Eda Vuli ena iOtioti ni Nona 40 na Siga o Jisu e Vuravura

1-2. Na cava e yaco ni rau taubale tiko i Emeo na tisaipeli i Jisu?

ENA ika16 ni Naisani, 33 G.V., dua na ka nodratou rarawa na tisaipeli i Jisu, ratou rere tale ga. Rau biubiu mai Jerusalemi e rua na tisaipeli me rau lako i Emeo, rauta ni 11 na kilomita mai Jerusalemi. Rau yalolailai ni sa mate o Jisu, na turaga rau dau tomana voli. Vaka me sa oti nodrau vakanuinui ena ka ena cakava na Mesaia. Ia e qai yaco e dua na ka veivakurabuitaki.

² E torovi rau yani e dua na turaga, ratou veitomani sara. Rau talanoataka vua nodrau rarawataka na ka e yacovi Jisu. Oti sa qai tukuna na turaga qori e dua na ka ena veisautaka sara ga nodrau bula. E vakamacalataka na Vosa ni Kalou me “tekivu mai na ivola i Mosese kei na nodra ivola na Parofita,” na vuna e vakararawataki kina na Mesaia qai vakamatei. Ni ratou yaco i Emeo, sa qai vakatakilai koya na turaga qori ni o koya ga o Jisu sa vakaturi oti! Eda rawa ni vakasamataka na levu ni nodrau marau ni rau kila ni sa bula tale na Mesaia!​—Luke 24:​13-35.

3-4. Na cava e yacovi ratou na tisaipeli i Jisu? Cava eda na vulica ena ulutaga qo? (Cakacaka 1:3)

³ E vakaraitaki koya vakalevu o Jisu vei ratou nona tisaipeli ena iotioti ni nona 40 na siga e vuravura. (Wilika Cakacaka 1:3.) Eratou a rarawa tiko, ratou rere. Ia nona rairai mai o Jisu, e vakayaloqaqataki ratou sara ga. Dua na ka nodratou marau, ratou nuidei, ratou yaloqaqa tale ga me ratou vunautaka na itukutuku vinaka ni Matanitu ni Kalou, ratou qai veivakavulici.a

⁴ Ena yaga vei keda noda vulica na ka e cakava o Jisu ena gauna qori. Eda na vulica ena ulutaga qo nona vakayagataka o Jisu na gauna qori me (1) vakayaloqaqataki ratou na nona tisaipeli, (2) vukei ratou me ratou kila vinaka na Vosa ni Kalou, kei na (3) me vakavulici ratou ena so tale na itavi me ratou na qarava. Eda na raica ena ivakaraitaki yadua qori na sala eda na vakatotomuri Jisu kina.

E VEIVAKAYALOQAQATAKI

5. Na cava me ratou vakayaloqaqataki kina na tisaipeli i Jisu?

⁵ E vinakati me ratou vakayaloqaqataki na tisaipeli i Jisu. Na vuna? Eso era biuta mai nodra vale, nodra vuvale, kei na bisinisi mera muri Jisu vakatabakidua. (Maciu 19:27) Eso tale era raicalataki nira sa tisaipeli i Jisu. (Joni 9:22) Ratou vakuai ratou va qori ni ratou vakabauta ni o Jisu ga na Mesaia yalataki. (Maciu 16:16) Ia ni sa mate o Jisu, dua na ka nodratou rarawa, eratou yalolailai tale ga.

6. Na cava e cakava o Jisu ni sa vakaturi?

⁶ Na cava nona rai o Jisu ni ratou rarawa nona tisaipeli? E kila ni ratou rarawataka nona mate, e sega ni vu ni nodratou rarawa na lailai ni nodratou vakabauta. Oya na vuna ni vakaturi oti ga, e tekivu vakayaloqaqataki ratou nona itokani. Kena ivakaraitaki, e rairai vei Meri Makitala ni tagi tiko ena ibulubulu. (Joni 20:​11, 16) E rairai tale ga vei rau na tisaipeli e tukuni ena parakaravu 1. Oti qai rairai vua na yapositolo o Pita. (Luke 24:34) Na cava eda vulica vei Jisu? Dikeva mada na ka e yaco ni rairai vei Meri Makitala.

