Kua ni Tu Vakasuka!

1. Ena sala cava eda ‘sega ni bureitaka kina na ka vinaka’?

¹ Noda gumatua ni kacivaka na itukutuku vinaka ni Matanitu ni Kalou e vakaraitaka nida sega ni “bureitaka na ka vinaka” vei ira na tiko ena noda yalava. (Vkai. 3:​27) Na itukutuku vinaka duadua eda kacivaka tiko, oya na veika vinaka ena kauta mai na Matanitu ni Kalou. Eda wasea na itukutuku vinaka oqo nida vunau tawalokuci se nida soli ivoladraudrau. Nida sa cakava tiko oqo, vakacava me noda isausau meda caka vuli iVolatabu, ke se sega ni tiko e dua?

2. Na cava e dau dredre kina meda caka vuli iVolatabu?

² Dua na vuna levu e dau dredre kina na caka vuli iVolatabu oya na noda rai cala. So era tu vakasuka baleta nira sega ni matau ena caka vuli iVolatabu se ra osooso. Eda na veivosakitaka e so na vakatutu ena yaga meda kua ni tu vakasuka kina ena caka vuli iVolatabu.​​—⁠Maciu 28:​19, VV; Caka. 20:⁠20.

3. Cava na vuna eda rawa ni veivakavulici kina ena iVolatabu?

³ Sega na Yalodei: Rairai eda sega soti ni vuli vinaka se da sega ni matau ena caka vuli iVolatabu. O ira na italatala ni lotu Vakarisito ena imatai ni senitiuri era “sega so ni vuku, se tamata vuli.” Ia na cava e uqeti ira mera vunautaka na ka dina vei ira na tamata? Na nodra “dautiko vata kei Jisu.” (Caka. 4:​13) Era vuli mai na iwalewale ni nona veivakavulici na Qasenivuli Levu o Jisu, e tu ena iVolatabu meda vuli kina. Ke sega mada ga nida vuli vinaka, eda kalougata nida vakavulici ena vuli e uasivia na vuli vakayago.​​—⁠Aisea 50:4; 2 Kor. 3:⁠5.

4. Na cava eda vulica mai na ivakaraitaki i Emosi?

⁴ So na gauna e dau vakayagataki ira na parofita o Jiova mera vunauci ira na veiliutaki era caka cala se o ira na vakaitutu lelevu. O Emosi e dua e sega ni vakaitutu levu se vuli vinaka. E kaya o koya: “Sa sega ni parofita koi au, au sa sega talega ni luve ni parofita; ai vakatawa ni sipi ga koi au, kei na dausamaki lolo.” (Emosi 7:​14) A sega ni tu vakasuka o Emosi me vakasavuya na itukutuku ni veilewai i Jiova vua na bete dauqaravi matakau o Amasaia. (Emosi 7:​16, 17) Meda nanuma tiko nida cakava tiko na cakacaka i Jiova, ena vukei keda o koya meda vakayacora vinaka noda itavi.​​—⁠2 Tim. 3:​17.

5. Na cava meda caka vuli iVolatabu kina kevaka mada ga eda osooso?

⁵ Osooso: Kevaka mada ga eda osooso, eda sa na rairai tuvana oti na gauna meda gole kina ena cakacaka vakavunau. Na caka vuli iVolatabu e dua na ka marautaki ena noda cakacaka vakavunau. E dua dina na ka dokai noda raica na yaga ni Vosa i Jiova ena bula ni tamata. (Iper. 4:​12) E marautaka o Jiova ni raica noda soli keda meda tubera e dua me “mai kila sara nai vakavuvuli dina.” (1 Tim. 2:⁠4) Era marau tale ga na agilosi nira raica ni veivutunitaka e dua na tamata cakacala na nona ivalavala qai toso vakayalo.​​—⁠Luke 15:⁠10.

6. Na cava e itavi dokai kina noda cakava na loma ni Kalou?

⁶ Na Kalou e “vinakata me bula na tamata kecega, ka mai kila sara nai vakavuvuli dina.” (1 Tim. 2:⁠4) E dua dina na itavi dokai noda cakava tiko na loma ni Kalou, da qai sega ni tu vakasuka ni caka vuli iVolatabu!