Kato ni Taro

◼ Na cava mera vulica na gone mera matua kina vakayalo?

Levu na ka e rawa nira cakava na itubutubu lotu vaKarisito mera tuberi luvedra kina “ena ivakavuvuli kei na ivakasala i Jiova.” (Efeso 6:4) Kena ivakaraitaki, levu na itubutubu era vakadinata ni yaga nodra dau dikeva vata kei ira na luvedra e veimataka na tikinivolatabu ni veisiga. E rawa nira sarava na vuvale ra qai veivosakitaka vata na iyaloyalo e vakarautaka na isoqosoqo, veivosakitaka eso na ulutaga ena ivola na Young People Ask, dramataka na italanoa mai na iVolatabu, se vakatovotovo. Ia me rawa nira “matua” sara na gone, e dodonu mera vakavulici ena ivakavuvuli titobu vakaivolatabu.—Iper. 6:1.

Vakasamataka mada na ka eda vakavulica vei ira ena yalava. Ena imatai ni veisiko se kena e tarava, eda dau saga meda tekivutaka na vuli iVolatabu ena ivola Na Cava Sara Mada E Kaya Na iVolatabu? Ni oti na ivola qori, eda dau dewa sara ena ivola “Tiko ga ena Loloma ni Kalou.” Na vuna? Na ivola Kaya na iVolatabu e vakavulica na ivakavuvuli rawarawa ga vakaivolatabu. Na ivola na “Loloma ni Kalou” e vakavulici ira mera bulataka na ivakavuvuli vakaivolatabu. Na vulici ni ivola ruarua qo e vukei ira na ka vou me ‘ti sara na wakadra’ vei Karisito ra qai “tudei ena vakabauta.” (Kolo. 2:6, 7) Ena yaga tale ga qo vei ira na luveda! E bibi mera vakavulici ena ka e vauca na isoro, na Matanitu ni Kalou, kei na kedra ituvaki na mate. E bibi mera kila na gone na vuna e vakalaiva tiko kina na Kalou na veika rarawa, mera kila tale ga vakataki ira ni qo na iotioti ni veisiga. Mera vakadeitaka vakataki ira ni o keda na ivakadinadina i Jiova eda vakavulica na ka dina. Bibi tale ga mera kila vinaka na ivakavuvuli vakaivolatabu qai ‘vakavulici nodra vakasama.’ (Iper. 5:14) E bibi mera vakasamataka na itubutubu na yabaki ni bula i luvedra kei na ka e rawa nira katona. Ena yasana adua, e levu na gone sa ra vulica rawa na veika titobu ena iVolatabu nira se gone lailai.—Luke 2:42, 46, 47.