‘Muri Jisu Tiko ga’ ni o Papitaiso Oti

1-2. Na veivakalougatataki cava ena marautaka o koya e papitaiso?

E DUA dina na ka marautaki na noda papitaiso meda lewena na vuvale i Jiova. E ka dokai, eda duavata tale ga kei na daunisame o Tevita ni kaya: “E marau o koya oni digia [Jiova] qai kauta voleka mai me mai tiko ena nomuni lomanibai.”—Same 65:4.

² O Jiova e digitaki ira vinaka na lako yani ena nona lomanibai. Me vaka eda sa veivosakitaka ena ulutaga sa oti, ena volekati ira ga era saga mera veiwekani kei koya. (Jeme. 4:8) Ni o yalataki iko vei Jiova qai papitaiso, o na volekati Jiova ena sala e veivakurabuitaki. O rawa ni nuidei ni oti qori ena ‘sova yani vei iko na veivakalougatataki mo kua ni leqa ena dua na ka.’—Mala. 3:10; Jere. 17:7, 8.

3. Na cava na nodra itavi bibi na lotu vaKarisito era yalayala oti qai na papitaiso? (Dauvunau 5:4, 5)

³ Na papitaiso e itekitekivu ga ni nomu qaravi Jiova. Ni o sa papitaiso, o na vinakata mo saga ena nomu vinaka kece mo dina tiko ga ena nomu yalayala kevaka mada ga o temaki se vakatovolei na nomu vakabauta. (Wilika Dauvunau 5:4, 5.) Ni o tisaipeli i Jisu o na solia sara na nomu vinaka taucoko mo vakatotomuri Jisu kei na nona ivakaro. (Maciu 28:19, 20; 1 Pita 2:21) Ena vukei iko na ulutaga qo mo cakava qori.

‘MURI JISU TIKO GA’ NI O VAKATOVOLEI SE TEMAKI

4. Ena sala cava era colata kina na “kaunirarawa” na tisaipeli i Jisu? (Luke 9:23)

⁴ Ni o papitaiso oti ena sega ni rawarawa na nomu bula. E vakamatatataka o Jisu nira na colata tiko na nona tisaipeli na nodra “kaunirarawa.” Era na cakava tiko qori e “veisiga.” (Wilika Luke 9:23.) Vakacava e tukuna tiko o Jisu nira na sotava tiko ga na veika rarawa na nona imuri? Sega. E vakabibitaka tiko ga nira na vakalougatataki, ia era na sotava tale ga eso na ituvaki dredre. Eso na ituvaki qori ena mosimosi sara.—2 Tim. 3:12.

5. Na veivakalougatataki cava e yalataka o Jisu vei ira na vakuai ira?

⁵ De dua era dau tusaqati iko na lewe ni nomu vuvale, se o rairai vakuai iko ena so na sasaga vakayago mo vakaliuca ga na Matanitu ni Kalou. (Maciu 6:33) Ni o cakava qori, mo nuidei ni o Jiova e kila vinaka tiko na nomu cakacaka ena yalodina. (Iper. 6:10) O na rairai vakadinadinataka na dina ni vosa i Jisu, ya ni “sega ni dua e biuta na vale se tacina se ganena se tamana se tinana se luvena se tikiniqele ena yacaqu kei na itukutuku vinaka me na sega ni soli vua e 100 vakacaca ena gauna qo—na vale, na tacina, na ganena, na tinana, na luvena, na tikiniqele, na veivakararawataki—ena bula tawamudu ena gauna se bera mai.” (Mari. 10:29, 30) Na veika o vakalougatataki kina qori e uasivia na veika o vakuai iko kina.—Same 37:4.

