Era Vakalougatataki Vakalevu Nira Lesu ina Nodra Vanua

LEVU na tacida era toki ena vanua e vakatorocaketaki ena veigauna sa oti, era sa lesu ena nodra vanua. Na vuna? Nira lomani Jiova kei ira na kainodra, era toki ina veivanua e vinakati kina vakalevu na dautukutuku. (Maciu 22:37-39) Na cava eso na ka era vakuai ira kina? Era vakalougatataki vakacava? Meda kila na kena isau, eda na dikeva mada na vanua qo o Cameroon ena ra kei Aferika.

“VANUA E KATI KINA NA ‘SIWA’”

Ena 1998, e biuta na nona vanua e Cameroon e dua na tacida o Onésime. E 14 na yabaki nona tu e valagi. Ni soqoni tiko ena dua na siga, e rogoca e dua na vosa vakatautauvata ni cakacaka vakavunau. E tukuna na tacida e vunau tiko, “Ke duidui na vanua erau siwa tiko kina e rua na veitokani qai dua vei rau e kati vakalevu nona siwa, e macala ga ni na toki yani nona itokani ina vanua e levu kina na ika.”

Ni vakasamataka o Onésime na ivakatautauvata qori, e nanuma kina me sa lesu i Cameroon, me vukei ira na dautukutuku ena vanua ya. Na vuna? Ni levu era via vulica tu na iVolatabu. Ia e leqataka eso na ka. Ena rawa ni vakamatauni koya tale ena vanua qori ni sa vica vata na yabaki nona tu e valagi? Na cava e cakava? E gole o Onésime me lai ono na vula i Cameroon. Ena 2012, sa qai toki vakadua.

E kaya o Onésime: “E vinakati meu vakamatauni au ena draki katakata kei na ivakarau ni bula. E vaka e sega ni matau vei au na idabedabe kaukaua ena Vale ni Soqoni.” Ia e matadredredre ni kaya, “Na levu ga ni noqu vakarorogo, e seavu yani noqu diva lesu na idabedabe malumu ena Vale ni Soqoni e valagi.”

Ena 2013, e vakamau o Onésime kei Géraldine, a tu mai Varanise me ciwa na yabaki, ia sa lesu i Cameroon. Erau vakalougatataki vakacava ni rau vakaliuca na loma i Jiova? E kaya o Onésime: “Keirau lai vuli vata ena Koronivuli ni iTalatala ni Matanitu keirau qai veiqaravi e Peceli. Ena yabaki sa oti, era papitaiso e 20 na vuli iVolatabu ena neirau ivavakoso. Au vakabauta niu sa tu qo ena vanua e kati kina na ‘siwa’.” (Mari. 1:17, 18) E kaya o Géraldine: “Au sega ni tadra na levu ni ka au vakalougatataki kina.”

MARAUTAKA NA VEIVAKATISAIPELITAKI

Se qai toki ga o Judith i Merika, e dau vinakata me vakarabailevutaka nona cakacaka vakaitalatala. E kaya: “Na veigauna kece au gadivi ira kina na wekaqu e Cameroon, au dau tagi niu lesu mai, niu sa biuti ira tu yani na vuli iVolatabu au tauyavutaka.” Ia e lomalomarua o Judith me toki lesu i Cameroon. Na vuna? Ni sa cakacaka vinaka tu, e sauma tiko kina na veiqaravi vakavuniwai e dau caka vei tamana mai Cameroon. Ia e nuitaki Jiova o Judith qai toki. E kaya vakadodonu ni diva lesu eso na ka e dau marautaka tu e valagi. E masulaka vei Jiova me rawa ni vakamatauni koya, e qai vakayaloqaqataki koya e dua na ivakatawa ni tabacakacaka kei watina.

Ni rai lesu o Judith, e kaya, “Ena loma ni tolu na yabaki, au marau niu vukea e lewe va me ratou mai tisaipeli.” E qai veiqaravi vakapainia lavotaki o Judith. Ena gauna qo sa tomani watina tiko o Sam-Castel ena nona itavi vakaivakatawa ni tabacakacaka. Ia vakacava o tamai Judith? Eratou qai raica rawa o Judith kei na nona vuvale e dua na valenibula e valagi e lomasoli me sauma na veisele e caka vei tamana. E rawa vinaka na veisele qori.

RAICA NA VEITOKONI I JIOVA

E toki i Kenada e dua na tacida tagane o Victor. Ni wilika oti e dua Na Vale ni Vakatawa me baleta na vuli torocake, e vakasamataka nona sasaga vakavuli. E mani cegu nona vuli mai na univesiti, me tiko ena dua na vuli cakacaka e lekaleka ga. E kaya o Victor, “Qo e totolo kina noqu kunea e dua na cakacaka, meu cakava sara na ka au dau vinakata tu, ya meu painia.” E qai vakamau o Victor kei Caroline, rau gade sara i Cameroon. Ni rau gade ena kena valenivolavola ni tabana, erau uqeti me rau vakasamataka na veiqaravi e Cameroon. E kaya o Victor, “Keirau raica ni sega ni dua neirau iulubale ni keirau bula rawarawa tu, keirau mani ciqoma na veisureti qori.” E dau tautauvimate o Caroline, ia erau vakatulewataka ga me rau toki.

