Marau na Daulomasoli

NI DUA na ivakatawa lotu Vakarisito dau loloma na yapositolo o Paula, e dau kauaitaki ira vakalevu qai via vukei ira na nona itokani vakabauta. (2 Korinica 11:28) O koya gona ena veiyabaki ni 50 S.K. ena imatai ni senitiuri, e tuvanaka kina e dua na kumuni lavo me baleti ira na kai Jutia lotu Vakarisito era gadreva na veivuke. E vakayagataka na gauna oqo me vakavulica kina e dua na lesoni e baleta na lomasoli. E vakabibitaka o Paula ni vinakata o Jiova na lomasoli: “Me ra dui solia me vaka na ka sa vinakata ko koya yadua e na yalona; me kakua e na voraki, se ni sa vakasaurarataki: ia ko koya sa solia e na marau sa vinakata na Kalou.”​—2 Korinica 9:7.

Era Dravudravua ia Era Daulomasoli

E levu na lotu Vakarisito ena imatai ni senitiuri era sega ni kilai levu vei ira na lewenivanua. E kaya o Paula ni “sa sega ni lewe vuqa era sa kaukauwa.” Era vaka na “veika sa malumalumu e vuravura,” era “veika vakaisi e vuravura.” (1 Korinica 1:​26-28) Me kena ivakaraitaki, o ira na lotu Vakarisito era vakaitikotiko e Masitonia e “ka tani na nodra dravudravua” kei na “rarawa.” Ia era kerea ga na kai Masitonia yalomalumalumu oqo mera vukei vakailavo o “ira era sa lotu.” E qai kaya o Paula me baleta na veika era solia nira “sa uasivi cake e na ka era rawata”!​—2 Korinica 8:​1-4.

Io, na nona lomasoli e dua e sega ni vakatau ena levu ni ka e solia. Ia e bibi ga na yalo e solia kina. E kaya vei ira na lotu Vakarisito e Korinica o Paula ni vauci tale ga ena lomasoli na ivakarau ni noda vakasama kei na lomada. E kaya: “Ni’u sa kila na nomudou gumatua, ka’u a vakacaucautaki kemudou kina vei ira na kai Masitonia, . . . a sa vakatakatataki ira na lewe vuqa na nomudou lomakatakata.” Era ‘vinakata yadua ena yalodra’ mera solika.​—2 Korinica 9:​2, 7.

‘E Marau Kina na Lomadra’

E rairai nanuma tiko o Paula e dua na ivakaraitaki makawa ni lomasoli ena vanualiwa ena 15 na senitiuri sa oti ni se bera nona gauna. Sa ra sereki mai ena veivakabobulataki mai Ijipita na 12 na yavusa e Isireli. Era sa mai tiko ena ruku ni ulunivanua o Saineai, sa qai vakaroti ira o Jiova mera tara e dua na valeniveitavaki ra qai biuta e loma na iyaya ni sokalou. Era sureti kece na lewenivanua mera cau ia ena gadrevi kina e levu sara na iyau.

Na cava era cakava na Isireli ena veisureti oya? “A ra sa tale mai ko koya yadua sa uqeti koya na lomana, kei koya yadua sa marau kina na lomana, era sa kauta mai nai solisoli vei Jiova me caka kina na cakacaka ni vale ni veitavaki.” (Lako Yani 35:21) Era lomasoli dina beka na lewenivanua? E vaka kina! Na veika oqo a qai tukuni vei Mosese: “Era sa kauta mai ko ira na tamata na ka sa rauta na cakacaka sa vakarota ko Jiova me caka, ka sa vo vakalevu.”​—Lako Yani 36:5.

E vakacava tu mada na kedra ituvaki vakailavo na Isireli ena gauna oya? Ena vica na yabaki sa oti, era a bobula vakaloloma tu, era ‘vakasaurarataki ena itavi bibi,’ era sotava na ‘bula rarawa,’ na bula “mosimosi.” (Lako Yani 1:​11, 14; 3:​7, NW; 5:​10-18) E macala ga nira sega ni taukena e levu na ka. E dina, era kauta mai na Isireli na sipi kei na bulumakau nira biuta mai na vanua era vakabobulataki tu kina. (Lako Yani 12:32) Ia e sega ni levu sara, baleta nira biubiu ga mai Ijipita, sa ra kudruvaka tale ni sa sega na lewenimanumanu kei na madrai mera kania.​—Lako Yani 16:3.

Era kauta gona mai vei na iyau dredre era cautaka me tara kina na valeniveitavaki? Era kauta mai vei ira na nodra iliuliu makawa, o ira na kai Ijipita. E kaya na iVolatabu: “Ia na Isireli . . . a ra sa kerea maivei ira na kai Ijipita nai ukuuku siliva, kei nai ukuuku koula, kei nai sulu . . . a ra sa solia kina vei ira na ka era sa kerea.” Na nodra lomasoli na kai Ijipita e ivakaraitaki ni veivakalougatataki mai vei Jiova, e sega ni vakavuna o Fero. E kaya tale na iVolatabu: “A sa vakayalovinakataki ira na kai Ijipita ko Jiova vei ira na tamata, a ra sa solia kina vei ira na ka era sa kerea.”​—Lako Yani 12:​35, 36.

