Vukei Luvemu me Vakacaucautaki Jiova
1. Na ivakaraitaki cava me baleti ira na gone era vakacaucautaki Jiova e tu ena iVolatabu?
1 Na Same 148:12, 13 e uqeti ira na gone mera ‘vakacaucautaka na yaca i Jiova.’ E tu ena iVolatabu na nodra ivakaraitaki e levu na gone era cakava qori. Ke o itubutubu, o na vukei luvemu vakacava me vakacaucautaki Jiova?
2. Na cava e bibi kina mo ivakaraitaki vinaka vei luvemu?
2 iVakaraitaki: Era vakaroti na tama e Isireli me liu mada na nodra lomani Jiova qai dei e lomadra na nona ivakaro, ni bera nira tugana na ka dina e lomai luvedra. (Vkru. 6:5-9) Ke o dau talanoataka na vinaka ni cakacaka vakaitalatala o qai vakaitavi kina e veimacawa, ena raica tale ga o luvemu ni cakacaka qori e bibi qai marautaki.
3. Na cava e okati ena nomu vakavulici luvemu tiko ga?
3 Veivakavulici Tiko ga: Me vakaitavi tale ga o luvemu ena cakacaka vakaitalatala. E rawa ni solia e dua na tikidua se wilika e dua na tikinivolatabu. Qori ena marautaka kina na cakacaka vakavunau, ena doudou tale ga ni vunautaka na itukutuku ni Matanitu ni Kalou. Ni sa qase cake, e dodonu me sa levu cake tale ga na ka e cakava ni lako ena cakacaka vakaitalatala. Vukei luvemu me toso vakayalo, me vakasamataka tale ga eso nona isausau vakayalo.
4. Na cava e gadrevi me dua kina na dautukutuku bera ni papitaiso o luvemu?
4 Ke o kila ni sa rawata o luvemu na ivakatagedegede me dua na dautukutuku bera ni papitaiso, sa vakaraitaka tale ga ni vinakata me cakava qori, lai raici ratou sara na qase ni ivavakoso. Ni sa dua na dautukutuku, ena raica vakabibi na nona itavi me vakacaucautaki Jiova. Nanuma tiko ni sega ni gadrevi me tautauvata sara na ka e kila o luvemu kei na ka era kila o ira sa papitaiso, me qai rawata na ivakatagedegede ni dautukutuku. Sa kila tiko o luvemu na yavu ni ivakavuvuli ena iVolatabu? E muria tiko na ivakatagedegede savasava ena iVolatabu? E via vakaitavi ena cakacaka vakaitalatala, me kilai tale ga ni iVakadinadina i Jiova? Ke vaka kina, era rawa ni vakatulewataka na qase ni sa rawata na ivakatagedegede me dua na dautukutuku bera ni papitaiso.—Raica na ivola iSoqosoqo e Cakava na Lomai Jiova, t. 79-82.
5. Na cava na yaga ni nomu vakavulici luvemu?
5 E gadrevi na sasaga mo rawa ni vukei luvemu me vakacaucautaki Jiova mai vu ni lomana. Ia na nona toso vakayalo ena vakamarautaki iko vakalevu. E bibi sara ni marau o Jiova nira tukuna na gone na nona cakacaka veivakurabuitaki.