7. Me vaka e tukuni ena Joni 20:​11-16, na cava e raica o Jisu ni cakava tiko o Meri? Cava e qai cakava o Jisu? (Raica tale ga na iyaloyalo.)

⁷ Wilika Joni 20:​11-16. Ena matakalailai ni ika16 ni Naisani, era lako e levu na marama yalodina ina vanua e vakadavori kina o Jisu. (Luke 24:​1, 10) Meda rogoca mada na ka e cakava e dua vei ira, o Meri Makitala. Ni yaco ena ibulubulu, sa sega kina na yago i Jisu. E cici me lai tukuna vei Pita kei Joni, oti rau veitaucici ena ibulubulu qai muri rau yani o Meri. Ni rau vakadeitaka ni sa lala na ibulubulu, rau mani lesu i vale. Ia e sega ni lesu o Meri. E tiko ga e kea qai tagi tiko. E sega ni kila ni vakaraici koya tu yani o Jisu. E raica o Jisu ni tagi tiko na marama yalodina qo, e via vakayaloqaqataki koya sara ga. E mani rairai vei Meri qai cakava e dua na ka ena uqeti koya vakalevu. E vosa vua qai lesi koya ena dua na itavi bibi me lai tukuna vei ratou na tacina ni sa vakaturi.​—Joni 20:​17, 18.

8. Eda na vakatotomuri Jisu vakacava?

⁸ Eda na vakatotomuri Jisu vakacava? Oya nida vakayaloqaqataki ira na mataveitacini mera qaravi Jiova tiko ga. Me vakataki Jisu, eda na kauaitaka nodra rarawa qai vosa vakayalovinaka vei ira. Kena ivakaraitaki, e dua na tacida o Jocelyn, e mate vakaloloma o tacina yalewa ena dua na vakacalaka. E kaya: “Au rarawa tu ga me vica vata na vula.” Ia rau qai sureti koya e dua na veiwatini ina nodrau vale, rau vakarorogo vinaka vua, rau vakadeitaka tale ga ni se talei tiko ga ena mata ni Kalou. E kaya o Jocelyn: “E vaka ga e vakayagataki rau o Jiova me rau dreti au tani mai na wasawasa voravora ina dua na waqa. Rau vukei au meu marautaka tale noqu qaravi Jiova.” Eda na vakayaloqaqataki ira tale ga na tacida nida vakarorogo vinaka nira talaucaka na lomadra qai vosa vakayalovinaka. Nida cakava qori eda sa vukei ira tiko mera marautaka tiko ga nodra qaravi Jiova.​—Roma 12:15.

VUKEA ESO MERA KILA VINAKA NA VOSA NI KALOU

9. Na cava a sega ni matata vei ratou na tisaipeli? E vukei ratou vakacava o Jisu?

⁹ Eratou vakabauta na tisaipeli i Jisu na Vosa ni Kalou, eratou saga tale ga me ratou muria. (Joni 17:6) Ia e sega ni matata vei ratou na vuna e mate kina o Jisu ena kaunirarawa me vaka e dua na daubasulawa. E kila o Jisu ni sega ni ca na lomadratou, ratou vakatitiqa ga ni lailai na ka eratou kila. (Luke 9:​44, 45; Joni 20:9) E vukei ratou gona me ratou kila vinaka na ibalebale ni Vosa ni Kalou. Dikeva mada na ka e cakava ni rairai vei rau na tisaipeli ena gaunisala i Emeo.

10. E vukei rau vakacava nona tisaipeli o Jisu me rau kila ni o koya dina na Mesaia? (Luke 24:​18-27)

¹⁰ Wilika Luke 24:​18-27. A sega ni vakatakilai koya sara o Jisu ena gauna ya vei rau na tagane qori. Ia e taroga eso na taro. Na vuna? De dua e vinakata me rau talaucaka na lomadrau. Qori sara ga na ka rau cakava. Rau tukuna vua ni rau nuitaka tiko me vakabulai Isireli o Jisu mai na veiliutaki voravora ni Roma. Ni rau sa tukuna oti vua na nodrau nanuma, sa qai vakayagataka na Vosa ni Kalou me vakamatatataka vei rau na ka e yaco.b Ena bogi tiko ga ya, e lai sotavi ira na vo ni tisaipeli o Jisu qai vakamacalataka vei ira na ibalebale ni parofisai qori. (Luke 24:​33-48) Na cava eda vulica ena ivakaraitaki qo?