Vakasamataka mada se na vakacava na nodra itovo ni rai na Isireli. Era sa sotava oti na Isireli na veivakabobulataki mosimosi ra qai sega ni kauaitaki. Ia oqo, era sa galala ra qai taukena e levu na iyau. Ena vakacava mada na lomadra nira sa na solia na veika era taukena oya? Era na rairai nanuma ni o ira ga era rawata mai, e dodonu ga mera taukena. Ia, nira kerei mera cau vakailavo me tutaki kina na sokalou savasava, era cakava vakakina​—ena lomadra taucoko! Era sega ni guilecava ni o Jiova ga a vakavuna na nodra taukena tu na iyau kece oya. O koya gona, era solia kina vakalevu na siliva, na koula kei na manumanu. Era “lomasoli” kece. ‘E uqeti ira na lomadra.’ ‘E marau kina na lomadra.’ E a dua dina “nai solisoli” era vakaraitaka kina na nodra ‘marautaki Jiova.’​—Lako Yani 25:​1-9; 35:​4-9, 20-29; 36:​3-7.

Tu Vakarau Mo Solika

Na nona lomasoli dina e dua e sega ni vakatau mai na levu ni ka e solia. Ena dua na gauna e raica o Jisu na nodra biu ilavo na lewenivanua ena katonilavo ni valenisoro. E levu na ilavo era biuta na vutuniyau, ia e kurabuitaka o Jisu na nona vakalutuka e rua na ilavo lailai sara e dua na yada dravudravua. E kaya: “Na yada dravudravua oqo sa biuta vakalevu. . . . Sa biuta kecega kina na nona ka me bula kina.”​—Luke 21:​1-4; Marika 12:​41-44.

E tautauvata na nona ivakamacala o Paula vei ira mai Korinica kei na nanuma i Jisu. Ni yaco mai na gauna mera cau kina me baleti ira na nodra itokani vakabauta era gadreva tu na veivuke, e kaya o Paula: “Kevaka sa tu na via cakava, ena vinakati me vaka na ka sa tu vua e dua, ka sega ni vaka na ka sa sega ni tu vua.” (2 Korinica 8:12) Io, na cau e sega ni ka me veisisivitaki se me vakatautauvatataki kei na ka e solia e dua tale. Na veika e solia e dua e vakatau mai na ka e taukena. E marautaka o Jiova na yalo ni lomasoli.

E dina ni sega ni dua e rawa ni vakavutuniyautaki Jiova me vaka ni taukena o koya na ka kece, na cau gona e itavi dokai vei ira na sokaloutaki koya mera vakaraitaka kina nodra lomani koya. (1 Veigauna 29:​14-17) Na cau e sega ni vakaraitaki e matanalevu se ena so na inaki kocokoco, ia e soli ena ivalavala matau e tokoni kina na sokalou dina e kauta mai na marau kei na veivakalougatataki i Jiova. (Maciu 6:​1-4) E kaya o Jisu: “A ka ni veivakalougatataki vakalevu me soli ka, ka vakalailai ga me taura na ka.” (Cakacaka 20:35) Eda rawa tale ga ni marau nida solia na noda igu ena cakacaka i Jiova kei na noda biuta vakatikitiki na veika eda taukena me tutaki kina na sokalou dina, ra qai vukei kina o ira era gadreva dina tu na veivuke.​—1 Korinica 16:​1, 2.

Tu Vakarau Mo Solika Nikua

Nikua, era marau na iVakadinadina i Jiova nira raica na toso ni kena vunautaki “na i tukutuku vinaka ni matanitu.” (Maciu 24:​14, VV) Ena iotioti ni tini na yabaki ni ika20 ni senitiuri, e sivia na le 3,000,000 era papitaiso mera vakaraitaka na nodra yalayala vua na Kalou o Jiova kei na kena tauyavutaki e 30,000 na ivavakoso vovou. Io, e dua na ikatolu ni ivavakoso ni iVakadinadina i Jiova nikua era tauyavu ena loma ga ni tini na yabaki sa oti! E levu na tubu oqo e vu mai na nodra cakacaka vakaukaua na tagane kei na yalewa lotu Vakarisito yalodina ena nodra solia nodra gauna kei na nodra igu mera lai sikovi ira na wekadra ra qai tukuna vei ira na inaki i Jiova. E so tale ga na tubu oqo e rawa mai na nodra cakacaka na daukaulotu, era biuta na nodra vale ra qai lako e vanua tani mera lai tokona na vunautaki ni Matanitu ni Kalou. Na tubu oqo e lai tauyavu kina na tabacakacaka vovou qai vakavuna nodra digitaki na ivakatawa ni tabacakacaka vovou. Me kena ikuri, e gadrevi vakalevu na iVolatabu me vakayagataki ena vunau kei na vuli vakataki keda. E gadrevi tale ga vakalevu na ivola. Ena levu na vanua, e gadrevi mera vakalevutaki se ra sosomitaki ena vale lelevu na valenivolavola ni tabana. Era vakayacori rawa na gagadre kece oqo ena nodra cau na tamata i Jiova.

