Nuitaka Vakalevu na iSoqosoqo i Jiova

1. Era tuvanaki vakacava na dauveiqaravi i Jiova ena imatai ni senitiuri?

NA GAUNA kece e lesi ira kina na nona dauveiqaravi o Jiova ena nodra ilesilesi, e vinakata me tuvanaki vinaka na kena vakayacori. (1 Kor. 14:33) Me kena ivakaraitaki, e nona inaki na Kalou me vunautaki na itukutuku vinaka e vuravura taucoko. (Maciu 24:14) E lesi Jisu o Jiova me liutaka na cakacaka qori. E raica o Jisu me tuvanaki vinaka na kena vakayacori. Ena imatai ni senitiuri e tauyavu e levu na ivavakoso ena duidui vanua, era lesi na qase mera veidusimaki, mera liutaka tale ga na cakacaka. (Caka. 14:23) Era tiko e Jerusalemi na ilawalawa qase, qori o ira na yapositolo kei ira na qase, era vakatulewa ena so na ka, era namaka gona mera muria na ivavakoso kece qori. (Caka. 15:2; 16:4) Nira talairawarawa ena veidusimaki qori na mataveitacini, e “vakadeitaki tiko ga nodra vakabauta na lewe ni ivavakoso qai tubu tiko ga ... na kedra iwiliwili.”—Caka. 16:5.

2. Me tekivu mai na 1919, e veidusimaki vakacava o Jiova vei ira na nona dauveiqaravi qai vakarautaka na kakana vakayalo?

² Nikua e tuvanaki ira vinaka tiko ga na nona dauveiqaravi o Jiova. Me tekivu mai na 1919, e vakayagataka o Jisu e dua na ilawalawa tagane lumuti lailai me tuvanaka na cakacaka vakavunau kei na kena vakarautaki na kakana vakayalo vei ira na nona imuri.a (Luke 12:42) Macala ga ni vakalougatataka tiko o Jiova na nodratou cakacaka.—Aisea 60:22; 65:13, 14.

3-4. (a) Vakamacalataka na yaga ni noda tuvanaki vinaka. (b) Na cava eda na veivosakitaka ena ulutaga qo?

³ Ke da sega ni tuvanaki vinaka, eda na sega ni qarava rawa na itavi e lesia vei keda o Jisu. (Maciu 28:19, 20) Me kena ivakaraitaki, eso na yalava era vunau wasoma kina e levu na dautukutuku, ia eso tale na yalava sa na sega sara ga nida vunau kina. Vakacava, o rawa ni vakasamataka eso tale na sala e yaga kina vei keda na tuvatuvanaki vinaka?

⁴ E ivakaraitaki vei keda na ka e cakava o Jisu e vuravura ena ka me caka meda tuvanaki kina nikua. Eda na vulica ena ulutaga qo na ivakaraitaki i Jisu kei na sala e vakatotomuri koya kina na isoqosoqo. Eda na veivosakitaka tale ga na sala eda na nuitaka kina vakalevu na isoqosoqo i Jiova.

E MURIA NA ISOQOSOQO NA IVAKARAITAKI I JISU

5. Na cava e dua na sala eda vakatotomuria kina na ivakaraitaki i Jisu? (Joni 8:28)

⁵ E vakavulici Jisu na Tamana vakalomalagi ena ka me cakava kei na ka me kaya. Na isoqosoqo i Jiova e muria na ivakaraitaki i Jisu ni yavutaka ena Vosa ni Kalou nona veivakavulici me baleta na itovo kei na veidusimaki. (Wilika Joni 8:28; 2 Tim. 3:16, 17) Eda uqeti wasoma meda dau wilika qai muria na Vosa ni Kalou. E yaga vakacava noda muria na ivakasala qori?

6. Na cava e dua na sala e yaga kina noda vulica na iVolatabu?

⁶ E yaga vakalevu noda vulica na iVolatabu nida vakayagataka na ivola vakaivolatabu. Kena ivakaraitaki, eda rawa ni veidutaitaka na ivakavuvuli vakaivolatabu kei na veidusimaki ni isoqosoqo. Nida raica ni yavutaki vakaivolatabu na noda dusimaki, eda na nuitaka kina vakalevu na isoqosoqo i Jiova.—Roma 12:2.

7. Na itukutuku cava e vunautaka o Jisu? E vakatotomuri koya vakacava na isoqosoqo i Jiova?

⁷ E vunautaka o Jisu na “itukutuku vinaka ni Matanitu ni Kalou.” (Luke 4:43, 44) E vakaroti ratou tale ga na nona tisaipeli me ratou vunautaka na Matanitu qori. (Luke 9:1, 2; 10:8, 9) Nikua, o ira kece na lewena na isoqosoqo i Jiova era vunautaka na itukutuku vinaka ni Matanitu Kalou ena vanua cava ga era tiko kina se mani vakacava na levu ni itavi era qarava.

