O Rawa ni Vakarabailevutaka Nomu Cakacaka?
1. Na cava sa qai vinakati ga vakalevu nikua ena cakacaka vakavunau, na cava na vuna?
1 Ni raica o Jisu na nodra taleitaka e levu na itukutuku vinaka ni Matanitu ni Kalou, a tukuna kina vei ratou na nona tisaipeli me ratou “kerea na Turaga ni tatamusuki me tala mai eso tale na tamata cakacaka ina nona tatamusuki.” (Maciu 9:37, 38) Sa qai vinakati ga vakalevu nikua meda gugumatua ena cakacaka ni tatamusuki ni sa voleka sara ni cava. E bibi gona meda vakasamataka da qai masulaka se rawa vakacava nida vakarabailevutaka na noda cakacaka vakavunau.—Joni 14:13, 14.
2. Na cava era cakava eso ni vinakati e levu na dautatamusuki ena were?
2 Vakarabailevutaka Nomu Cakacaka: E levu era rawa ni painia ena veidusimaki kei na veitokoni i Jiova. (Same 26:2, 3; Fpai. 4:6) Eso era saga vagumatua mera painia veivuke ena dua se vica na vula ena loma ni yabaki. Qori e dua na sala vinaka mera vakarabailevutaka kina na nodra cakacaka vakaitalatala. Nira marautaka na nodra painia veivuke, era vakasamataka kina e levu mera painia tudei.—Caka. 20:35.
3. Ke o painia tu e liu, na cava o na rairai vakasamataka ena gauna qo?
3 O Rawa ni Painia Tale?: Ke o painia tu e liu, ena levu dina na ka vinaka o na tukuna me baleta na gauna ya. O bau vakasamataka qai masulaka mo painia tale? De dua sa sega ni vakalatilati na ituvaki a vakavuna nomu cegu mai na painia, o sa rawa ni marautaka tale ena gauna qo na itavi dokai qori.—1 Joni 5:14, 15.
4. Na ka totoka cava eda rawa ni cakava kece?
4 Sa toso vinaka sara tiko na cakacaka ni tatamusuki, sa voleka tale ga ni cava. (Joni 4:35, 36) Meda dui dikeva tale mada na keda ituvaki ena gauna qo meda raica ke rawa nida veisautaka na noda ituvatuva e veisiga meda vakarabailevutaka kina na noda cakacaka vakavunau. Ke da vakadeitaka ni sega ni rawa qori, eda rawa ni vakasamataka na sala meda vakavinakataka kina na iwalewale ni noda vunau. (Mari. 12:41-44) O ira na rawa ni vakarabailevutaka ena gauna qo na nodra cakacaka vakavunau mera painia, e ka dokai dina me vakayagataki ira o Jiova ena cakacaka totoka qori!—Same 110:3.