6. Na cava e vinakati kina mo valuta tiko ga na “gagadre ni yago” ni o papitaiso oti?

⁶ Ni o papitaiso oti, ena vinakati tiko ga mo valuta “na gagadre ni yago.” (1 Joni 2:16) Na vuna? Eda se kawa ivalavala ca tiko ga i Atama. De dua na nomu rai ena vaka sara ga na yapositolo o Paula ena so na gauna. E vola: “E vu dina mai lomaqu noqu marautaka na lawa ni Kalou, au qai raica ni dua tale na lawa e tiko ena yagoqu e veivala tiko kei na lawa ni noqu vakasama qai vakabobulataki au ina lawa ni ivalavala ca e tiko e yagoqu.” (Roma 7:22, 23) O na rairai yalolailai ni o saga tiko mo valuta na gagadre ca. Ia ni o vakasamataka na ka o tukuna vei Jiova ni o yalataki iko vua, ena uqeti iko sara ga mo vorata na veitemaki. Na nomu yalayala qori ena vukei iko ni o temaki. Ena sala cava?

7. E yaga vakacava na nomu yalataki iko vei Jiova mo yalodina tiko ga vua?

⁷ Ni o yalataki iko vei Jiova o sa na sega tale ni lewai iko tiko. Kena ibalebale o sa na cata na gagadre vakayago kei na isausau e vakacudrui Jiova. (Maciu 16:24) Ni o vakatovolei gona o na sega ni qai vakasamataka tale tiko na ka mo cakava. O sa vakatulewataka oti mo yalodina vei Jiova. O na vakadeitaka mo na vakamarautaki koya. O na vakataki Jope sara ga. Sa bau dredre dina na ka e sotava, ia qo na ka e vakadeitaka: “Au na sega ni soro ena noqu yalodina!”—Jope 27:5.

8. E yaga vakacava na nomu vakasamataka na nomu masu ni yalayala mo valuta kina na veitemaki?

⁸ Ni o vakasamataka nomu masu ni yalayala vei Jiova, ena yaga qori mo valuta na veitemaki. Me kena ivakaraitaki, vakacava o na wedeva na watina e dua tale? Sega sara ga! O sa yalataka oti ni o na sega ni cakava qori. Na nomu cakava qori ena sega kina ni vakawakana e lomamu na gagadre ca, oti mo qai leqataka tiko mo cavuraka vakacava. E bibi mo “gole tani” mai na “nodra sala na ivalavala ca.”—Vkai. 4:14, 15.

9. E yaga vakacava nomu vakasamataka nomu masu ni yalayala mo vakaliuca kina na veika vakayalo?

⁹ Vakacava ke tukuni vei iko e dua na cakacaka ena vakaleqa nomu dau tiko ena soqoni? O na kila vinaka sara ga na ka mo cakava. Ni bera mada ga ni tukuni vei iko na cakacaka qori, o sa vakatulewataka oti ni o na sega ni vakadonuya. O na sega gona ni vakadonuya e dua na cakacaka, oti mo qai saga tale tiko mo vakaliuci Jiova. Na nomu vakasamataka na ivakaraitaki i Jisu ena nona vakamarautaki Tamana, ena totolo ga na nomu vakatulewataka mo cata na ka kece e vakararawataka na Kalou o yalayala vua.—Maciu 4:10; Joni 8:29.

10. Ena vukei iko vakacava o Jiova ni o papitaiso mo ‘muri Jisu tiko ga’?

¹⁰ Na veivakatovolei kei na veitemaki e gauna vinaka mo vakaraitaka kina ni o vinakata mo ‘muri Jisu tiko ga.’ Ni o cakava qori, mo nuidei ni na vukei iko o Jiova. E kaya na iVolatabu: “E dau dina na Kalou ena nona vosa, oya ni na sega ni vakalaiva moni sotava na ka ni veivakatovolei oni na sega ni taqea rawa. Ni oni vakatovolei, ena vakarautaka tale ga na sala moni vosota rawa kina.”—1 Kor. 10:13.