8. Na itavi dokai cava eda lesi kina?

⁸ Eda okata me ka dokai noda vunautaka na ka dina me baleta na Matanitu ni Kalou! Ia e tiko ga o ira na sureti ena ilesilesi qori. Kena ivakaraitaki ni se bula e vuravura o Jisu, e sega ni vakadonui ira na timoni mera tukuna na veika me baleti koya. (Luke 4:41) Nikua, ni bera ni dua e tomani keda ena cakacaka vakavunau, e vinakati me rawata na kena ivakatagedegede. Eda vakaraitaka na noda marautaka na itavi dokai qori nida vunau ena vanua cava ga eda tiko kina, se gauna eda rawa ni cakava kina. Me vakataki Jisu, e noda inaki meda tea qai vakasuasuataka na sore ni ka dina ni Matanitu ni Kalou ena lomadra e levu.—Maciu 13:3, 23; 1 Kor. 3:6.

9. Sala cava e vakatakila kina na yaca ni Kalou na nona isoqosoqo?

⁹ E vakatakila o Jisu na yaca i Tamana. Ni masu o Jisu vua na Tamana vakalomalagi, e kaya: “Au sa vakatakila vei ratou na yacamuni.” (Joni 17:26) Me salavata kei na ivakaraitaki i Jisu, na isoqosoqo i Jiova e saga na ka kece e rawa ni cakava me vukei ira eso tale mera kila na yaca ni Kalou. Na iVolatabu Vakadewa ni Vuravura Vou e biuta lesu tale na yaca ni Kalou ena kena vanua donu. Nikua sa tu taucoko se vakatikina na iVolatabu ena sivia ni 270 na vosa. Ena iKuri A4 kei na A5 ena iVolatabu qori, o na wilika na kena vakalesui tale na yaca ni Kalou ena iVolatabu. O na wilika tale ga na iKuri C ena iVolatabu ni Vuli (Study Bible) na kena vakamatatataki ni dodonu ga me volai vaka237 na yaca ni Kalou ena iVolatabu vaKirisi vaKarisito.

10. Na cava o vulica ena ka e kaya na marama mai Myanmar?

¹⁰ Me vakataki Jisu, eda via vukea e levu mera kila na yaca ni Kalou. Na gauna e vulica kina na yaca ni Kalou e dua na marama yabaki 67 mai Myanmar, e luluvu qai kaya: “Qo na imatai ni gauna meu kila kina ni yaca ni Kalou o Jiova. ... Qo e dua dina na ka bibi oni vakavulici au kina.” Me vaka eda raica ena ivakaraitaki qori, na vulici ni yaca ni Kalou e rawa ni uqeta sara ga na lomadra na yalomalumalumu.

NUITAKA TIKO GA VAKALEVU NA ISOQOSOQO I JIOVA

11. Era vakaraitaka vakacava na qase ni ivavakoso nira nuitaka na isoqosoqo i Jiova? (Raica tale ga na iyaloyalo.)

¹¹ Na cava e dua na sala era vakaraitaka kina na qase ni ivavakoso nira nuitaka na isoqosoqo ni Kalou? Nira dusimaki na qase, e vinakati mera wilika vakavinaka ra qai muria ena nodra vinaka taucoko. Kena ivakaraitaki, era dusimaki ena sala mera vakaitavi kina ena soqoni, masulaka na ivavakoso, kei na nodra taqomaki vinaka na sipi i Karisito. O ira na qase ni ivavakoso era muria na veidusimaki ni isoqosoqo, era vukei ira na sipi i Jiova mera vakila nira taqomaki, era lomani tale ga.

12. (a) Na cava meda tokoni ira kina na liutaka tiko na cakacaka? (Iperiu 13:7, 17) (b) Cava meda kauaitaka ga kina na nodra itovo vinaka na qase ni ivavakoso?

¹² Nira dusimaki keda na qase ni ivavakoso, e ka vakayalomatua meda yalorawarawa ni muria. Ena rawarawa kina na nodra colata na nodra itavi o ira na liutaka tiko na cakacaka. E uqeti keda tale ga na iVolatabu meda talairawarawa qai vakamalumalumu vei ira na liutaka tiko na cakacaka. (Wilika Iperiu 13:7, 17.) Ia ena sega ni rawarawa qori ena so na gauna. Na vuna? Era sega ni uasivi na qase ni ivavakoso. Ke da kauaitaka tiko ga na nodra malumalumu, sega ni nodra itovo vinaka, eda sa tokoni ira tiko na meca. Ena sala cava? Eda sa na sega ni nuitaka na isoqosoqo, qori sara ga na nodra inaki na dau veitusaqati. Na cava gona meda cakava meda kila kina na nodra lasulasu na meca da qai cata?

ME KUA NI RAWAI IKO NA VEITUSAQATI

13. Era via vakarogocataka vakacava na meca ni Kalou na nona isoqosoqo?

¹³ Era saga na dau veitusaqati mera vakarogocataka na veika vinaka e cakava na isoqosoqo i Jiova. Kena ivakaraitaki, eda vulica ena iVolatabu ni vinakata o Jiova vei ira na sokaloutaki koya mera savasava vakayago, vakayalo, me savasava tale ga na nodra itovo. E vakarota ke dua e sega ni veivutuni qai muria tiko ga na itovo dukadukali, me vakasivoi mai na ivavakoso. (1 Kor. 5:11-13; 6:9, 10) Eda talairawarawa ina ivakaro vakaivolatabu qori. Oya na vuna era saga kina na dau veitusaqati mera beitaki keda ni qiqo noda rai, eda dau vakalelewa, eda sega ni dauloloma.

