ULUTAGA NI VULI 19
SERE 22 Sa tu na Matanitu —Me Yaco Mai!
Na Cava Eda Kila me Baleta na Vakatulewa i Jiova ena Gauna se Bera Mai?
“O Jiova . . . [e] sega ni vinakata me rusa e dua.”—2 PITA 3:9.
KA E VAKABIBITAKI
Eda rawa ni nuidei ni vakatulewa i Jiova me baleta na gauna se bera mai ena laurai kina na lewadodonu.
1. Na cava eda kaya kina nida sa bula tiko ena gauna vakairogorogo?
EDA sa bula tu qo ena dua na gauna vakairogorogo! Eda raica sara ga e veisiga na kena vakayacori na parofisai vakaivolatabu. Me kena ivakaraitaki, eda raica na nodrau veiletitaka tiko “na tui ni vualiku” kei “na tui ni ceva” o cei e kaukaua duadua. (Tani. 11:40) Eda kila tale ga ni sa vunautaki tiko na itukutuku vinaka ni Matanitu ni Kalou e vuravura taucoko, e vica vata na milioni era sa mai qaravi Jiova kina. (Aisea 60:22; Maciu 24:14) E levu tale ga na kakana vakayalo e vakarautaki mai “ena kena gauna donu.”—Maciu 24:45-47.
2. Na cava eda rawa ni nuidei kina? Cava meda kila tiko?
2 O Jiova e vukei keda tiko ga me matata noda kila eso na ka lelevu ena yaco ena gauna se bera mai. (Vkai. 4:18; Tani. 2:28) Eda nuidei ni tekivu na veivakararawataki levu, eda sa na kila na veika e vinakati meda kila meda vosota kina ena yalodina qai duavata tiko ga ena gauna dredre qo. Ia e bibi meda kila ni tiko eso na ka eda sega ni kila me baleta na gauna se bera mai. Ena ulutaga qo, eda na veivosakitaka mada na vuna eda veisautaka kina na veika eda vakabauta tu ena dua na gauna me baleta eso na ka lelevu era na yaco. Oti eda na qai railesuva eso na ka eda sa kila tiko me baleta na gauna se bera mai, kei na ka ena cakava na Tamada vakalomalagi.
NA KA EDA SEGA NI KILA
3. Na cava eda tukuna kina ni na sega ni solia o Jiova na gauna mera vakaraitaka kina nodra vakabauti koya eso?
3 Ena gauna sa oti eda tukuna ni tekivu na veivakararawataki levu, sa na sega tale ni soli na gauna vei ira na tawavakabauta mera vakaraitaka nodra vakabauti Jiova mera bula kina ena Amaketoni. Eda tukuna qori nida dau vakabauta tu ni vakaibalebaletaki vakaparofisai na Waluvu. Me kena ivakaraitaki, me vaka nona sogota na katuba ni waqa o Jiova ni bera ni tekivu na Waluvu, ena cakava tale ga qori ni tekivu na veivakararawataki levu ni “sogota na katuba” ni vuravura ca i Setani me kua tale ni dua e vakabulai.—Maciu 24:37-39.
4. Vakacava meda raica ni vakaibalebale vakaparofisai na itukutuku me baleta na Waluvu? Vakamacalataka.
4 Vakacava meda kaya ni vakaibalebale tiko vakaparofisai na Waluvu? Sega. Na vuna? E sega ni vakamacalataka na iVolatabu.a E vakatauvatana o Jisu na “siga i Noa” kei na nona tiko tawarairai. Ia e sega ni tukuna ni vakaibalebaletaki tiko vakaparofisai na Waluvu, ya ni tamata kece era bula ena gauna i Noa, na ka e yaco kina, kei na kena sogo na katuba ni waqa e tiko na kena ibalebale vakaparofisai. Ia e tiko na ka meda vulica me baleta na itukutuku i Noa kei na Waluvu.
5. (a) Na cava e cakava o Noa ni bera na Waluvu? (Iperiu 11:7; 1 Pita 3:20) (b) E tautauvata vakacava nona vunau o Noa kei na noda vunau tiko nikua?
