E Donu se Cala? iVolatabu—Na iDusidusi Nuitaki

Nida yavutaka na noda vakatulewa ena ka eda nanuma se ka era nanuma eso tale, eda sega ni rawa ni vakadeitaka sara ni na tini vinaka. Na iVolatabu e vakamacalataka na vuna. E volai tale ga kina na idusidusi nuitaki meda marau kina qai vakainaki na noda bula.

E DODONU MEDA DUSIMAKI

E vakamacalataka na Kalou o Jiovaa ena iVolatabu ni nona inaki meda qara nona veidusimaki, meda kua ni lewai keda ga. (Jeremaia 10:23) Ya na vuna e vakarautaka kina ena iVolatabu na idusidusi ni ka e donu kei na ka e cala. E lomani keda na kawatamata, qai sega ni vinakata meda sotava na dredre se rarawa nida vakatulewa cala. (Vakarua 5:29; 1 Joni 4:8) Ni Dauveibuli, e tu vua na vuku kei na kila me vakarautaka kina na ivakasala vinaka duadua. (Same 100:3; 104:24) Ia e sega ni vakasaurarataki keda meda muria na nona ivakatagedegede.

O Jiova e vakarautaka vei Atama kei Ivi na ka kece me rau marautaka kina na bula. (Vakatekivu 1:28, 29; 2:8, 15) E solia tale ga vei rau na ivakaro rawarawa qai vinakata me rau muria. Ia e solia vei rau na galala ni vakatulewa me rau digia me rau muria qori se sega. (Vakatekivu 2:9, 16, 17) Ka ni rarawa ni rau digia me rau muria ga na ka rau vinakata, rau sega ni via muria na ivakatagedegede ni Kalou. (Vakatekivu 3:6) Na cava kena itinitini? Vakacava e vinaka cake na bula ni kawatamata nida lewa ga na ka e donu kei na ka e cala? Sega. E vakadinadinataki ena veigauna sa oti, ni vakilai ga na rarawa kei na leqa ni sega ni muri na ivakatagedegede ni Kalou.—Dauvunau 8:9.

E vakarautaka na iVolatabu na idusidusi ena vukei keda meda vakatulewa vakayalomatua se mani vacava na noda isususu. (2 Timoci 3:16, 17; raica na kato “E Noda iVola Kece.”) Dikeva mada na kena ivakaraitaki.

Vulica na vuna e vakatokai kina na iVolatabu me “vosa . . . ni Kalou.”—1 Cesalonaika 2:13. Sarava ena jw.org na vidio, O Cei e Vakavuna na iVolatabu?

CAVA ERA SEGA NI NUITAKA KINA NA IVOLATABU ESO?

Era kaya ni sega ni idusidusi vinaka na iVolatabu. De dua qo eso na ka era kaya.

Era kaya: “E veisaqasaqa na ka e tukuna na iVolatabu.”

Kena dina: Eso na ka e volai ena iVolatabu ena rairai nanumi ni veicalati. Ia ni o dikeva na sala kei na gauna e volai kina, o na raica ni donu vinaka na ka e vakamacalataki kina.

Mo raica eso tale na kena ivakaraitaki, wilika ena jw.org na ulutaga “E Veisaqasaqa na ka e Volai ena iVolatabu?”

Era kaya: “O ira mada ga era kaya nira muria tiko na iVolatabu era cakava tiko na veika ca. E sega gona ni vinaka na kena veidusimaki.”

Kena dina: Me kua ni beitaki na iVolatabu ena nodra itovo ca o ira na sega ni muria na kena ivakavuvuli. Sa parofisaitaka tu na iVolatabu ni levu era na kaya nira muria na iVolatabu ia era cakava na kena veibasai, wili kina o ira na italatala ni lotu. Cava na kena itinitini? E kaya na iVolatabu ni na “vosavakacacataki” kina na ivakavuvuli vakaivolatabu.—2 Pita 2:1, 2.

Mo raica e dua na ivakaraitaki ni nodra sega ni muria e levu na iliuliu ni lotu na iVolatabu, wilika ena jw.org na ulutaga “E Dodonu me Caka Bisinisi o Lotu?”

Era kaya: “Na iVolatabu e uqeta na nodra cati o ira e duatani nodra itovo kei na rai.”

Kena dina: E uqeti keda na iVolatabu meda dokai ira eso tale. E vakacala na noda. . .

vakalevulevui keda vei ira eso tale. —Filipai 2:3.
beci ira e duatani na nodra rai se vakabauta.—1 Pita 2:17.
usuraka noda rai vei ira eso tale.—Maciu 10:14.

E kaya na iVolatabu ni Kalou e sega ni dau veivakaduiduitaki, e vinakata tale ga meda vakatotomuri koya.—Roma 9:14.

Mo kila eso tale na ka, wilika ena jw.org na ulutaga “E Vukei Keda Vakacava na iVolatabu Meda Yalorawarawa?”

VAKARAITAKA NA IVOLATABU NA VEIDUSIMAKI NI KALOU

E tukuni ena iVolatabu na veika e dau cakava o Jiova vei keda na kawatamata mai na ivakatekivu. Nida wilika eda na rawa ni kila kina na nona rai me baleta na ka e donu kei na ka e cala, na ka e yaga kei na ka e veivakaleqai. (Same 19:7, 11) Eda vulica tale ga kina na ivakavuvuli e yaga tawamudu, ena vukei keda meda vakatulewataka vakayalomatua na noda bula ni veisiga.

Kena ivakaraitaki, dikeva na ivakasala ena Vosa Vakaibalebale 13:20: “O koya e vakailala kei ira na vuku ena vuku, ia o koya e veitokani kei ira na lialia ena tini ca.” E yaga na ivakavuvuli qori ena gauna makawa, e yaga tale ga vei keda nikua. E tu ena iVolatabu e levu tale na ivakavuvuli yaga va qori.—Raica na kato “Yaga tu ga na iVakasala ena iVolatabu.”

Ia de dua o na via kila, ‘Au na vakadeitaka vakacava ni na yaga vei au na ivakasala ena iVolatabu?’ Ena vakamacalataki ena ulutaga e tarava eso na italanoa dina.

a Na yaca ni Kalou o Jiova.—Same 83:18.

YAGA TU GA NA IVAKASALA ENA IVOLATABU

E volai na iVolatabu ena rauta ni 2,000 na yabaki sa oti, ia e se yaga tiko ga vei keda nikua. Eda dau vinakata meda marau, me vinaka tale ga na noda bula. (Dauvunau 1:9) Na ivakasala vuku e tu ena iVolatabu ena vukei keda meda rawata qori.

Daudina

“Keitou vinakata me keitou dina ena ka kece.”—Iperiu 13:18.
“Me muduka nona butako o koya e butako tiko, me cakacaka ga vakaukaua.”—Efeso 4:28.

Noda Veimaliwai

“Me kua ni dua e qara tiko ga na ka e yaga ga vua, me qara tale ga na ka e yaga vei ira tale eso.”—1 Korinica 10:24.
“Moni dau yalorawarawa, ni dau veivosoti tale ga vakarawarawa.”—Kolosa 3:13.

Nida Vakatulewa

“Na tamata yalowai e vakabauta na vosa kece, ia o koya e yalomatua e vakasamataka na nona ilakolako kece.”—Vosa Vakaibalebale 14:15.
“O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.”—Vosa Vakaibalebale 22:3.