11-12. (a) Na cava eda vulica ena iwalewale ni nona vakavulica na ka dina o Jisu? (Raica tale ga na iyaloyalo.) (b) E vukei Nortey vakacava na nona qasenivuli?

¹¹ Eda na vakatotomuri Jisu vakacava? Dua, ni o caka vuli iVolatabu, taroga eso na taro veiganiti mo takiva mai na ka e tu e lomana. (Vkai. 20:5) Ni o sa kila na lomana, vakaraitaka vua na iwalewale me raica kina eso na tikinivolatabu e ganita na kena ituvaki. Ia mo kua ni tukuna vua na ka me cakava ena ituvaki e sotava tiko. Uqeti koya ga me vakasamataka eso na tikinivolatabu kei na sala me muria kina. Dikeva mada nona ivakaraitaki e dua na tacida mai Ghana o Nortey.

¹² E tekivu vuli iVolatabu ni yabaki 16. Eratou qai tusaqati koya nona vuvale. E tudei tiko ga vakacava o Nortey? E vakamacalataka nona qasenivuli na Maciu wase 10 nira na vakacacani na lotu vaKarisito dina. E kaya o Nortey: “Ni tekivu na veivakacacani au vakadeitaka niu sa kunea na dina.” E vukei koya tale ga nona qasenivuli me kila na ibalebale ni Maciu 10:16 me rawa ni qaqarauni ni vakamacalataka nona vakabauta e vale, me veidokai tale ga. Ni papitaiso oti o Nortey, e vinakata me painia, ia e vinakata o tamana me vuli ena univesiti. A sega ni tukuna o nona qasenivuli na ka me cakava, ia e taroga e vica na taro me kila na lomana qai vukei koya me vakasamataka eso na ivakavuvuli vakaivolatabu ena vakatulewa vinaka kina. Cava na kena yaga? E vakatulewataka o Nortey me veiqaravi vakatabakidua. E tukuna vua o tamana me biubiu e vale. Na cava na rai nei Nortey? E kaya: “Au vakadeitaka ni donu noqu vakatulewa.” Cava eda vulica? Nida vukea eso tale mera kila vinaka na ibalebale ni Vosa ni Kalou, eda sa vukei ira tiko mera lotu vaKarisito matua.​—Efeso 3:​16-19.

VUKEI IRA NA TACIDA TAGANE MERA “ISOLISOLI TAMATA”

13. Na cava e cakava o Jisu me tomani tiko ga kina na itavi e lesia o Tamana? (Efeso 4:8)

¹³ Ni se tiko e vuravura o Jisu, e qarava vinaka na itavi e lesia vua o Tamana. (Joni 17:4) Ia e sega ni nanuma ni rawa ni cakava duadua ga na cakacaka i Tamana. Ena tolu veimama na yabaki ni nona cakacaka vakaitalatala e vuravura, e vakavulica eso tale mera qarava na itavi qori. Kena ivakaraitaki ni bera ni lesu i lomalagi, e tataunaka nodra qaravi na sipi talei nei Jiova vei ratou nona tisaipeli, me ratou liutaka tale ga na vunau kei na veivakavulici. Eso vei ratou se qai yabaki 20 vakacaca. (Wilika Efeso 4:8.) E vakayagataka vakacava o Jisu na iotioti ni nona 40 na siga, me vakavulici ratou kina na tagane gumatua ratou yalodina qori me rawa ni ratou “isolisoli tamata”?

14. Na cava e vakavulica o Jisu vei ratou na nona tisaipeli? (Raica tale ga na iyaloyalo.)

¹⁴ E vakasalataki ratou vakadodonu nona tisaipeli o Jisu, e cakava tale ga ena yalololoma. Kena ivakaraitaki, e raica ni ratou vakatitiqa eso, e mani vakasalataki ratou. (Luke 24:​25-27; Joni 20:27) E kaya me ratou vakabibitaka nodra vakatawani na sipi i Jiova, sega ni caka bisinisi. (Joni 21:15) E vakadreti ratou tale ga me ratou kua ni kauaitaka vakasivia na itavi ena rairai soli vei ira eso tale. (Joni 21:​20-22) Kena ikuri, e vakadodonutaka nodratou raicala me baleta na Matanitu ni Kalou qai vukei ratou me ratou vakaliuca na vunautaki ni itukutuku vinaka. (Caka. 1:​6-8) Na cava era vulica na qase ni ivavakoso vei Jisu?

