“Ena solia mai o vuravura na vuana, ena vakalougatataki keda na Kalou, na noda Kalou.”—SAME 67:6

Marautaka Nona Veivakalougatataki na Dauveibuli me Tawamudu

E yalataka na Kalou vei Eparama ni na kauta mai na veivakalougatataki ina “matanitu kece kei vuravura” e dua na nona kawa. (Vakatekivu 22:18) O cei na kawa qori?

Rauta na 2,000 na yabaki sa oti, e solia na Kalou vei Jisu na kawa i Eparama, na kaukaua me cakava na cakamana lelevu. Na cakamana qori e dusia ni o Jisu ga ena vakayacora na ka e yalataki vei Eparama me baleti ira na matanitu kece.—Kalatia 3:14.

E kilai mai na nona cakamana o Jisu ni digitaki koya na Kalou me vakalougatataki keda. Ena cakava tale ga qori ni vakayagataki koya na Kalou me vakalougatataki keda me tawamudu. E laurai vakacava eso na itovo totoka i Jisu ena nona cakamana? Dikeva mada:

Yalololoma—E vakabulai ira na tauvimate.

Dua na gauna, e vakamasuti Jisu e dua na vukavuka me vakabulai koya. E tarai koya o Jisu qai kaya: “Au vinakata!” E yali vakasauri na nona vukavuka.—Marika 1:40-42.

Lomasavu—E vakani ira na walokai.

E sega ni vinakata o Jisu mera walokai na lewenivanua. Vakarua nona vakani ira vakacakamana e vica vata na udolu ena vica na ibuli madrai kei na ika. (Maciu 14:17-21; 15:32-38) Nira kana oti, era mamau qai vo tale tu e levu na kakana.

Veinanumi—E vakabulai ira na mate.

E mate na luvena tagane duadua ga e dua na yada. E vakanuinui tu ni na qaravi koya, ia nona “lomani koya dina” o Jisu e mani vakabulai luvena.—Luke 7:12-15.

VEIVAKALOUGATATAKI TAWAMUDU E VURAVURA

Sa vakaraitaka oti o Jisu ni tu vua na Kalou na kaukaua me vakalougatataka na kawatamata. Me vaka ga e yalataka, sa voleka ni lesu mai me cakava na cakamana lelevu sara e vuravura taucoko. Ena vakayagataki koya na Kalou Kaukaua Duadua me vakayacora qori.

Ena vakacava na bula e vuravura ni sa vakayacora na Kalou na ka e yalataka vei Eparama? Era na “taukena na vuravura” o ira na lomana qai doka na Kalou. Era na kunea tale ga “na marau vakasakiti ena levu ni vakacegu.” (Same 37:11) “Sa na sega tale na mate, na lolosi, na tagiyaso kei na mosi.”—Vakatakila 21:4.

Sa na totoka dina na bula tawamudu e vuravura e vakilai kina na vakacegu! Sa voleka ni veiliutaki na Kalou. Mo rawa ni kila e levu na veivakalougatataki ena kauta mai, yalovinaka rai ena www.jw.org.