Vulica mo Dau Totolo
1. E ivakaraitaki vinaka vakacava o Jiova ena nona sega ni dau bera?
1 E sega ni dau lokuyara o Jiova. Kena ivakaraitaki, e dau tu vakarau me ‘vukei keda ena gauna sara ga eda gadreva kina.’ (Iper. 4:16) E vakarautaka tale ga na ‘kakana vakayalo ena kena gauna donu.’ (Maciu 24:45) Koya gona, eda vakabauta ni na ‘sega ni bera’ na siga ni nona cudru sa roro tiko mai. (Apak. 2:3) Io, e yaga dina vei keda na nona dau totolo o Jiova! (Same 70:5) Eda osooso, sega tale ga nida uasivi, koya gona ena dredre toka meda dau totolo. Ia na cava meda vulica kina meda dau totolo?
2. Ena rokovi vakacava o Jiova ke da dau totolo?
2 E takalevu ena iotioti ni veisiga qo na dau bera, ni levu era lomani ira ga, sega tale ga nira lewai ira vinaka. (2 Tim. 3:1-3) Koya gona, ni dua na lotu vaKarisito e yaco totolo ena vanua ni cakacaka, yaco totolo ena dua na bose se veivosaki, levu era na qoroya qori, ena rokovi kina na yaca i Jiova. (2 Pita 2:12) Vakacava eda dau totolo ena vanua ni cakacaka, da qai dau bera ena cakacaka se soqo vaKarisito? Noda totolo ena soqoni vaKarisito, me vaka noda tiko ena imatai ni sere kei na masu, e vakaraitaka nida via vakatotomuri koya na Tamada vakalomalagi e dau maqosa nona ituvatuva.—1 Kor. 14:33, 40.
3. Na cava e tukuni kina ni noda dau totolo e vakaraitaka nida veinanumi?
3 E vakaraitaka tale ga na veinanumi noda dau totolo. (Fpai. 2:3, 4) Kena ivakaraitaki, nida yaco totolo ena soqoni vaKarisito kei na soqoni ni cakacaka vakavunau, eda na sega ni vakasosani ira kina na tacida vakayalo. Ena yasana adua, ke noda ivakarau meda dau bera, eda sa vakaraitaka tiko vei ira na tacida ni sega ni bibi nodra gauna, e bibi ga na noda. Na noda dau totolo e vakaraitaka noda gugumatua kei na noda nuitaki—na itovo era taleitaka o ira eda veimaliwai vata.
4. Ke da dau bera tu ga, na veisau cava eda rawa ni cakava?
4 Ke o dau bera tu ga, vakasamataka mada na vuna o bera kina. Me dua nomu ituvatuva matau me vukei iko mo qarava na itavi ena kena gauna lokuci. (Dauv. 3:1; Fpai. 1:10) Kerea na veivuke i Jiova. (1 Joni 5:14) Na noda dau totolo e sala vinaka meda vakaraitaka kina noda vakavinavinakataka na rua na ivunau levu duadua ena Lawa—noda lomana na Kalou kei ira na kai noda.—Maciu 22:37-39.