Kato ni Taro

◼ Ni bera ni vakadonui e dua me papitaiso, me vakacava na wasoma ni nona tiko ena soqoni kei na nona vakaitavi ena cakacaka vakaitalatala?

E vakatulewa bibi duadua na papitaiso. Koya gona, ni bera ni vakadonui e dua me papitaiso, me bau kila toka na ka e vinakata vua na Kalou. Me laurai tale ga ena nona bula ni gu na lomana me cakava na ka e vinakata na Kalou.

E vakaroti na lotu vaKarisito me kua ni vakawaletaka na soqoni, e dodonu gona me sa laurai tiko vua na dautukutuku bera ni papitaiso nona dau qacoya na soqoni. (Iper. 10:24, 25) Dodonu me sa dau vakamacala tale tiko ga ena soqoni. De dua e sa curu tale tiko ga ena Koronivuli ni Vuli Vunau, ia ena sega ni vakatau e keri na nona vakadonui.

Kena ikuri, e vakaroti na lotu vaKarisito me vunautaka na itukutuku vinaka, me veivakatisaipelitaki. Koya gona, e dodonu me vakaitavi wasoma e dua ena cakacaka vakaitalatala ni bera ni papitaiso. (Maciu 24:14; 28:19, 20) Vica na vula me dautukutuku bera ni papitaiso tiko kina e dua me qai vakadonui me papitaiso? Me veirauti na gauna e soli me vakadeitaki kina ni na gugumatua tu ga ena cakacaka vakavunau e veivula. (Same 78:37) Ia me kua ni taura sara e dua na gauna balavu me qai vakadonui me papitaiso, me vica ga na vula. Me vakacava na levu ni aua me ripotetaka? E sega ni dua na kena lawa. Mera dikeva na qase na ituvaki ni dautukutuku yadua, mera yalorawarawa, mera lewa matau.​—Luke 21:1-4.

Nira veivosaki na qase (se dauveiqaravi ni ivavakoso e lailai kina na qase) kei koya e via papitaiso, mera nanuma tiko nida duidui, o koya gona mera vakatulewa vakamatau me baleta na nona vakadonui e dua me papitaiso se sega. Mera raica na qase ni vu mai lomana nona vinakata me iVakadinadina i Jiova, e doka tale ga na nona lewena na isoqosoqo i Jiova kei na nona vakaitavi ena cakacaka vakaitalatala. Era kila na qase ni se sega ni matua vakayalo se sega ni tu vua na kila me vakataki ira na dautukutuku matua era sa papitaiso. Ke ratou vakila na qase ni sega ni ganiti koya me papitaiso, me ratou vakaraitaka vakayalovinaka vua na yavu vakaivolatabu ni nodratou vakatulewa, me ratou raica tale ga ni vakarautaki vua na veivuke vakayalo e ganiti koya.