Vukei Ira na Mataboko Mera Kilai Jiova

1. Vakaraitaka vakacava o Jisu ni lomani ira na mataboko?

¹ Sa vo ga e vica na siga me mate o Jisu. Ni biubiu tiko mai Jeriko, rau kaci sara yani e rua na mataboko dravudravua: “Turaga, . . . ni lomani keirau!” A vakasamataka tiko vakabibi o Jisu na ituvaki dredre sa na vakarau sotava, ia e tu vakadua qai kacivi rau, e vakabulai rau sara. (Maciu 20:29-34) Eda na vakatotomuria vakacava nona lomani ira na mataboko o Jisu?

2. Eda na vunau vakacava vua e dua na mataboko eda sotava ena vanua era tavali kina na lewenivanua?

² Dau Veivuke: Ke o sotava e dua na mataboko, de dua ena vanua era tavali kina na lewenivanua, mo vakamacalataki iko qai taroga ke vinakata na veivuke. Me vaka nira dau lawakitaki o ira qo, ena rairai lomatarotaro. Ia na nomu kauaitaki koya dina ena vakaseavutaka nona lomatarotaro. Mo kila tiko ni duidui na ivakatagedegede ni mataboko, qo ena vakatau kina na veivuke o rawa ni cakava. Ni o sa veivuke oti, o rawa ni tukuna sara ni o veivakavulici ena iVolatabu. Tukuna ni o na wilika vua e dua na tikinivolatabu, me vaka na Same 146:8 se na Aisea 35:5, 6. Ke rawa ni wilika na Braille, tarogi koya ke vinakata e dua na ivola e volai ena Braille ena vulica kina e levu na ka vakaivolatabu. O rawa ni vukei koya tale ga me katona eso na ulutaga e rogoci ena jw.org. Ke tiko ena nona kompiuta na porokaramu e wilika na ulutaga, ena rairai taleitaka na ulutaga volai ena jw.org, ni na rogoci na porokaramu qo. E tiko tale ga eso na ulutaga e rawa ni download ena RTF (Rich Text Format).—Raica na kato “Ni o Vukea Tiko e Dua na Mataboko . . . ”

3. Eda na vakasaqarai ira vakacava na mataboko era tiko ena noda yalava?

³ Vakasaqarai Ira na Mataboko: Tu tu yadua meda sotava e dua na mataboko nida vunau e veivale ni levu vei ira era sega ni taleitaka mera vosa vei ira na vulagi era gole yani e nodra vale. E ka ni sasaga gona meda “vakasaqarai” ira va qo meda vunau vei ira. (Maciu 10:11) E dua drau cakacaka vata se vuli vata e mataboko? Mo vakaliuliu na vosa vua. Ke tiko ena nomu yalava na koronivuli ni mataboko, rawa ni o solia eso na noda ivola e volai ena Braille me biu ena nodra laibri. O kila e dua e mataboko na wekana? E tiko ena nomu yalava eso na isoqosoqo e dau tokoni ira na mataboko se ra vakarautaka na itikotiko me nodra na mataboko? Vakamacalataka vua na wekana, se o koya e veiqaravi ena valenivolavola, se kena iliuliu nira vinakata vakalevu na iVakadinadina i Jiova mera vukei ira na mataboko, tukuna ni o na kauta yani eso na ivola e volai ena Braille se so na katokatoni. Vakaraitaka vua na vosa ni yalayala ena iVolatabu ena nona vakarau vakaotia vakadua na Kalou na mataboko. O rawa tale ga ni vakaraitaka na vidio ena jw.org e kena ulutaga “Without It, I Would Feel Lost,” e vakaraitaki kina e dua na turaga mataboko e yaga vakalevu vua na iVolatabu e volai ena Braille. Ni o vakamacalataka na inaki ni nomu veisiko, sa na rawa kina ni o vosa vei ira na mataboko.

4. Na cava eda vulica ena ka e sotava o Janet?

⁴ Dua na tacida yalewa mataboko na yacana o Janet, e sikova e dua na itikotiko e tiko kina eso era mataboko. E veivosaki kei na dua na goneyalewa. E kaya vua o Janet, “O Jisu e vakabulai ira na mataboko, e vakaraitaka kina na ka ena cakava vei ira kece na mataboko.” Erau veivosakitaka na Vakatakila 21:3, 4, e vakamacalataka o Janet na sala ena vakayacora kina na vosa ni yalayala qo na Matanitu ni Kalou. E galu mani kaya: “Au sega ni bau rogoca e dua na mataboko me tukuna qori. Levu vei ira na matarai era vakabauta nira mataboko tu eso ena vuku ni ka era cakava se ka era cakava na nodra qase.” E imeli sara o Janet vua na goneyalewa qo ni vakaraitaka vua na sala me raica kina na ivola Kaya na iVolatabu. Ena gauna qo, rau sa vuli iVolatabu tiko vakarua ena dua na macawa.

5. Eda na sega ni vakabulai ira na mataboko me vaka e cakava o Jisu, ia eda na vakalougatataki vakacava nida kauaitaki ira na mataboko?

⁵ E macala nida na sega ni vakabulai ira na mataboko mera rai me vaka e cakava o Jisu. Eda rawa ga ni vukei ira kece e vakamatabokotaka tu na nodra vakasama na kalou ni veika vakavuravura qo, okati kina o ira na mataboko mera mai kila na ka dina ena Vosa ni Kalou. (2 Kor. 4:4) O Jisu e vakabulai rau na tagane voleka e Jeriko ena “levu ni nona lomani rau.” (Maciu 20:34) Ke va tale ga qori noda kauaitaki ira na mataboko, eda na marau meda vukei ira mera kilai Jiova, o koya ena vakaotia vakadua na mataboko.