Kua ni Yalana na ka o Cakava—Ni o Nanuma o sa Rui Osooso
1. Na cava era tu suka kina eso mera veisureti ena vuli iVolatabu?
1 Eso era tu suka na veisureti ena vuli iVolatabu nira osooso. E dau taura na gauna na nona vukei e dua na vuli iVolatabu. E vinakati na gauna me vakarautaki qai caka kina na vuli, me vukei tale ga o gonevuli me walia na leqa e sotava. A tukuna na yapositolo o Paula ni a solibula me vukei ira e Cesalonaika mera kilai Jiova. (1 Ces. 2:7, 8) Eda rawa vakacava ni vakavulica e dua ena iVolatabu ke da osooso mada ga?
2. Nida lomani Jiova, me uqeti keda vakacava qori ena noda vakayagataka na noda gauna?
2 Vinakati na Gauna ena Sokalou: E sega ni vakabekataki ni na vinakati na gauna ena sokalou. Kena ivakaraitaki, eda dau vakayagataka e levu na gauna meda gole kina ena soqoni, vakaitavi ena cakacaka vakaitalatala, wili iVolatabu, meda masu tale ga. E dua e vakawati qai osooso ena raica tale ga me tiko na gauna me vakayagataka vua na kena isa. Sa qai wacava na kena bibi meda tu vakarau meda ‘volia’ na gauna meda qaravi Jiova kina nida lomani koya. (Efeso 5:15-17; 1 Joni 5:3) A tukuna o Jisu ni tiki bibi ni noda sokalou na cakacaka ni veivakatisaipelitaki. (Maciu 28:19, 20) Na noda vakasamataka qori ena uqeti keda meda ciqoma na itavi meda veivakavulici ena iVolatabu.
3. Eda rawa vakacava ni caka vuli iVolatabu ke vakalatilati ena noda ituvatuva eso na ituvaki?
3 Ia vakacava ke vakalatilati ena noda ituvatuva na cakacaka, tauvimate bibi, se da qarava tiko eso tale na ilesilesi vakalou? Eso na dautukutuku era dau caka vuli iVolatabu ena talevoni se internet ke ra gole ena so na gauna ina dua tale na vanua. O ira era tauvimate bibi era dau kerei ira na nodra gonevuli mera lai vuli yani ena nodra vale. Eso era kerea e dua tale na dautukutuku nuitaki me lai vakavulici nodra gonevuli ke ra sega ni rawa ni lako.
4. Eda na vakalougatataki vakacava ke da vakaitavi ena cakacaka ni veivakavulici ena iVolatabu?
4 Dua na ka na nona marau o Paula ni solia na nona gauna kei na nona igu ena nodra vukei eso tale mera vulica na ka dina. (Caka. 20:35) Na nona vakasamataka na yaga ni nona cakacaka e Cesalonaika, e uqeti koya sara ga me vakavinavinaka vei Jiova. (1 Ces. 1:2) Eda na marautaka vakalevu na noda cakacaka vakaitalatala ke da sega ni yalana na ka eda cakava nida nanuma nida sa rui osooso meda sega kina ni caka vuli iVolatabu.