15-16. (a) Sala cava era na vakatotomuri Jisu kina na qase ni ivavakoso? Vakamacalataka. (b) E yaga vakacava vei Patrick na veivakasalataki?

¹⁵ Era na vakatotomuri Jisu vakacava na qase ni ivavakoso? E bibi mera vakavulici ira na tacida tagane, era vukei ira tale ga mera qarava eso tale na itavi ena ivavakoso, wili kina o ira mada ga era se gone.c Era kila tiko na qase nira sega ni uasivi na tacida tagane qori. Era na vakavulici ira vakayalololoma mera kila vinaka na nodra itavi, mera kila tale ga ni bibi na yalomalumalumu, yalodina, kei na yalorawarawa mera veiqaravi.​—1 Tim. 3:1; 2 Tim. 2:2; 1 Pita 5:5.

¹⁶ Dikeva na kena yaga vei Patrick na veivakasalataki. Ni se gone, e dau vosa vakaukaua, e sega tale ga ni yalololoma, vei ira mada ga na tacida yalewa. Ia e qai raica e dua na tacida matua na malumalumu nei Patrick, e mani vakasalataki koya vakadodonu ia e cakava qori ena yalololoma. E kaya o Patrick: “Au marau sara ga niu vakasalataki. Au dau yalolailai niu raica nira lesi eso tale na tacida ena itavi au dau vinakata tu. Ia na nona veivakasalataki na qase ni ivavakoso qori e vukei au meu qaravi ira na tacida ena yalomalumalumu, meu kua ni vinakata na itutu se itavi ena ivavakoso.” E mani lesi o Patrick me qase ni ivavakoso ni yabaki 20 vakacaca.​—Vkai. 27:9.

17. E vakaraitaka vakacava o Jisu ni nuitaki ira nona tisaipeli?

¹⁷ E lesi ira nona tisaipeli o Jisu mera vunau, mera veivakavulici tale ga. (Maciu 28:20) De dua era nanuma na tisaipeli ni sega ni rawa nira qarava na itavi qori. Ia e kila vinaka o Jisu ni rawa nira cakava, e vakadeitaka sara ga qori vei ira ni kaya: “Au sa talai [kemuni] yani me vaka ga na nona talai au mai o Tamaqu.”​—Joni 20:21.

18. Era na vakatotomuri Jisu vakacava na qase ni ivavakoso?

¹⁸ Era na vakatotomuri Jisu vakacava na qase ni ivavakoso? O ira na qase matua era na lesia eso tale mera qarava na itavi. (Fpai. 2:​19-22) Kena ivakaraitaki, rawa nira kerei na itabagone mera veivuke ena samaki ni Vale ni Soqoni kei na kena vakavinakataki. Nira lesia na itavi, era na vakavulici ira qai nuitaka nira na cakava vinaka na itavi qori. E vakavinavinakataka e dua na qase ni ivavakoso vou o Matthew na nodra veivakavulici na qase matua me rawa ni qarava vinaka na itavi, ratou nuitaki koya tale ga ni na cakava vinaka. E kaya: “Ni cala na ka au cakava, eratou vukei au meu vuli mai na noqu cala qai vakavinakataka.”d

19. Na cava meda vakadeitaka meda cakava?

¹⁹ E vakayagataka o Jisu na iotioti ni nona 40 na siga e vuravura me veivakayaloqaqataki, me vukea eso tale mera kila vinaka na iVolatabu, me vakavulici ira tale ga na tagane mera isolisoli tamata. Meda vakadeitaka gona meda muria voleka na nona ivakaraitaki. (1 Pita 2:21) Ena vukei keda o Jisu meda cakava qori, ni yalataka: “Au tiko vata kei kemuni ena veisiga kece me yacova na ivakataotioti ni veika vakavuravura.”​—Maciu 28:20.