Vakayagataka na jw.org ena Nomu Cakacaka Vakaitalatala—“Mo iTokani i Jiova”

E tiko ena jw.org e dua na iwasewase e vakatokai na “iVakavuvuli Vakaivolatabu” (Bible Teachings) e tiko kina e dua tale na ulutaga me baleti ira na gone “Mo iTokani i Jiova” (Become Jehovah’s Friend), e tiko e loma na sere, vidio, kei na ka me caka. O sa vakayagataka tiko na iwasewase qo ena nomu cakacaka vakaitalatala? Ke o vuli iVolatabu kei na dua na itubutubu e tiko na luvena lalai, vakacava mo vakaraitaka vua? Ena rairai uqeti koya me raica eso tale na ka ena noda Web site.

E sotava e dua na marama e dua na tacida tagane ni veisoliyaka tiko na tikidua na iTukutuku ni Matanitu Nb. 38, e vakawilika sara na tikidua ena gauna e taura kina. E vica toka na luvena lalai eratou via wilika tale ga na tikidua qori. E vakamacalataka sara vakalekaleka na tacida na lewe ni tikidua qai vakaraitaka na noda Web site e tabaki toka e muri. Ni kauai na marama qo, e vakaraitaka sara na tacida e dua na vidio nei Kelepi vei koya kei ratou na luvena, ni vakayagataka nona talevoni.

E dua na tacida yalewa e tukuna vua e dua na marama rau cakacaka vata me baleta na noda Web site, e kaya ni tiko kina na itukutuku me baleta na vuvale. E vakaluveni na marama qo. Ratou mani raica vakaveitinani na jw.org. E muri e tukuna na marama qo vua na tacida ni ratou lagata tiko e vale na luvena na sere “Vunautaka na Vosa” (Preach the Word), na sere mai na iwasewase “Mo iTokani i Jiova.”

Vakacava mo kila vinaka na ulutaga qo ena jw.org, mo kopitaka ena nomu talevoni na vidio, sere, kei na ka me caka. O na rawa ni vakayagataka na iwasewase qo ena jw.org ena cakacaka vakaitalatala. E yaga dina na ivukevuke qo nida qarava tiko na Turaga!—Caka. 20:19.