SALA MO MURI JISU TIKO GA KINA

11. Na cava e dua na sala o rawa ni muri Jisu tiko ga kina? (Raica tale ga na iyaloyalo.)

¹¹ E dau gugumatua o Jisu, e volekati Jiova tiko ga ena nona dau masu. (Luke 6:12) E dua na sala vinaka mo muri Jisu tiko ga kina ni o papitaiso oti, ya me nomu ivakarau ni bula mo dau volekati Jiova. E kaya na iVolatabu: “Se mani toso cava eda sa cakava, meda toso tiko ga i liu ena ivakarau vata ga qori.” (Fpai. 3:16) Eso na gauna o na rogoca na nodra ivakaraitaki na tacida era vakarabailevutaka na nodra veiqaravi tabu. De dua era vuli ena Koronivuli ni iTalatala ni Matanitu se ra toki ina vanua e vinakati kina vakalevu na dautukutuku. Ke rawa ni nomu isausau qori, mo cakava sara. Era vinakata na tamata i Jiova mera vakarabailevutaka na nodra cakacaka vakaitalatala. (Caka. 16:9) Ia vakacava ke o sega ni cakava rawa qori ena gauna qo? Kua ni nanuma ni sega na kemu yaga. Nida lotu vaKarisito e vinakati meda dau vosota. (Maciu 10:22) Kua ni guilecava na yaga ni nomu qaravi Jiova, ni na vakatau tiko qori ena ka o rawa ni cakava kei na kemu ituvaki. Qori e dua na sala o na muri Jisu tiko ga kina ni oti na nomu papitaiso.—Same 26:1.

12-13. Na cava mo cakava ke o sa sega ni gumatua me vaka e liu? (1 Korinica 9:16, 17) (Raica tale ga na kato “Cici Tiko Ga.”)

¹² Vakacava ke dua na gauna o nanuma ni o sa sega ni masu tiko mai vu ni lomamu se o sega ni taleitaka na cakacaka vakaitalatala? Vakacava ke o sa sega tale ga ni taleitaka na wili iVolatabu me vaka e liu? Ni yaco na ituvaki qori ni o papitaiso oti, kua ni nanuma ni sega ni vukei iko tiko na yalo tabu i Jiova. Ni o kawa ivalavala ca e dau veiveisau na ivakarau ni lomamu. Ke o sa sega ni gumatua tiko me vaka e liu, ena vinaka mo vakasamataka na nona ivakaraitaki na yapositolo o Paula. E saga me vakatotomuri Jisu, ia e kila ni so na gauna e sega ni dau gumatua sara. (Wilika 1 Korinica 9:16, 17.) E kaya: “Keu cakava ena voraki, au se vakayacora tiko ga na itavi e nuitaki vei au.” E gumatua o Paula me vakayacora na nona cakacaka vakaitalatala, ia e sega ni vakatau tiko ena ivakarau ni lomana ena gauna ya.

¹³ Me kua tale ga ni vakatau na nomu vakatulewa ena ivakarau ni lomamu. Mo vakadeitaka mo dau cakava na ka e dodonu, ke sega mada ga ni lomamu qori. Ke o cakava tiko ga na ka dodonu, yaco ga na gauna sa na veisau na lomamu mo via cakava tu ga qori. Se mani cava o cakava, saga mo dei ena dua na ituvatuva vinaka vakayalo, o na muri Jisu tiko ga kina ni oti nomu papitaiso. Ena uqeti ira tale ga na mataveitacini nodra raica nomu dei tiko ga.—1 Ces. 5:11.

