosaki kei ira na veiqaravi ena otela. Nira qaravi ira e levu, era na marautaka noda yalovinaka, vosovoso, kei na noda yalorawarawa.
Mera qarauni luvedra na itubutubu ena veigauna kece nira tiko ena otela, wili kina na vanua ni sisili, na liva, vanua ni vakacegu, vanua ni vakaukaua yago kei na veivanua tale eso.
Bole Cakacaka: Ke dua e via bole cakacaka, me vakaraitaka ina Tabana ni Bole Cakacaka ena vanua ni soqo. O ira na yabaki 16 e rawa nira veivuke tale ga nira muria na veidusimaki ni itubutubu se dua e qase cake e vakadonuya na itubutubu.