Meda Lomavakacegu ena Ka sa Tu Vei Keda
1 E tukuna na iVolatabu me qaravi na veika vakayago me baleta na vuvale, ia me kua ga ni vakaliuci. E bibi duadua na veika vakayalo. (Maciu 6:33; 1 Tim. 5:8) Noda veiraurautaka na ka eda cakava ena “veigauna dredre” qo e ka ni sasaga toka. (2 Tim. 3:1, VV) Eda na cakava rawa gona vakacava?
2 Muria na iVakasala Vakaivolatabu: E veivakasalataki na iVolatabu nida na vakaleqai vakayalo ke da via vutuniyau. (Dauv. 5:10; Maciu 13:22; 1 Tim. 6:9, 10) Ena gauna bibi eda donuya tu qo, ena veivakaleqai dina noda vakaogai keda vakasivia ena cakacaka saumi se na ka vakailavo, me sa ikarua ni ka ena noda bula na veika vakayalo—na soqoni, vuli vakataki keda, kei na cakacaka vakavunau. (Luke 21:34-36) Qori e veibasai kei na ka e tukuna na iVolatabu: “Ia kevaka sa tu vei keda na kakana kei nai sulu, me da lomavinaka [“lomavakacegu,” NW] kina.”—1 Tim. 6:7, 8.
3 Sega ni tukuni tiko e keri meda vakadravudravuataki keda. E dusia tiko ga na veika eda gadreva dina vakayago—na kakana, isulu, kei na vale veiganiti meda tiko kina. Ke sa tiko rawa qori, meda lomavakacegu. Ke da vakasamataka meda volia e dua na iyaya se qara e dua tale na cakacaka, e vinaka meda taroga, ‘E gadrevi dina qo?’ Nida cakava ya, eda sa muria kina na ivakasala: “Mo dou kakua ni daukocova nai lavo: ia dou lomavinaka [“lomavakacegu,” NW] e na ka sa tu vei kemudou.”—Iper. 13:5.
4 Ena vakalougatataki keda o Jiova ke da nuitaki koya. (Vkai. 3:5, 6) Sa macala nida na cakacaka vakaukaua meda bula rawa kina, ia meda kua ga ni vakaliuca. Eda nuitaki Jiova me solia vei keda na ka eda gadreva, se mani lailai se levu na ka e tu vei keda. (Fpai. 4:11-13) Io, ena vakacegui keda na Kalou, ena vakalougatataki keda tale ga.
5 E yalataki ena iVolatabu nira na vakalougatataki vakalevu ena gauna qo vaka kina ena gauna se bera mai, o ira era vakaliuca nodra qaravi Jiova, ra sega ni via vutuniyau.—1 Tim. 4:8.