‘DIKEVI IKO TIKO GA VAKADEITAKA SE O CEI DINA O IKO’

14. Na cava mo dikeva wasoma? Na vuna? (2 Korinica 13:5)

¹⁴ E yaga tale ga ena nomu papitaiso oti nomu dau dikevi iko wasoma. (Wilika 2 Korinica 13:5.) Me tiko na gauna mo dikevi iko kina kei na ka o cakava mo kila ke o sa dau masu wasoma tiko, wili iVolatabu, o vulica tale ga, tiko ena soqoni kei na nomu vakaitavi ena cakacaka vakaitalatala. Saga mo dau qara na sala me vakainaki kina na nomu veiqaravi vei Jiova. Me kena ivakaraitaki, mo dau taroga na taro va qo: ‘Au rawa ni vakamacalataka na taro rawarawa vakaivolatabu? E tiko na sala meu taleitaka kina vakalevu na cakacaka vakaitalatala? Vakacava na ka au dau masulaka, e laurai kina niu nuitaki Jiova? Au dau tiko wasoma ena soqoni vaKarisito? Au dau vakavinakataka vakacava na noqu vakaitavi kei na vakarorogo ena soqoni?’

15-16. Na cava o vulica ena ka e cakava e dua na tacida ni temaki?

¹⁵ E vinaka tale ga mo dikeva nomu malumalumu. Qori sara ga na ka e cakava o Robert ena dua na ituvaki e sotava: “Au cakacaka vagauna niu se qai yabaki 20. Ni oti na cakacaka ena dua na siga, e sureti au e dua na yalewa meu tomani koya ina nona vale. E kaya ni keirau na lai tiko taurua ga, e nona inaki tiko me keirau na ‘moce vata.’ Au tukuna mada vua e vica na iulubale lokiloki, oti au sa qai tukuna vua na sega, au vakamacalataka tale ga na vuna.” E vinaka nona sega ni rawai o Robert ena veitemaki qori, ia ni dikeva tale na veika e yaco, e raica ni rawa ni vakavinakataki. E kaya: “A dodonu meu vukitotolo me vakataki Josefa ni sega ni vakadonuya na nona veisureti na wati Potifa me vorata kina na nona veitemaki. (Vkte. 39:7-9) Au kidroa ni vaka me dredre noqu cakava qori. E vukei au na ka e yaco qo meu vaqaqacotaka na noqu veiwekani kei Jiova.”

¹⁶ Ena yaga tale ga mo dikevi iko me vakataki Robert. Kevaka mada ga o vorata na veitemaki, o se rawa tiko ga ni taroga qo, ‘Vakacava na dede ni noqu wawa tiko meu qai tukuna na sega?’ Ke o kila ni tiko na ka mo vakavinakataka, kua ni yalolailai. Mo marau ni o sa kila tiko na nomu malumalumu. Mo dau masulaka qai cakava na ka ena vukei iko mo muria kina na ivakatagedegede ni itovo savasava i Jiova.—Same 139:23, 24.

17. E dokai vakacava na yaca i Jiova ena ivakaraitaki nei Robert?

¹⁷ Eso tale na ka eda vulica ena ivakaraitaki i Robert. E vakamacalataka: “Niu sega ni vakadonuya nona veisureti na yalewa keirau cakacaka vata, e kaya: “Pasi sara ga o iko!” Au mani taroga se cava e vakaibalebaletaka. E kaya ni dua nona itokani a iVakadinadina i Jiova tu e liu, e tukuna vua nira sega dau yalodina na itabagone kece era iVakadinadina i Jiova, era cakava lo tiko na ka ca. E tukuna sara vua na nona itokani ni na mai vakatovolei au. Au marau sara ga ni ka au cakava e dokai kina na yaca i Jiova.”

18. Na cava mo vakadeitaka mo cakava ni o papitaiso oti? (Raica tale ga na kato “Ulutaga o na Marautaka.”)

¹⁸ Ni o yalayala vei Jiova qai papitaiso, o sa vakarokorokotaka tiko na yacana se mani cava e yaco. O nuidei ni kila vinaka tu o Jiova na veika o dau vakatovolei kina kei na veitemaki o vorata. Ena vakalougatataka na nomu sasaga mo yalodina tiko ga. Mo nuidei tale ga ni na vakaukauataki iko mo cakava qori ena veivuke ni yalona tabu. (Luke 11:11-13) Ena veivuke i Jiova, o na muria tiko ga kina na ivakaraitaki i Jisu ni oti na nomu papitaiso.