E Laurai i Vei na ka e Yalataka na Dauveibuli Yalololoma?

Tekivu mai na gauna e buli kina na kawatamata, e vosa vei keda na Dauveibuli ni vakayagataki ira na agilosi kei na parofita. E vinakata tale ga me volai na nona itukutuku kei na ka e yalataka. Nona yalayala qori ena tara nomu bula ena gauna se bera mai. O na raica i vei nikua na yalayala ni Kalou?

E tu ena iVolatabu nona itukutuku na Kalou vei keda. (2 Timoci 3:16) E vakayagataki ira vakacava na parofita mera vola nona itukutuku? (2 Pita 1:21) E vakayagataka nona yalo tabu mera kila na dauvola iVolatabu na ka e vinakata ra qai vola sara. Kena ivakaraitaki, ni via vola o daunibisinisi e dua nona ivola, ena kerei nona vunivola me vola. Ia na itukutuku qori e sega ni nona, e nei daunibisinisi. E va sara ga qori na volai ni iVolatabu, e vakayagataki ira na tagane na Kalou mera vola nona itukutuku, ia o koya ga e vakavuna na volai ni iVolatabu.

SA TU VAKARAWARAWA NA VOSA NI KALOU

E yaga vakalevu na nona itukutuku na Kalou, e vinakata gona meda wilika, meda kila tale ga. Nikua, sa tu vakarawarawa ena ‘veimatanitu, na veiyavusa kei na duivosavosa’ na “nona itukutuku vinaka tawamudu.” (Vakatakila 14:6) Ni vakatauvatani kei ira na vo tale ni vola e tu nikua, sa tu taucoko se vakatikina na iVolatabu ena sivia na 3,000 na vosa ni vakalougatataka na Kalou na kena vakadewataki.