Na Cava e Uqeti Keda Meda Vunau?
1. E uqeti keda vakacava na loloma ena noda cakacaka vakaitalatala?
1 Na cakacaka bibi duadua eda rawa ni vakaitavi kina nikua, oya na kena vunautaki na itukutuku ni Matanitu ni Kalou. Nida vakaitavi ena cakacaka qo, eda sa talairawarawa tiko ina rua na ivakaro levu duadua, oya meda lomani Jiova kei ira na tamata. (Mari. 12:29-31) E kaukaua dina na loloma ni rawa ni uqeti keda meda italatala gugumatua.—1 Joni 5:3.
2. E laurai vakacava ena noda vunau nida lomani Jiova?
2 Lomani Jiova: Nida lomani Jiova na noda itokani voleka duadua, ena uqeti keda qori meda tutaka na veika me baleti koya. Sa rauta ni 6,000 na yabaki na nona vakaucacataki koya voli o Setani. (2 Kor. 4:3, 4) Oya na vuna era vakabauta kina e levu ni Kalou e dau vakararawataki ira na tamata ca e eli, era nanuma ni tiki ni letoluvakalou qai tawakilai, e sega tale ga ni kauaitaki keda na tamata. Levu era sa lai vakabauta mada ga ni sega ni bula tiko na Kalou. Dua na ka na noda vinakata mera kila na tamata na ka dina me baleti koya na Tamada vakalomalagi! O Jiova e marautaka vakalevu na noda gumatua meda nona ivakadinadina, ia e vakacudrui Setani qori.—Vkai. 27:11; Iper. 13:15, 16.
3. E laurai vakacava ena noda cakacaka vakaitalatala nida lomani ira na tamata?
3 Lomani Ira na Tamata: Na gauna kece eda vunau kina vua e dua, eda vakaraitaka sara tiko ga nida lomani koya. Dua na ka na nodra via rogoca na itukutuku vinaka na tamata ena gauna dredre qo. E levu era vakataki ira na kai Ninive ena gauna i Jona era “sega ni kila rawa na ligadra i matau mai na ligadra i mawi.” (Jona 4:11) Na noda cakacaka vakaitalatala e vakavulici ira na tamata ena sala mera marautaka kina na nodra bula, me vakainaki tale ga. (Aisea 48:17-19) E solia vei ira na inuinui. (Roma 15:4) Ke ra vakarorogo ra qai muria na ka era vulica, era na “bula.”—Roma 10:13, 14.
4. Na cava ena sega vakadua ni guilecava o Jiova?
4 O ira na gone vinaka era vakaraitaka e veigauna nira lomani ira nodra itubutubu, sega ni so ga na gauna. Nida lomana tale ga vakalevu na Kalou kei ira na tamata, eda na sega ni vunau ga ena gauna lokuci. Ia eda na yadrava na gauna veiganiti kece meda vunau kina. Eda na sega ni cegu na vunau. (Caka. 5:42) O Jiova ena sega vakadua ni guilecava na loloma va qori.—Iper. 6:10.