ULUTAGA NI VULI 26
SERE 123 Yalodina ina Veiliutaki vaKalou
Mo Yalomalumalumu ni o Sega ni Kila Eso na Ka
“Eda sega ni kilai koya rawa e Kaukaua Duadua.”—JOPE 37:23.
KA E VAKABIBITAKI
Ke da sega mada ga ni kila na ka kece ena yaco, eda na yalomalumalumu tiko ga nida kauaitaka ga na ka eda kila qai nuitaki Jiova vakatabakidua.
1. Ni buli keda o Jiova, cava eda rawa ni cakava? Na vuna?
E BULI keda o Jiova meda rawa ni vakasama, meda vulica eso na ka vou, meda kila na kena ibalebale qai muria sara. Cava e buli keda kina va qori? E vinakata meda ‘kila na ka e baleti koya,’ meda qaravi koya tale ga nida vakayagataka noda vakasama kei na yalomatua.—Vkai. 2:1-5; Roma 12:1.
2. (a) E vakacava na levu ni ka eda kila? (Jope 37:23, 24) (Raica tale ga na iyaloyalo.) (b) Cava eda vulica kina?
2 Eda buli meda rawa ni vulica e levu na ka, ia e vakaiyalayala ga na noda kila. (Wilika Jope 37:23, 24.) Dikeva na ivakaraitaki nei Jope. E tarogi koya o Jiova ena levu na taro me kilai kina na levu ni ka e sega tu ni kila. E vulica kina o Jope me yalomalumalumu qai veisautaka nona rai. (Jope 42:3-6) Eda vulica tale ga nida sega ni kila e levu sara na ka. Na yalomalumalumu va qori ena uqeti keda meda nuitaki Jiova me vakatakila mai na ka e bibi meda kila, me rawa nida vakatulewa vinaka kina.—Vkai. 2:6.
Me vakataki Jope, ena yaga vei keda noda ciqoma ni lailai na ka eda kila (Raica na parakaravu 2)
3. Na cava eda na veivosakitaka ena ulutaga qo?
3 Eda na veivosakitaka ena ulutaga qo eso na ka eda sega ni kila kei na vuna e dredre kina ena so na gauna. Eda na veivosakitaka tale ga na vuna e vinaka kina meda kua ni kila eso na ka. Nida veivosakitaka qori, eda na nuitaki Jiova kina vakalevu ni “uasivi na ka e kila,” ena tukuna vei keda na ka e bibi meda kila.—Jope 37:16.
EDA SEGA NI KILA NA GAUNA ENA RUSA KINA NA ITUVAKI CA QO
4. Me vaka e tukuni ena Maciu 24:36, na cava e dua na ka eda sega ni kila?
4 Wilika Maciu 24:36. Eda sega ni kila na gauna ena vakarusai kina na ituvaki ca ni vuravura qo. Ni se tiko mada ga e vuravura o Jisu, e sega ni kila “na siga ya kei na kena aua.”a Toso na gauna e qai tukuna vei ratou nona yapositolo ni o Jiova ga na Kalou ni Gauna, e kila na gauna me yaco kina eso na ka ena “nona lewa.” (Caka. 1:6, 7) Sa lokuca oti tu o Jiova na gauna me na vakarusai kina na ituvaki qo, ia eda sega ni rawa ni kila na kena tikinisiga.
5. Nida sega ni kila na gauna ena rusa kina na ituvaki qo, na cava eda na rairai cakava?
5 Me salavata kei na ka e tukuna o Jisu, eda sega ni kila ena vakacava na dede ni noda waraka tiko me vakarusai na ituvaki ca qo. De dua eda na yalolailai se sega ni vosovoso, vakabibi ni sa dede noda waraka tiko na siga i Jiova. Se dredre meda vosota nodra veivakalialiai na lewenivuvale se so tale. (2 Pita 3:3, 4) Eda na rairai nanuma ke da kila na tikinisiga ena rusa kina na ituvaki qo, ena rawarawa meda vosovoso, meda vosota tale ga na veivakalialiai.
