Vakayagataka Noda Web Site Mera Vakavulici Kina na Luveda
1. Na cava na inaki ni ulutaga “Children” ena noda Web site?
1 Na inaki ni noda Web site, na jw.org me yaga vei ira na tamata kece. E dua na ulutaga ena noda Web site na “Children” (gole ina Bible Teachings > Children) ena vukei ira na gone mera veivolekati kei na nodra itubutubu, mera volekati Jiova tale ga. (Vkru. 6:6, 7) O na vakayagataka vakacava na ulutaga qori mo vakavulici luvemu kina?
2. O na digia vakacava na ulutaga mo drau vulica vata kei luvemu e ganita na yabaki ni nona bula?
2 Mo Yalorawarawa: E duidui na ka era vinakata na gone. (1 Kor. 13:11) O na digia gona vakacava na ulutaga e ganita na yabaki ni bula i luvemu? E vinaka mo taroga: ‘Na ulutaga cava ena taleitaka o luvequ? Ena vakacava na levu ni ka e rawa ni vulica kina? Vakacava na dede ni nona rawa ni vakarorogo?’ Ke tiko na yabaki ni bula i luvemu mai na yabaki tolu se lailai, drau rawa ni veivosakitaka na italanoa ena ulutaga “My Bible Lessons.” Eso na vuvale era dau taleitaka na italanoa vakaivolatabu ena ulutaga “Teach Your Children.” Raica mada qo eso tale na vakatutu.
3. E rawa nira vakayagataka vinaka vakacava na itubutubu na italanoa kei na so tale na ka e laurai ena ulutaga “Family Worship Projects”?
3 Na ka e Rawa ni Caka ena Sokalou Vakavuvale (Family Worship Projects): Qo na ka e rawa nira vakayagataka na ulunivuvale mera vuli kina kei luvedra. Tabaka na bulukau na “download,” qai wilika na ulutaga “Parents’ Guide,” mo kila kina na ka mo cakava ena italanoa yadua kei na so tale. Mo vakayagataka na itaba se droini mo vakavulici ira kina na luvemu lalai. Mo vukei ira na luvemu era qase cake mera vakacavara na qito vakaivolatabu ena ulutaga “Study Activity.” Na qito kece vakaivolatabu era sema ina dua na italanoa vakaivolatabu se dua na lesoni, e rawa gona nira vakaitavi ena sokalou vakavuvale na gone e duidui na nodra yabaki.
4. Na cava eda na raica ena ulutaga “Become Jehovah’s Friend”?
4 Mo iTokani i Jiova (Become Jehovah’s Friend): Na vidio, sere, kei na so tale na ka e tiko ena ulutaga qo ena vukei ira na itubutubu mera tugana e loma i luvedra na Vosa ni Kalou. (Vkru. 31:12) E tiko ena vidio leleka yadua e dua na lesoni bibi. Na lesoni bibi qori ena vakabibitaki ena qito vakaivolatabu era dau uqeti kina na gone mera vaqaqara. Era dau vinakata na gone mera lagata na noda sere—e vukei ira tale ga na sere mera nanuma vinaka na ka era vulica—qori na vuna e dau biu kina ena noda Web site na sere e volai me baleti ira.
5. Na cava mera kerea kina na veivukei i Jiova na itubutubu ena nodra vakavulici luvedra ena ka dina?
5 Ra itubutubu, e vinakata o Jiova moni tama, moni tina vinaka tale ga. Ni kerea gona nona veivuke moni vakavulici ira na luvemuni ena ka dina. (Dvei. 13:8) Ena veitokoni i Jiova, oni rawa ni vakavulici luvemu mera ‘vuku me rawa kina nira vakabulai ena nomuni vakabauti Karisito Jisu.’—2 Tim. 3:15; Vkai. 4:1-4.