5 Na nona rogoca o Noa na veivakaroti i Jiova, e vakaraitaka nona vakabauta ni taya na waqa. (Wilika Iperiu 11:7; 1 Pita 3:20.) Qori tale ga me uqeti ira na rogoca na itukutuku vinaka me baleta na Matanitu ni Kalou, ya mera cakava na ka era rogoca. (Caka. 3:17-20) E tukuna o Pita ni o Noa e “dauvunautaka na ka dodonu.” (2 Pita 2:5) Ia me vaka eda veivosakitaka ena ulutaga sa oti, eda sega ni kila ke a vunau o Noa vei ira kece na bula tiko e vuravura ni bera na Waluvu. Nikua, eda vakaitavi tiko ena cakacaka vakavunau e vuravura raraba, eda gumatua tale ga kina. Se mani vakacava na noda sasaga, eda na sega ni rawa ni vunautaka na itukutuku vinaka vei ira kece na bula tiko e vuravura ni bera ni rusa. Na vuna?
6-7. Na cava eda tukuna kina nida sega ni rawa vunau vei ira kece na lewe i vuravura ni bera na veivakarusai? Vakamacalataka.
6 Vakasamataka mada na ka e tukuna o Jisu me baleta na rabailevu ni vanua eda na vunau kina. E parofisaitaka ni na vunautaki na itukutuku vinaka “ena veiyasa i vuravura me ivakadinadina ina veimatanitu kece.” (Maciu 24:14) Sa vakayacori tale tiko ga nikua na parofisai qori ena kena ivakatagedegede levu duadua. Na itukutuku vinaka ni Matanitu ni Kalou e vakarautaki ena sivia ni 1,000 na vosa. Ena vuku tale ga ni noda website na jw.org, e levu nikua era sa vulica tiko na itukutuku vinaka ni Matanitu ni Kalou e veiyasa i vuravura.
7 Ia e tukuna tale ga o Jisu vei ratou nona tisaipeli ni ratou na sega ni “sikova na koro kece,” se vunau yadudua vei ira na lewenivanua ni bera ni yaco mai. (Maciu 10:23; 25:31-33) Sa vakayacori sara tiko ga na vosa qori i Jisu ena gauna eda bula tiko kina qo. E vica vata na milioni era tiko ena vanua e vakadredretaki tu kina noda cakacaka. Me kena ikuri, e vica vata na drau na gone era sucu ena veiminiti. Eda gumatua ena noda saga meda tukuna na itukutuku vinaka vei ira na lewenivanua mai na “veimatanitu, na veiyavusa, [kei] na duivosavosa.” (Vkta. 14:6) Ia na kena dina ya nida na sega ni rawa ni tukuna na itukutuku vinaka vei ira kece na lewe i vuravura ni bera na veivakarusai.
8. Na cava eda na rairai taroga me baleta na vakatulewa nei Jiova e se bera mai? (Raica tale ga na iyaloyalo.)
8 Eda rawa ni taroga: Vakacava o ira na rairai se sega ni rogoca na itukutuku vinaka ni bera na veivakararawataki levu? Cava ena vakatulewataka o Jiova kei Luvena, o koya e lesia me lewai ira? (Joni 5:19, 22, 27; Caka. 17:31) E kaya na tikinivolatabu e yavutaki kina na ulutaga qo, ni o Jiova e “sega ni vinakata me rusa e dua.” E vinakata ga meda “veivutuni kece.” (2 Pita 3:9; 1 Tim. 2:4) Eda kila tiko qori, ia e sega ni vakaraitaka vei keda o Jiova na ka ena cakava me saumi kina na taro qori. E sega tale ga ni vinakati me tukuna vei keda na ka sa cakava oti kei na ka ena qai cakava.
Na cava ena cakava o Jiova vei ira na sega ni via rogoca na itukutuku vinaka ni bera na veivakararawataki levu? (Raica na parakaravu 8)c
9. Na cava e tukuna vei keda o Jiova ena iVolatabu?
9 E vakamacalataka o Jiova ena iVolatabu eso na ka ena vakayacora. Me kena ivakaraitaki, e tukuna ni o Jiova ena vakaturi ira na “sega ni yalododonu,” qo o ira na sega ni soli vei ira na gauna mera rogoca na itukutuku vinaka ra qai veisautaka na nodra bula. (Caka. 24:15; Luke 23:42, 43) Ena basika kina eso tale na taro bibi.