6. Na cava e vinaka kina meda kua ni kila na siga ena vakarusai kina na ituvaki qo?
6 Ni sega ni tukuna vei keda o Jiova na tikinisiga ena vakarusa kina na ituvaki ca qo, eda na qaravi koya tiko ni yavutaki ena noda lomani koya kei na noda nuitaki koya. Eda vinakata meda qaravi Jiova me tawamudu, sega ni yacova ga na gauna ena rusa kina na ituvaki qo. Meda kua ni kauaitaka tiko ga “na siga i Jiova,” e vinaka meda vakasamataka na veika ena rawati ni sa oti na siga qori. Nida cakava qori, eda na toro volekati Jiova tiko ga, eda na nuitaki koya qai saga ena noda vinaka meda vakamarautaki koya.—2 Pita 3:11, 12.
7. Na cava eda kila?
7 E bibi meda kauaitaka ga na ka eda kila, ya ni tekivu na iotioti ni veisiga ena 1914. E vakarautaka o Jiova na parofisai vakaivolatabu eda kila kina ni tekivu na yabaki qori na iotioti ni veisiga. E tukuna tale ga vakamatata na ituvaki ni vuravura me tekivu mai na gauna qori. Oya na vuna eda vakabauta kina ni “sa voleka na siga levu i Jiova.” (Sefa. 1:14) Kena ikuri, eda kila na cakacaka e vinakata o Jiova meda cakava, ya meda tukuna yani “na itukutuku vinaka . . . ni Matanitu ni Kalou” vei ira e levu. (Maciu 24:14) Sa kacivaki tiko na itukutuku qori ena rauta ni 240 na vanua, kei na sivia ni 1,000 na vosa. E sega ni bibi sara meda kila “na siga ya kei na kena aua” meda qai gumatua ena vunau.
EDA SEGA NI KILA NA KA ENA CAKAVA O JIOVA
8. Na cava e vakaibalebaletaka “na cakacaka ni Kalou dina”? (Dauvunau 11:5)
8 Eda na sega tu ga ni kila rawa “na cakacaka ni Kalou dina.” (Wilika Dauvunau 11:5.) Na matavosa qori e vakaibalebaletaka na ka e vakavuna o Jiova me yaco se vakatara me vakayacori kina nona inaki. Eda sega ni kila na vuna e vakatara kina o Jiova eso na ka me yaco se na sala ena yavala kina ena vukuda. (Same 37:5) E dredre toka meda kila qori me vaka ga noda sega ni kila vinaka nona tubu e dua na gone e kete i tinana, qori na ka era saga tiko ga na saenitisi mera kila vinaka.
9. Nida sega ni kila na sala ena yavala kina o Jiova, cava e rawa ni vakavuna?
9 Nida sega ni kila na sala ena yavala kina o Jiova ena vukuda, e rawa ni vakavuna meda lomalomarua. Kena ivakaraitaki, eda na rairai lomalomarua meda vakarabailevutaka noda cakacaka vakaitalatala, bula rawarawa se toki ena vanua e vinakati kina vakalevu na dautukutuku. Se da na lomatarotarotaka ke vakadonuya tiko o Jiova noda veiqaravi nida sega ni rawata noda isausau vakayalo, e sega ni vuavuaivinaka sara noda cakacaka vakaitalatala, se sotava eso na ituvaki dredre ena noda ilesilesi ena isoqosoqo.
10. Na itovo cava eda na vakaraitaka nida sega ni kila na ka ena cakava o Jiova?
10 Noda sega ni kila na ka ena cakava o Jiova, eda na rawa ni vakaraitaka kina eso na itovo bibi me vaka na yalomalumalumu. Eda vulica kina ni vakanananu kei na ivalavala i Jiova e cecere sara vei keda. (Aisea 55:8, 9) Eda vulica tale ga meda nuitaki Jiova vakatabakidua ni kila vinaka na ka kece. Ni vuavuaivinaka noda cakacaka vakaitalatala se toso vinaka e dua na itavi eda qarava ena isoqosoqo, eda na vakalagilagi Jiova ga. (Same 127:1; 1 Kor. 3:7) Ke sega ni yaco na ka eda namaka, meda nanuma tiko ni o Jiova e kila na ka kece. (Aisea 26:12) Eda na cakava ga na noda itavi, eda nuitaka tale ga ni na cakava o Jiova na nona itavi. Eda nuidei ni na dusimaki keda, ke sega mada ga ni cakava vakacakamana me vaka ena so na gauna sa oti.—Caka. 16:6-10.
