Dau Qaqarauni ni o Cakacaka Vakavunau
1. Na cava meda qaqarauni kina nida cakacaka vakavunau tiko?
1 “Me vaka na sipi ena kedra maliwa na wolifa,” eda vunau tiko na tamata ni Kalou vei ira na “itabatamata takelo qai talaidredre.” (Maciu 10:16; Fpai. 2:15) Sa takalevu tu nikua na itukutuku vakadomobula ni nodra tiko yavavala na lewenivanua, vakacaca vakailawalawa kei na nodra kauvakavesu na tamata, qori e vakadinadinataka nira sa qai “torosobu ga” na tamata ca. (2 Tim. 3:13) Na ivakavuvuli vakaivolatabu cava meda muria ‘meda qaqarauni’ kina nida cakacaka vakavunau tiko?—Maciu 10:16.
2. Na ituvaki cava e rawa ni vakavuna meda biuta e dua na yalava, da toki ina dua tale?
2 Mo Yalomatua: E vakabibitaki ena Vosa Vakaibalebale 22:3 na vinaka ni noda ‘vunitaki keda’ mai na leqa. Mo kida tiko! E rawa ni vakasauri ga na veisau ni ituvaki ena dua na yalava e dau vinaka tu e liu. O na raici ira vakawasoma beka na ovisa se ra kumuni tu beka e sala e dua na ilala. Ena so na gauna ena rawa tale ga ni vakasalataki iko o itaukeinivale me baleta e dua na ka e vakarau yaco. Ke yaco qori, kua ni qai via vakilakila tale e levu na ka, e ka vakavuku ga mo biubiu totolo sara ga, lai cakacaka tale ena dua na vanua.—Vkai. 17:14; Joni 8:59; 1 Ces. 4:11.
3. Ena rawa ni vakayagataki vakacava ena cakacaka vakaitalatala na ivakavuvuli ena Dauvunau 4:9?
3 Cakacaka Vata: “Sa vinaka ni le rua ka ca ni le dua bau ga,” e kaya na Dauvunau 4:9. De dua e matau vei iko mo cakacaka vakavunau duadua. Vakacava nikua, o nanuma ni na sega ni yaco kina e dua na leqa? Ena rawa beka ena so na vanua, ia ena so tale ena sega ni vinaka me cakacaka vakavunau duadua e dua na tacida yalewa se itabagone, vakabibi ena bogi. E vakadinadinataki ni yaga vakalevu ke drau salavata kei na dua e rawa ni vukei iko ke yaco na leqa. (Dauv. 4:10, 12) Nida cakacaka vakavunau tiko meda kila na vanua era tu kina o ira eda cakacaka vata. Ni bera ni o biuta na vanua ni cakacaka vakavunau, mo dau tukuna rawa ni o sa na lako.
4. Eda na vakaitavi kece vakacava ena nodra taqomaki na lewe ni ivavakoso?
4 E nodra itavi qase ni ivavakoso mera veivakasalataki ena ituvaki ni yalava, me vaka ni o ira era ‘yadravi keda tiko.’ (Iper. 13:17) Eda na vakalougatataki vei Jiova nida yalorawarawa da qai muria nodra ivakasala na qase. (Maika 6:8; 1 Kor. 10:12) Meda cakacaka vata mada ga na dauveiqaravi ni Kalou noda saga me laulau na noda vunau ena yalava, meda qaqarauni tale ga.