O Cei ena Taleitaka Qo?

1. Nida wilika na Vale Vakatawa se Yadra! na cava meda vakasamataka tiko, na vuna?

¹ E vakarautaki na Vale ni Vakatawa kei na Yadra!, me ganiti keda na lewe i vuravura. Oya na vuna e tabaki kina e levu na veimataqali ulutaga. Nida wilika na ulutaga yadua ena noda mekesini, e dodonu meda vakasamataka tiko se o cei ena taleitaka, da qai solia sara vei ira.

2. Na ulutaga cava ena noda mekesini era na taleitaka vakalevu na tamata?

² Vakacava e vakamacalataki tiko ena Vale ni Vakatawa e se qai tabaki ga e dua na ulutaga vakaivolatabu drau a veitalanoataka kei na dua nomu itokani vakacakacaka? E tiko e dua na ulutaga e baleta na bula vakavuvale e rawa ni yaga vua e dua na wekamu? E dua o kila e lalawataka tiko me gade ena dua na vanua e vakamacalataki tiko ena Yadra!? Vakacava era na taleitaka eso na daunibisinisi se so na taba ni veiqaravi vakamatanitu ena nomu yalava e dua na noda mekesini? Kena ivakaraitaki, na mekesini e vakamacalataki kina na veika dredre era sotava na itabaqase, ena rawa ni taleitaki vakalevu ena vanua era dau qaravi kina na malumalumu. Era na rairai taleitaka na tabana ni lawa na mekesini e vakamacalataki kina na basulawa.

3. Tukuna e dua na ivakaraitaki e laurai kina na bibi ni kena soli na mekesini vei ira era na taleitaka na ulutaga e tabaki kina.

³ Na kena yaga: Ni rau ciqoma e dua na veiwatini mai Sauca Aferika na Yadra! ni Okotova 2011, e kena ulutaga “Tuberi Luvemu me Nuitaki,” erau qirita sara e 25 na koronivuli ena yalava ni nodrau ivavakoso. E ruasagavulukarua era ciqoma na Yadra! ra qai veisoliyaka vei ira na nodra gonevuli. Erau cakava tale ga qori e dua na veiwatini ena vanua tiko ga qo ena nodrau veisoliyaka na Yadra! ena koronivuli e tiko ena nodrau yalava. Eso na qasenivuli ena dua na koronivuli era vakayagataka na Yadra! ena nodra lesoni ena veimacawa, vakayagataki tale ga me vukea na nodra wilivola na gonevuli. Erau talanoataka sara na veiwatini vua na ivakatawa ni tabacakacaka na ka erau cakava. A uqeti ira sara na ivavakoso ena nona tabacakacaka mera dau sikovi ira na koronivuli e tiko ena nodra yalava. E levu sara na mekesini e kerei ena valenivolavola ni tabana, sa qai tabaki kina e levu tale na ilavelave ni Yadra! qo.

4. Na cava eda na via veisoliyaka kina na mekesini ena kena levu e rawa?

⁴ E vakamacalataki ena noda mekesini na vuna era yaco tiko kina na veika eda sotava tu nikua qai vakamuai ira na tamata ena iVolatabu kei na Matanitu ni Kalou. Erau mekesini duadua ga e vuravura e ‘vakarogoya na veivakabulai.’ (Aisea 52:7) Oya na vuna eda na via veisoliyaka kina ena kena levu e rawa. Dua na sala eda na cakava kina qori, oya na noda taroga, ‘O cei ena taleitaka qo?’