11. Na ka bibi cava eda kila?
11 E bibi meda kila ni o Jiova e dauloloma, e lewadodonu, e vuku tale ga, meda dau vakasamataka qori. Eda kila ni mareqeta vakalevu na ka eda cakava vua, vei ira tale ga na mataveitacini. Kena ikuri, eda kila ni o Jiova ena dau vakaicovitaki ira na yalodina vua.—Iper. 11:6.
EDA SEGA NI KILA NA KA ENA YACO NIMATAKA
12. Me vaka e tukuni ena Jemesa 4:13, 14, na cava eda sega ni kila?
12 Wilika Jemesa 4:13, 14. Meda nanuma tiko nida sega ni kila na ka ena yaco ena noda bula nimataka. Ena vuravura qo, e dau yaco “na gauna kei na ka e sega ni namaki.” (Dauv. 9:11) Eda na sega gona ni kila ke na yaco dina na ka eda lalawataka tu, se da na bula tiko meda raica na kena vakayacori.
13. Na cava e rawa ni yacovi keda nida sega ni kila na siga nimataka?
13 Noda sega ni kila na ka ena yaco nimataka, ena rawa ni vakadredretaka meda vosota. Ena sala cava? De dua eda na lomaleqataka na ka ena rawa ni yaco, eda na sega kina ni marau. Nida sega ni namaka na kena yaco vakasauri e dua na ituvaki, eda na cudru, eda na rarawa tale ga. Kena ikuri, ni sega ni yaco na ka eda namaka, eda na yalolailai, eda na rarawa tale ga.—Vkai. 13:12.
14. E vakatau ena cava noda rawata na marau dina? (Raica tale ga na iyaloyalo.)
14 Nida vosota na ituvaki dredre, eda vakaraitaka tiko se ituvaki cava ga e yaco, eda qarava na Tamada vakalomalagi nida lomani koya, sega ni ka vinaka ga eda rawata kina. Eda vulica ena so na ivakaraitaki vakaivolatabu, meda kua ni namaka me taqomaki keda o Jiova ena ituvaki dredre kece, se sa lewa oti tu na ka ena yaco ena noda bula. E kila o Jiova ni sega ni vakatau noda marau ena noda kila na ka ena yacovi keda ena gauna se bera mai. Ia e vakatau ena noda qara nona veidusimaki qai muria sara. (Jere. 10:23) Nida rai vua nida vakatulewa, e vaka ga eda kaya tiko: “Ke inaki i Jiova eda na bula, eda na cakava qo se cakava ya.”—Jeme. 4:15.
Nida qara na veidusimaki i Jiova qai muria, eda na taqomaki kina (Raica na parakaravu 14-15)b
15. Na cava eda kila me baleta na gauna se bera mai?
15 Eda sega ni kila na ka ena yaco nimataka, ia eda kila ga ni yalataka o Jiova na bula tawamudu i lomalagi se vuravura. Eda kila ni sega ni lasu rawa, ena sega tale ga ni dua ka me tarova na vakayacori ni nona vosa ni yalayala kece. (Taito 1:2) O koya duadua ga e “tukuna na kena itinitini, mai na gauna makawa [e] tukuna na ka se bera ni yaco.” A cakava qori ena gauna sa oti, ena cakava tale ga ena gauna se bera mai. (Aisea 46:10) Eda vakadeitaka ni sega ni dua na ka e tarova nona lomani keda o Jiova. (Roma 8:35-39) Ena solia vei keda na vuku, na kaukaua, ena vakacegui keda tale ga meda vosota na ituvaki cava ga. Eda vakadeitaka ni na vukei keda o Jiova, ena vakalougatataki keda tale ga.—Jere. 17:7, 8.
EDA SEGA NI KILA NA LEVU NI KA E KILA O JIOVA ME BALETI KEDA
16. Me vaka e tukuni ena Same 139:1-6, na cava e kila o Jiova me baleti keda?
16 Wilika Same 139:1-6. E kila na Dauveibuli na keda ibulibuli kei na ka kece me baleti keda. E kauaitaki keda tu ga. E kila na ka eda tukuna kei na kena inaki, na ka eda cakava kei na vuna eda cakava kina. Me vaka e vola o Tui Tevita, e wavoliti keda na veitaqomaki i Jiova, ena dau vukei keda tu ga. E vakasakiti dina nona kauaitaki keda vakalevu na Turaga Cecere Duadua ni lomalagi kei na vuravura, kei na Dauveibuli kaukaua duadua ni lomalagi kei na vuravura! E tukuna o Tevita: “Na kilaka va qo sa rui veivakurabuitaki vei au. Sa rui sivia meu katuma rawa.”—Same 139:6, vmr.
