Rua na iLavo Lailai Sara

Dua na sala eda tokona kina na cakacaka ni Matanitu ni Kalou, oya na noda cau vakailavo ena cakacaka vakavunau e vuravura raraba. Vakacava ke sega ni levu na noda ilavo?

Ena dua na gauna, a raica o Jisu e dua na yada dravudravua e cautaka e rua na ilavo lailai sara ena kato ni cau ena valenisoro. Nona lomani Jiova na yada qo a uqeti koya me solia na “qavuna e toka vua, na ka sara ga me bula kina.” (Mari. 12:41-44) A kauaitaka o Jisu na ka e cakava, a tukuna kina ni nona cau e talei sara vua na Kalou. O ira tale ga na lotu vaKarisito ena imatai ni senitiuri era sega ni raica me nodra itavi ga na lotu vaKarisito vutuniyau mera cau vakailavo. A cavuta na yapositolo o Paula na kedra ivakaraitaki o ira mai Masitonia, dina nira “dravudravua sara . . . era [kerea tiko ga] . . . mera bau vakaitavi ena soli ka.”—2 Kor. 8:1-4.

Koya gona, ke da mani solia mada ga ‘e rua na ilavo lailai sara,’ meda nanuma tiko ni ilavo lalai qori era biu vata kei na so tale na ilavo lalai me dua kina na ilavo levu. Nida solika mai vu ni lomada ena vakamarautaki koya na Tamada vakalomalagi daulomasoli, ni ‘taleitaki koya e solia na ka ena marau.’—2 Kor. 9:7.