Erau tekivu veiqaravi vakapainia tudei me rau vakavulici ira na levu ni tataleitaki ena yalava. E tauri rau toka na nodrau ilavo maroroi ena loma ni dua na gauna. Oti rau lai cakacaka tale me vica na vula i Kenada, me rawa ni rau lesu i Cameroon me rau tomana nodrau veiqaravi vakapainia. Erau vakalougatataki vakacava? Erau vuli ena Koronivuli ni iTalatala ni Matanitu, erau veiqaravi vakapainia lavotaki, ena gauna qo erau sa veiqaravi tiko ena tarataravaki. E kaya o Victor, “E totoka na bula e valagi, ia ni keirau biuta keirau vakila na veitokoni i Jiova.”

MARAU NI VUKEA ESO TALE MERA YALATAKI IRA VEI JIOVA

Ena 2002, e wilika o Alain, e gonevuli ni univesiti e Jamani, na tikidua Ra iTabagone—Oni na Vakayagataka Vakacava Nomuni Bula? E uqeti koya sara ga me veisautaka nona isausau. Ena 2006, e tiko ena Koronivuli ni Vuli Veiqaravi Vakaitalatala, e qai lesi me veiqaravi e Cameroon, na vanua e sucu kina.

Ni tiko e Cameroon, e cakacaka vagauna. Toso na gauna e qai raica e dua na cakacaka saulevu, ia e leqataka ni na sega ni vakaitavi kina vakalevu ena cakacaka vakaitalatala. Ni sureti gona me veiqaravi vakapainia lavotaki, e sega tale ni lomalomarua. E marici koya nona boso me kua ni biuta na cakacaka ni na vakatubura na kena isau, ia e dei tu ga o Alain ena nona vakatulewa. Toso na gauna, e vakamautaki Stéphanie, a tu mai Varanise me vica vata na yabaki. Na cava eso na ituvaki dredre e sotava ni lesu i Cameroon?

E kaya o Stéphanie: “Au a tautauvimate vakalailai, e lako vakaca tale ga vei au eso na ka, ia au qai raica rawa na kena iwali.” E vakalougatataka o Jiova nodrau vosota na veiwatini qo. E kaya o Alain: “Ni keirau lai vunau ena dua na koro tu yawa o Katé, keirau sotava e levu na lewenivanua era via vulica na iVolatabu. Keirau mani vuli iVolatabu kei ira ena talevoni. E papitaiso sara e rua na vuli iVolatabu, qai tauyavu e dua na iwasewase lailai.” E kaya o Stéphanie: “E sega ni tukuni rawa noda marau nida vukea eso tale mera yalataki ira vei Jiova. Keirau sa vakila vakalevu na marau qori ena neirau mai veiqaravi ena vanua qo.” Ena gauna qo sa veiqaravi tiko vakaivakatawa ni tabacakacaka o Alain, qai dau tomani koya o Stéphanie ena veisiko.

“E DONU VINAKA NEIRAU VAKATULEWA”

E papitaiso o Gisèle ni se vuli vuniwai tiko e Itali. E qoroya na tacida yalewa qo nodrau bula rawarawa na veiwatini painia rau vakavulici koya, e via vakarabailevutaka nona cakacaka vakaitalatala. E mani painia tudei sara ni oti ga nona vuli.

E via lai vakarabailevutaka o Gisèle nona veiqaravi vei Jiova e Cameroon, ia e leqataka eso na ka. E kaya, “Au sa na sega kina ni wili meu lewenivanua e Itali, au na yawaki ira tale ga na itokani kei na vuvale era tiko kina.” Ia ena Me 2016, e toki lesu i Cameroon o Gisèle. Toso na gauna e qai vakamau kei Léonce, e vakatututaka na valenivolavola ni tabana e Cameroon me rau toki i Ayos, e dua na tauni e vinakati kina vakalevu na dautukutuku.

E vakacava na bula e Ayos? E kaya o Gisèle: “Ena so na gauna, e sega tu na livaliva me vica vata na macawa, e sega ni jaji rawa na talevoni. Levu na gauna e sega ni vakayagataki tu. Au vulica na vasaqa ena buka, keirau na vakacina livaliva ena bogi ni keirau kauta na bara me keirau taki wai mai na uciwai, ni sega ni levu era lako yani ena gauna qori.” Erau vosota vakacava na veiwatini qo? E kaya o Gisèle: “E vukei keirau na yalo tabu i Jiova, neirau veitokoni vakaveiwatini, nodra veivakayaloqaqataki na vuvale kei na itokani, kei na nodra veivuke vakailavo.”

Vakacava e marau o Gisèle ni lesu ena nona vanua? E tukuna, “Au kaya vakadodonu, io. Ni se qai tekivu, e tiko eso na ka dredre, keirau dau yalolailai tale ga. Ia ni keirau vosota rawa qori, keirau sa qai vakadeitaka vakaveiwatini ni donu vinaka neirau vakatulewa. Keirau nuitaki Jiova, keirau sa qai volekati koya ga vakalevu.” Erau lai vuli o Léonce kei Gisèle ena Koronivuli ni iTalatala ni Matanitu, ena gauna qo erau sa veiqaravi tiko vakapainia lavotaki vakatovolei.

Era dau yaloqaqa na dauqoli ni veisau na draki, me rawa nira rawata kina e levu na ika. O ira tale ga na tacida era lesu ena nodra vanua era yalorawarawa ni vakuai ira, mera vukea kina e levu era yalomalumalumu mera taleitaka na itukutuku ni Matanitu ni Kalou. E macala ga ni na sega ni guilecava o Jiova nodra cakacaka vakaukaua na tacida qo, mera vakaraitaka nodra loloma ena vuku ni yacana. (Niem. 5:19; Iper. 6:10) Ke o tiko e valagi qai vinakati vakalevu na dautukutuku ena nomu vanua, vakacava o na rawa ni lesu? Ke o cakava qori, o na vakalougatataki vakalevu.—Vkai. 10:22.