iTovo Bibi Duadua ni Qasenivuli Vinaka
1. Na cava e bibi duadua me rawa ni qasenivuli vinaka e dua?
1 Na cava e bibi duadua me rawa ni qasenivuli vinaka e dua ena iVolatabu? Me vuli vinaka? Levu na ka e kila? Nona taledi? Sega, me tiko vua na itovo e uto ni Lawa kece era kilai kina na tisaipeli i Jisu, qai itovo uasivi duadua e kilai kina o Jiova. (Joni 13:35; Kala. 5:14; 1 Joni 4:8) Na itovo qori na loloma. O ira na qasenivuli vinaka era dauloloma.
2. Na cava e bibi kina meda dauloloma?
2 Dauloloma: Na nona dauloloma na Qasenivuli Levu o Jisu e uqeti ira na lewenivanua mera rogoci koya. (Luke 5:12, 13; Joni 13:1; 15:13) Ke da dau veikauaitaki, eda na vunau ena gauna kece. Ena sega ni vakayalolailaitaki keda na veitusaqati kei na nodra sega ni kauai eso. Eda na veikauaitaki nida vunau da qai veiveisautaka na iwalewale ni noda vunau me ganita na ka era kauai kina na itaukeinivale. Eda na sega wale ga ni caka vuli iVolatabu, ia eda na vakavakarau vinaka tale ga ena gauna kece ni vuli.
3. Ena yaga vakacava ena cakacaka vakaitalatala na noda taleitaka na ka dina ena iVolatabu?
3 Taleitaka na ka Dina: A taleitaka tale ga o Jisu na ka dina ena iVolatabu qai okata me iyau talei. (Maciu 13:52) Ke da taleitaka na ka dina, ena gu na lomada meda tukuna vei ira eso tale, qori ena uqeti ira mera taleitaka tale ga. Na noda taleitaka na ka dina ena uqeti keda meda kauaitaka ga na itukutuku bibi eda vunautaka, sega ni veika eda lekata ena cakacaka vakaitalatala. Eda na doudou kina na vunau.
4. Eda na bucina vakacava na loloma?
4 Bucina na Loloma: Eda na bucina vakacava na loloma? Meda dau vakasamataka na loloma erau vakaraitaka o Jiova kei na Luvena, kei na vakaloloma ni kedra ituvaki vakayalo na tu ena yalava. (Mari. 6:34; 1 Joni 4:10, 11) Ena titobu na noda taleitaka na ka dina ke da dau vuli vakataki keda da qai vakananuma na ka eda vulica. Na loloma e dua na itovo e umani ena vua ni yalo tabu. (Kala. 5:22) Eda rawa gona ni masuta na yalo tabu i Jiova da qai kerei koya me vukei keda meda vakalevutaka na noda loloma. (Luke 11:13; 1 Joni 5:14) Se mani vakacava na ivakatagedegede ni noda vuli, levu ni ka vakayalo eda kila se na noda taledi, ena laulau na noda veivakavulici ena iVolatabu ke da dauloloma.