10. Na cava eso tale na taro e basika?
10 Vakacava o ira kece na mate donuya na veivakararawataki levu, era na mate vakadua qai sega nodra inuinui mera vakaturi tale? E vakamatatataka na iVolatabu nira na sega ni vakaturi o ira na dauveitusaqati e vakarusa o Jiova kei na nona mataivalu ena Amaketoni. (2 Ces. 1:6-10) Ia vakacava eso tale, kena ivakaraitaki o ira na rairai mate nira tauvimate se ra qase ga, se ra mate ena vakacalaka, se dua e vakamatei ira? (Dauv. 9:11; Saka. 14:13) Vakacava era okati tiko eso vei ira qori mera “sega ni yalododonu” era na vakaturi ena vuravura vou? Eda sega sara ga ni kila.
NA KA EDA SA KILA
11. Na yavu cava ena vakatau kina noda lewai ena Amaketoni?
11 E vica na ka eda sa kila tiko me baleta na ka se bera mai. Kena ivakaraitaki ena Amaketoni, ena vakatau na noda lewai na kawatamata ena ka eda cakava vei ira na taci Karisito. (Maciu 25:40) O ira na lewai mera sipi, era vakaraitaka nira tokoni ira na lumuti kei Karisito. Eda kila tale ga nira na tiko e vuravura eso na taci Karisito ni tekivu na veivakararawataki levu ra qai kau i lomalagi ni bera toka ga na Amaketoni. Meda nanuma tiko ke ra se bula tiko ga na taci Karisito e vuravura, ena soli tiko ga na gauna vei ira na yalomalumalumu mera vakaraitaka nodra tokoni ira na lumuti kei na cakacaka era cakava tiko. (Maciu 25:31, 32; Vkta. 12:17) Cava e bibi kina meda kila qori?
12-13. Na cava era na rairai cakava eso nira raica ni sa rusa o “Papiloni na Ka Levu?” (Raica tale ga na iyaloyalo.)
12 Ni oti ga na kena tekivu na veivakararawataki levu, de dua era na raica eso na nona rusa o “Papiloni na Ka Levu” ra qai liaca ni qori sara ga na ka era dau tukuna tiko na iVakadinadina i Jiova. Vakacava ena uqeti ira eso mera veisautaka na lomadra?—Vkta. 17:5; Isik. 33:33.
13 Ena via tautauvata qori kei na ka e yaco e Ijipita ena gauna i Mosese. Nanuma tiko ni “dua na ilawalawa levu era duikaikai” era tomani ira na Isireli nira biuti Ijipita. Eso vei ira qori era tekivu vakabauta nira raica na kena vakayacori dina na ka e tukuna o Mosese me baleta na Tini na Kuita. (Lako 12:38) Ke yaco tale ga qori ni sa rusa o Papiloni na Ka Levu, vakacava eda na rarawataka na nodra mai tomani keda eso tale ni bera ni rusa o vuravura? Sega! Eda na via vakaraitaka na nona itovo na Tamada vakalomalagi, ni “Kalou dauyalololoma qai dauveinanumi, e berabera ni cudru, qai vuabale ena loloma e dei kei na dina.”b—Lako 34:6.
De dua era na raica eso tale na rusa nei “Papiloni na Ka Levu” ra qai liaca ni qori sara ga na ka era dau tukuna tiko na iVakadinadina i Jiova (Raica na parakaravu 12-13)d
14-15. Vakacava e vakatau nona bula tawamudu e dua ena gauna e mate kina se na vanua e tiko kina? Vakamacalataka. (Same 33:4, 5)
14 Eso na gauna eda na rogoca ni kaya e dua, “E vinaka cake me mate na wekaqu ni bera na veivakararawataki levu me rawa ni vakaturi.” De dua e vinaka na nona inaki. Ia na nona rawata na bula tawamudu e dua e sega ni vakatau ena gauna e mate kina. O Jiova e Turaganilewa uasivi, e dau lewadodonu tu ga. (Wilika Same 33:4, 5.) Eda nuidei ni na cakava na ka e dodonu “na Turaganilewa ni vuravura taucoko.”—Vkte. 18:25.
