Vakayagataka Vinaka Nomu Gauna ena Cakacaka Vakaitalatala
Eda vakayagataka e 1,945,487,604 na aua ena cakacaka vakaitalatala ena yabaki vakacakacaka ni 2014—e dusia vakamatata nida vinakata meda ogaoga tiko ga ena qaravi Jiova! (Same 110:3; 1 Kor. 15:58) Me vaka ni “sa vakalekalekataki na gauna,” vakacava eda rawa ni vakayagataka vinaka na noda gauna meda vosa vei ira e levu tale?—1 Kor. 7:29.
E vinakati na yalorawarawa me vakayagataki vinaka kina noda gauna ena cakacaka vakaitalatala. Kena ivakaraitaki, o dau vakayagataka e dua na aua se sivia ena dua na taba ni cakacaka vakaitalatala o qai sega ni vosa vua e dua? O rawa ni veisautaka qori mo vaqarai ira e levu qai vosa vei ira? Duidui na ituvaki ena duidui vanua. Ia qo eso na vakatutu mo vakayagataka vinaka kina nomu gauna, mo kua ni “vacuka wale tu na cagi.”—1 Kor. 9:26.
Vunau e Veivale: Sa dau kena ivakarau me tekivu ena mataka noda cakacaka vakaitalatala na vunau e veivale. Ia nira cakacaka e levu ena siga, vakacava mo vunau ena yakavi siga nira tiko e vale ra qai vakacegu toka? E rawa ni vuavuaivinaka ke da vunau e salatu se na vanua ni bisinisi ena siga.
Vunau e Matanalevu: Me vakayagataki ena yalava ni ivavakoso na qiqi se teveli ena vanua era tavali kina e levu. (Raica na Noda Cakacaka Vakaitalatala ni Julai 2013, t. 5.) Ke sa lailai tiko era tavali ena vanua e tuvanaki kina na vunau e matanalevu, e rawa ni vakatulewataka na Komiti ni Cakacaka ni iVavakoso me tokitaki na qiqi se teveli ena vanua era tavali kina e levu.
Veisikovi Lesu kei na Caka Vuli iVolatabu: Rawa ni o tuvanaka na veisikovi lesu kei na caka vuli iVolatabu ena gauna e sega ni vuavuaivinaka kina eso tale na taba ni cakacaka vakaitalatala? Kena ivakaraitaki, ke vuavuaivinaka na vunau e veivale ena mataka ni Vakarauwai, vakacava mo caka vuli iVolatabu ena yakavi se na bogi. Nida veisikovi lesu, meda kua ni lako vakalelevu, me vuavuaivinaka kina noda cakacaka vakaitalatala.
Eda na vola na levu ni gauna eda vakaitavi kina ena cakacaka vakaitalatala, ia eda na marau vakalevu ke vuavuaivinaka noda cakacaka. Ke o raica ni sega ni vuavuaivinaka e dua na taba ni cakacaka vakaitalatala ena dua na gauna, o rawa ni tovolea e dua tale na tabana. Masuti Jiova na “Turaga ni tatamusuki” me dusimaki iko, mo vakayagataka vinaka kina nomu gauna ena cakacaka vakaitalatala!—Maciu 9:38.