Gadrevi na Kingdom Hall

E gadrevi vakalevu sara na Kingdom Hall ni laurai na tubu vakaitamera ni kedra iwiliwili na iVakadindina i Jiova. Na vakadidike e vakayacori ena itekivu ni yabaki 2000 e vakaraitaka ni gadrevi e sivia e 11,000 na Kingdom Hall ena veivanua era se qai vakatorocaketaki tiko, e lailai kina na ilavo. Dua na kena ivakaraitaki o Angola. Dina ni caka tu na veivaluvaluti vakalewenivanua, ena veiyabaki e tubu ena tini na pasede na ivakatautauvata ni kedra iwiliwili na dautukutuku ni Matanitu. Ia, e levu vei ira na 675 na ivavakoso oqo e Aferika era dau soqoni e tautuba. E 22 na Kingdom Hall ena vanua oqo qai 12 ga e tiko na kena delavuvu.

E vakatale ga oqo ena Democratic Republic of Congo. E dina ni 300 na ivavakoso ena kena koroturaga o Kinshasa, e tini wale ga na Kingdom Hall e kea. Ena veimatanitu ena vuravura raraba, na vanua oqo e gadreva dina vakatotolo e sivia ni 1,500 na Kingdom Hall. Me baleta na tubu veitaravi ena veivanua ena Tokalau kei Urope, erau vinakata na matanitu e rua o Rusia kei Ukraine e vica vata na drau na Kingdom Hall. Na tubu vakaitamera tale ga e Mereke vakalatina e laurai vakalevu e Brazil, era tiko kina e sivia na veimama na milioni na iVakadinadina ra qai gadreva dina e levu na Kingdom Hall. Me vakayacori na veika era gadreva na veivanua vaka oqo, sa ra vakusakusataka tiko na iVakadinadina i Jiova na porokaramu ni kena tara na Kingdom Hall. E cicivaki na porokaramu ena nodra cau na mataveitacini e vuravura raraba, me rawa ni dua tale ga kina na itikotiko ni sokalou vinaka vei ira mada ga na ivavakoso era sega ni rawailavo vakalevu.

Ena gauna makawa e Isireli, e caka rawa e levu na ka nira ‘dokai Jiova ena nodra iyau’ na lotu Vakarisito yalodina. (Vosa Vakaibalebale 3:​9, 10) Na iLawalawa Dauvakatulewa e via vakavinavinakataki ira kece sara o ira e uqeti ira na lomadra ena solika vaka oqo. Eda nuidei tale ga ni yalo i Jiova ena yavalata tikoga na lomadra na nona tamata me tutaki kina na cakacaka ni Matanitu ni Kalou sa qai vakaitamera tiko ga.

Ni toso tiko ga na cakacaka e vuravura raraba, meda vakasaqara mada ga na sala meda vakaraitaka kina ni vu dina mai lomada na noda solia na noda igu, na noda gauna, kei na noda iyau. Meda vakila mada ga na marau dina ena kauta mai na mataqali yalo ni lomasoli vaka oqo.

[iYaloyalo ena tabana e 29]

“VAKAYAGATAKI MADA GA VAKAVUKU!”

“Au yabaki tini. Au vakauta tiko yani na ilavo oqo me rawa ni voli kina na veva se dua tale na ka, me tabaki kina na ivola.”​—Cindy.

“Au vinakata meu vakauta yani na ilavo oqo me tabaki kina e levu tale na neimami ivola. Au rawata na ilavo oqo niu a vukei tamaqu tiko. Me vakayagataki mada ga vakavuku!”​—Pam, yabaki vitu.

“Au rarawa dina niu rogoca na vakacaca ni cagilaba. Au nuitaka ni sega ni dua na leqa e yacovi iko. Na [$2, ni Mereke] oqo e ilavo kece e tiko ena noqu akaude ena baqe.”​—Allison, yabaki va.

“Na yacaqu o Rudy, au yabaki 11. E yabaki ono na taciqu o Ralph. E yabaki rua veimama na ganequ o Judith. Sa tolu na vula na neitou maroroi ilavo tiko mera vukei kina na taci keitou ena vanua e carubi vakalevu kina na ivalu. Keitou maroroya rawa e 20 na dola keitou vakauta tiko yani oqo.”

“Au lomani ira dina na taciqu era sotakaya na cagilaba. Au rawata e 17 na dola oqo niu a cakacaka vata tiko kei tamaqu. Au na sega ni tukuna mo vakayagataka vakacava na ilavo au vakauta tiko yani oqo, qai lewa ga o iko.”​—Maclean, yabaki walu.