‘Me Dei e Lomamu na Vosa Kece Qo’
Era vaka na ivakatawanisipi na itubutubu. Mera qaravi ira vinaka sara na luvedra ni dau rawarawa nodra vakamuai kei na nodra vakaleqai. (Vkai. 27:23) Era na cakava vakacava qori? Mera dau veivosaki kei luvedra e veisiga mera kila kina na ka e tu ena nodra vakasama kei na lomadra. (Vkai. 20:5) Mera vaqaqacotaka tale ga na vakabauta i luvedra ena iyaya e sega ni kama rawarawa na kena yavu. (1 Kor. 3:10-15) Na vidio ‘Me Dei e Lomamu na Vosa Kece Qo’ e vakamacalataki kina ni bibi me wasoma na sokalou vakavuvale. Dou sarava vata vakavuvale, qai veitalanoataka na vica na taro e toka e cake.
(1) Na cava e dredre kina me ratou vakaliuca na veika vakayalo na vuvale na Romana? (2) Na cava e dreve kina na nona sasaga o Brother Romana ena imatai ni gauna me ratou sokalou vakavuvale? (3) Na ivakavuvuli cava ena iVolatabu e yaga ena nodra susugi na gone? (Vkru. 6:6, 7) (4) Na cava e rawa ni caka me vinaka kina na veivosaki ena vuvale? (5) Na cava era vinakata na gone mera vakuai ira kina na itubutubu? (6) E yaga vakacava na nodrau veiuqeti vei ratou na vuvale na Romana o Brother kei Sister Baro? (Vkai. 27:17) (7) Me yaga na sokalou vakavuvale, na cava me vakarautaka rawa tu na ulunivuvale? (8) Na veisau cava e cakava o Brother Romana? (9) Na cava me caka wasoma kina na sokalou vakavuvale? (Efeso 6:4) (10) Na cava eso na ka yaga e rawa ni caka ena sokalou vakavuvale? (11) E vakaraitaka vakacava o Brother Romana ni dei qai lewai koya vinaka ni vukei Marika me cakava na ka e dodonu? (Jere. 17:9) (12) Erau vukei Repeka vakacava o Brother kei Sister Romana me vakatulewataka vinaka na nodrau veitokani kei Tasi? (Mari. 12:30; 2 Tim. 2:22) (13) Erau vakaraitaka vakacava na vakabauta o Brother kei Sister Romana ni rau cakava eso na veisau? (Maciu 6:33) (14) E vakabibitaki vakacava ena vidio qo mera dau vakarautaka na veika vakayalo na ulunivuvale? (1 Tim. 5:8) (15) Ni o dua na ulunivuvale, na cava o vakadeitaka mo cakava?
VEI IRA NA ULUNIVUVALE: A dramataki qo ena soqo ni veiwasewase ena 2011. O raica ena gauna qori eso na ka mo vakavinakataka ena nomudou sokalou vakavuvale? Vakacava ena gauna qo? Ke se vinakati tiko ga na veisau, yalovinaka masulaka mo cakava qori me yaga tawamudu vei ratou na nomu vuvale.—Efeso 5:15-17.