15 Ena sega tale ga ni vakatau nona bula tawamudu e dua ena vanua e tiko kina. Ena sega sara ga ni rawa vei Jiova me lewai ira e vica vata na milioni mera vaka na “me,” baleta nira bula tiko ena vanua se bera ni vunautaki kina na itukutuku vinaka. (Maciu 25:46) Na Turaganilewa dodonu ni vuravura e kauaitaki ira vakalevu ni vakatauvatani kei keda. Eda sega ni kila na veiveisau ena cakava o Jiova donuya na veivakararawataki levu. De dua ena soli na gauna vei ira qori mera vulica na veika me baleti Jiova, ra vakabauti koya, ra qai to ena yasa i Jiova ni vakacerecerea na yacana e matadra na veimatanitu.—Isik. 38:16.
Ni tekivu oti na veivakararawataki levu, . . . vakacava ena uqeta eso me veisau na lomadra?
16. Na cava eda vulica me baleti Jiova? (Raica tale ga na iyaloyalo.)
16 Ena noda vulica na iVolatabu, eda kila kina ni talei vakalevu vei Jiova na noda bula. E solia na Luvena me rawa nida rawata kece kina na bula tawamudu. (Joni 3:16) Eda vakadinadinataka kece na nona lomani keda o Jiova. (Aisea 49:15) E kila na yacada yadudua. Ni kilai keda vinaka, kevaka mada ga eda mate ena vakaturi keda tale ni kila vinaka tu na keda ibulibuli matailalai kei na ka eda dau vakasamataka tu! (Maciu 10:29-31) E macala ni tiko na vuna vinaka meda nuidei kina ni yavutaka na Tamada vakalomalagi na nona vakatulewataki keda yadudua ena sala uasivi, ni vuku e yalododonu, e dauloloma tale ga.—Jeme. 2:13.
Meda nuidei ni na vakatulewataki keda yadua na Tamada vakalomalagi ena sala uasivi, ena sala dodonu, kei na yalololoma (Raica na parakaravu 16)
17. Na cava ena veivosakitaki ena ulutaga e tarava?
17 Sa qai bibi ga na noda cakacaka vakavunau ni sa vakamatatataki na ka eda kila, meda kua sara ni lokuyara. Na cava eda tukuna kina qori? Cava e uqeti keda meda tukuna tiko ga na itukutuku vinaka qai kua ni soro? Eda na veivosakitaka na kena isau ena ulutaga e tarava.
SERE 76 Na Cava o Vakila?
a Me baleta na ivakamacala ni vu ni veisau qo, raica na ulutaga ‘Qo e Salavata kei na Nomuni iNaki’ ena Vale ni Vakatawa ni Maji 15, 2015, t. 7-11.
b Ni sa rusa o Papiloni na Ka Levu, era na vakatovolei kece na dauveiqaravi ni Kalou donuya na ravuravu nei Koki mai Mekoki. Era na vakatovolei tale ga o ira kece na to vei ira na tamata ni Kalou.
c IVAKAMACALA NI IYALOYALO: E laurai ena tolu na iyaloyalo na vuna era na rairai sega ni rogoca kina eso na noda vunau e vuravura raraba: (1) E tiko e dua na marama ena vanua e leqataki kina nona bula ni kaukaua na veitusaqati ni lotu, (2) e tiko e dua na veiwatini ena vanua e vakatabui tu kina na cakacaka, e leqataki tale ga na nodrau bula, kei na (3) e tiko e dua na tagane ena vanua e yawa sara qai dredre na kena lakovi.
d IVAKAMACALA NI IYALOYALO: E biuta na ka dina e dua na goneyalewa, ia e nanuma lesu na ka e vulica me baleta nona rusa o “Papiloni na Ka Levu.” E veisautaka na lomana, e lesu vei rau na nona itubutubu lotu vaKarisito. Ke yaco eso na ituvaki va qori, ena vinakati meda vakaraitaka na nona yalololoma, kei na nona dauveikauaitaki na Tamada vakalomalagi, meda qai marautaka na nona lesu mai e dua e valavala ca.