14. O cei e vakavuna tiko na itukutuku lasu me baleta na isoqosoqo i Jiova?

¹⁴ Kilai koya e vakavuna tiko na lasu. O Setani sara ga e vakavuna tiko na itukutuku lasu me baleti keda. E “tama ni lasu.” (Joni 8:44; Vkte. 3:1-5) Meda namaka gona ni o Setani ena vakayagataki ira na tokoni koya mera vakatetea na itukutuku lasu me baleta na isoqosoqo i Jiova. Qori sara ga na ka e yaco ena imatai ni senitiuri.

15. Na cava era cakava na iliuliu ni lotu vei Jisu kei ira na nona imuri?

¹⁵ E vakayagataki ira eso o Setani ena imatai ni senitiuri mera vakatetea na lasu me baleta na Luve ni Kalou uasivi e dau cakamana. Kena ivakaraitaki, era tukuna na iliuliu ni lotu vei ira na lewenivanua ni o Jisu e vakatalai ira na timoni ena kaukaua e solia vua na “nodra iliuliu na timoni.” (Mari. 3:22) Na gauna e veilewai kina o Jisu, era beitaki koya na iliuliu ni lotu ni vosabeci tamana, era uqeti ira tale ga na ilala levu mera tokona na nona vakamatei. (Maciu 27:20) E muri, nira vunautaka na itukutuku vinaka na imuri i Karisito, o ira na veitusaqati tiko era “vakaucaca ra qai rawai ira na lewe ni veimatanitu” mera vakacacani ira na lotu vaKarisito qori. (Caka. 14:2, 19) Me baleta na Cakacaka 14:2, e tukuni ena Vale ni Vakatawa ni Tiseba 1, 1998: “Sega ni cegu na lomadra na Jiu dauveitusaqati ena nodra cata na itukutuku vinaka, sa ra qai vakaucaca wavoki. E nodra gagadre me ca na kedra irogorogo na lotu vaKarisito vei ira na sega ni Jiu.”

16. Na cava meda nanuma tiko ke da rogoca na itukutuku lasu?

¹⁶ E sega ni cegu na lasu nei Setani ena imatai ni senitiuri. Nikua, e “vakacala tiko na vuravura taucoko.” (Vkta. 12:9) Ke o rogoca na itukutuku veivakacalai me baleta na isoqosoqo se o ira na tacida tagane era liutaka tiko na cakacaka, mo nanuma tiko na ka e cakava na meca vei Jisu kei ira na nona tisaipeli ena imatai ni senitiuri. Nikua era tusaqati na tamata ni Kalou, era vakaucacataki tale ga me vaka e tukuna na iVolatabu. (Maciu 5:11, 12) Ena sega ni vakacalai keda na itukutuku lasu ke da kilai koya e vakavuna tiko da qai qaqarauni. Na cava meda cakava?

17. Na cava meda cakava me kua ni vakaleqai keda na italanoa lasu? (2 Timoci 1:13) (Raica tale ga na kato “Ka Mo Cakava ena iTukutuku Lasu.”)

¹⁷ Cata na italanoa lasu. E tukuna vakamatata na yapositolo o Paula na ka meda cakava ke da rogoca na italanoa lasu. E tukuna vei Timoci me “vakaroti ira eso mera kua ni ... vakarogoca na italanoa lasu,” mera “cata [tale ga] na italanoa lasu e beci kina na ka e savasava.” (1 Tim. 1:3, 4; 4:7) Vakasamataka mada e dua na gone e rairai tomika e dua na duka qai biuta e gusuna, ia ena sega ni cakava qori e dua e uabula ni kila ni rawa ni vakaleqai koya. Eda na cata tale ga na italanoa lasu nida kila na vanua e vu mai kina. Ia eda na taura matua “na ivakarau ni vosa dina.”—Wilika 2 Timoci 1:13.

18. Eda na vakaraitaka vakacava na noda nuitaka na isoqosoqo i Jiova?

¹⁸ Eda veivosakitaka mai e tolu na sala e vakatotomuri Jisu kina na isoqosoqo i Jiova. Ni o vulica tiko na iVolatabu, saga mo kila e levu tale na sala e vakatotomuria kina na ivakaraitaki i Jisu na isoqosoqo. Mo vukea eso tale ena ivavakoso mera nuitaka tiko ga na isoqosoqo i Jiova. Mo vakaraitaka tale ga ni o nuitaka ena nomu qaravi Jiova ena yalodina qai tiko dei ga ena isoqosoqo e vakayagataka tiko me vakayacora na lomana. (Same 37:28) Meda mareqeta mada ga noda rawa ni veimaliwai kei ira na tamata i Jiova era dauloloma, era yalodina tale ga.