iDusidusi Nuitaki ena Dei Kina Nomu Veigauna se Bera Mai

Me vaka e vakamacalataki ena ulutaga sa oti, eso era vakanuinui ina kaukaua vuni, vuli, iyau kei na itovo vinaka me dei kina nodra veisiga ni mataka. Qori e vaka ga era lako tiko ena dua na vanua, ia e cala tu na nodra mape. Kena ibalebale, sa sega sara ga na idusidusi nuitaki me baleta na veigauna se bera mai? Sega!

IDUSIDUSI VINAKA MAI VEI KOYA E CECERE DUADUA

Ni bera nida vakatulewa, eda dau qara nodra veivuke o ira era qase cake, era vuku tale ga. Me va tale ga qori noda qara na ivakasala nuitaki me baleta na veigauna e se bera mai. Eda rawa ni wilika nona ivakasala e dua a bula dede sara vei keda qai vuku duadua. E volai qori ena dua na ivola ena 3,500 na yabaki sa oti. E vakatokai na iVolatabu.

Na cava mo nuitaka kina na iVolatabu? Ni o koya e vakavuna na kena volai e qase cake sara vei keda, qai vuku duadua e lomalagi kei na vuravura. E tukuni ni o koya e “dede sara nona bula,” qai “bula mai na gauna tawamudu ina gauna tawamudu.” (Taniela 7:9; Same 90:2) O koya e “bulia na lomalagi, na Kalou dina, o koya e bulia na vuravura.” (Aisea 45:18) E tukuna vei keda ni yacana o Jiova.—Same 83:18.

E buli keda na Dauveibuli e sega ni dau veitovaki se veivakaduiduitaki. E vakavuna tale ga na iVolatabu, qai yaga na nona ivakasala vei ira na tamata kece e veiyasa i vuravura. Sa vakadewataki ena levu na vosa na iVolatabu, qai veisoliyaki vakalevu duadua.a E rawa kina vei ira na tamata e veiyasa i vuravura mera wilika qai dusimaki kina. Sa rauta me tukuni ena iVolatabu:

“E sega ni dauveivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”—CAKACAKA 10:34, 35.

Me vaka ga e dua na itubutubu dauloloma e dusimaki ratou na luvena, e vukei keda tale ga na tamada dauloloma na Kalou o Jiova ni vakarautaka nona vosa na iVolatabu. (2 Timoci 3:16) O rawa ni nuitaka nona vosa ni buli keda qai kila vinaka na ka ena vakamarautaki keda.

IDUSIDUSI NUITAKI

Eda rawa ni nuitaka na ka e kaya na iVolatabu me baleta na veigauna se bera mai. Sa yaco sara tu ga nikua na veika e parofisaitaki kina ena 2,000 na yabaki sa oti, me baleta na ka e yaco tu e vuravura kei na itovo ni tamata.

KA E YACO TU E VURAVURA

“Era na veivaluvaluti na veivanua kei na veimatanitu. Ena yaco na uneune kaukaua ena levu na vanua, ena tatara na leqa ni kakana kei na matedewa ena levu na vanua.”—LUKE 21:10, 11.

ITOVO NI TAMATA

“Ia mo kila qo ni na duatani sara na iotioti ni veisiga, ena vakilai kina e levu na veika dredre. Nira na daulomani ira ga na tamata, era na lomana na ilavo, era na dautukutukuni ira, era na qaciqacia era na dauveibeci, era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali na veilomani vakaveiwekani, era na sega ni via okati ena dua na veiyalayalati, era na dau vakauvosa, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veiliumuritaki, era na domoqa, era na dokadoka, era na lomana ga na marau era sega ni lomana na Kalou.”—2 TIMOCI 3:1-4.

E rawa ni donu vakacava na ka e kaya na iVolatabu me baleta na veika sa yaco tu nikua? O na duavata sara ga kei na ka e tukuna o Leone mai Ogo Kogo: “Sa volai makawa tu mai na parofisai qori. E sega ni rawa vua e dua na tamata me parofisaitaka donu na veika sa yaco tu nikua. Kena ibalebale, ni vakavuna na iVolatabu e dua e vuku cake sara mai vei keda.”

Sa vakayacori e levu na parofisai e tu ena iVolatabu.b Qori e vakadinadinataka ni vosa ga ni Kalou na iVolatabu. “O yau ga na Kalou e sega ni dua e vakataki au, mai na ivakatekivu au tukuna na kena itinitini.” (Aisea 46: 9, 10). E tiko gona na vuna vinaka o rawa ni nuitaka kina na ka e kaya na iVolatabu, me baleta na veigauna se bera mai.

IVAKASALA ENA YAGA VEI IKO NIKUA ME TAWAMUDU

O na vakila na yaga ni nomu muria na ivakasala e volai ena iVolatabu. Raica mada qo eso na kena ivakaraitaki.

RAI DONU ME BALETA NA CAKACAKA KEI NA ILAVO

“E vinaka me sinai e dua na liga ena vakacegu, e ca ni sinai ruarua na liga ena cakacaka kaukaua qai tautauvata kei na cemuria na cagi.”—DAUVUNAU 4:6.

BULA VAKAVUVALE

‘O kemuni na tagane moni lomana tale ga na dui watimuni me vaka ga nomuni lomani kemuni, ia na yalewa me dokai watina vakalevu.’—EFESO 5:33.

VEIYALONI KEI IRA ESO TALE

“Mo biuta na cudru qai vakanadakuya na katakata, kua ni rarawa qai goleva na caka ca.”—SAME 37:8.

Ena yaga vei iko nikua kei na veigauna se bera mai, nomu muria na ivakavuvuli vakaivolatabu. Eda na raica ena iVolatabu na yalayala totoka ni Kalou me baleta na veigauna se bera mai me vaka na

VAKACEGU KEI NA SAUTU

“Era na kunea na marau vakasakiti ena levu ni vakacegu.”—SAME 37:11.

VALE KEI NA KAKANA ME BALETI KEDA KECE

“Era na tara vale era na tiko kina, era na tea na loganivaini era na kania na vuana.”—AISEA 65:21.

SEGA NA TAUVIMATE KEI NA MATE

“Sa na sega tale na mate, na lolosi, na tagiyaso, kei na mosi.”—VAKATAKILA 21:4.

Cava mo cakava mo vakila kina na veivakalougatataki qori? Raica na kena isau ena ulutaga e tarava.

a Na kena vakadewataki kei na kena veisoliyaki na iVolatabu, gole ina www.jw.org rai ena IVAKAVUVULI VAKAIVOLATABU > ITUKUTUKU MAKAWA & IVOLATABU.

b Mo kila e levu tale na ka, raica na wase 9 ni vola The Bible—God’s Word or Man’s? tabaka na iVakadinadina i Jiova. Sa tu tale ga ena neimami website na www.jw.org. Rai ena KA E VAKARAUTAKI > IVOLA & BROCHURE.