17. Na cava ena rairai dredre kina ena so na gauna meda ciqoma ni kilai keda vinaka o Jiova?
17 Ena rairai dredre ena so na gauna meda vakabauta ni Tamada dauloloma o Jiova ena vuku ni noda isususu, noda itovo vakavanua, se ka eda dau vakabauta tu e liu. Se da nanuma ni sa rui torosobu noda cala makawa, ena sega kina ni via kilai keda o Jiova qai yawaki keda. Eso na gauna e dau va tale ga qori o Tevita. (Same 38:18, 21) Se na rawa ni taroga e dua e saga tiko me veisautaka nona ivakarau ni bula me salavata kei na ivakatagedegede dodonu ni Kalou, ‘Ke kilai au vinaka na Kalou, cava e vinakata kina meu cata na ivakarau ni bula sa matau tu vei au?’
18. Ena yaga vakacava noda ciqoma ni kilai keda vinaka sara o Jiova? (Raica tale ga na iyaloyalo.)
18 Meda vulica meda ciqoma ni kilai keda vinaka sara o Jiova mai na noda kilai keda, e raica tale ga na ka vinaka me baleti keda eda sega ni raica rawa. E kila tale ga na noda malumalumu, e kila noda rai, kei na vuna eda cakava kina eso na ka, e lomani keda. (Roma 7:15) Na gauna eda kila kina ni raica o Jiova na ka eda rawa ni cakava, eda na nuidei vakalevu meda qaravi koya ena yalodina qai marautaka noda veiqaravi.
E vukei keda o Jiova meda vosota na leqa ena gauna qo, ni vaqaqacotaka noda vakabauta me baleta na gauna marautaki ena vuravura vou (Raica na parakaravu 18-19)c
19. Na cava eda kila me baleti Jiova?
19 Eda kila ni o Jiova ga na loloma. E sega tale ni vakatitiqataki qori. (1 Joni 4:8) Eda kila ni laurai nona loloma kei na nona kauaitaki keda vakalevu ni vakarautaka nona ivakatagedegede dodonu. Eda kila ni vinakata o Jiova meda rawata na bula tawamudu. Oya na vuna e vakarautaka kina na ivoli. Na iloloma qori e vakadeitaka vei keda ni rawa nida qaravi Jiova se mani vakacava noda ivalavala ca. (Roma 7:24, 25) Eda kila tale ga “ni uasivia na lomada na Kalou, e kila tale ga na ka kece.” (1 Joni 3:19, 20) E kila o Jiova na ka kece me baleti keda, e nuidei tale ga nida na yalodina tiko ga meda cakava na lomana.
20. Na cava meda cakava meda kua kina ni nuiqawaqawa?
20 O Jiova e vakaraitaka vei keda na itukutuku dodonu meda kila. Nida ciqoma qori ena yalomalumalumu, eda na sega kina ni nuiqawaqawataka vakalevu na ka eda sega ni lewa rawa, ia eda na kauaitaka ga na ka e bibi. Nida cakava qori, eda vakaraitaka nida nuitaki Jiova vakatabakidua, “o koya e uasivi nona kila.” (Jope 36:4) Ni lailai noda kila me baleta eso na ka, eda vakanamata tu ina gauna e sega ni mudu, meda vulica kina eso na ka vovou me baleta na noda Kalou Cecere.—Dauv. 3:11.
SERE 104 iSolisoli ni Kalou na Yalo Tabu
a Ni na liutaka o Jisu na ivalu me vakarusai kina na vuravura ca i Setani, eda rawa gona ni tukuna ni sa kila tiko ena gauna qo na tikinisiga ni Amaketoni kei na gauna ena “vakaotia sara [kina] nona ravuravu.”—Vkta. 6:2, 19:11-16.
b IVAKAMACALA NI IYALOYALO Tabana e 17: Rau tawana tiko na veitamani qo eso na iyaya ena kato me ratou vakarau tu ena leqa tubukoso.
c IVAKAMACALA NI IYALOYALO: Na tacida qo e sotava tiko eso na ituvaki dredre, ia e raitayaloyalotaka na bula totoka ena vuravura vou.