Vakatutu ni Vuli

Na Cava Mo Vulica e Liu?

E lailai na gauna meda vuli kina vakataki keda. Eda na vakayagataka vinaka vakacava na noda gauna? Kena imatai, kua ni vakatotolotaka. Ena yaga vakalevu ke o vulica vakavinaka e vica ga na ka, ni vakatauvatani ke o vulica vakatotolo e levu na ka.

Oti, dikeva na ka mo vulica e liu. (Efeso 5:15, 16) Qo eso na vakatutu:

• Wilika e veisiga na iVolatabu. (Same 1:2) De dua ena vinaka mo tekivu ena wase ni iVolatabu e tuvanaki meda vulica ena lomanimacawa.

• Vakarautaka na Vale ni Vakatawa vulici kei na soqoni ena lomanimacawa. Vakavakarau vinaka mo vakamacala.—Same 22:22.

• Ke levu na gauna o rawa ni dikeva eso tale na kakana vakayalo, me vaka na mekesini e veisoliyaki, vidio, kei na ulutaga e tabaki ena jw.org.

• Vulica e dua na ka o taleitaka. O rawa ni vakekeli ena dua na ituvaki o sotava tiko, e dua na taro o via kila na kena isau, kei na ulutaga vakaivolatabu o via kila vinaka. Mo kila eso tale na ulutaga, o rawa ni raica na “Lesoni ni Vuli iVolatabu” ena iwasewase ni jw.org.