ULUTAGA NI VULI 47
SERE 38 Ena Vakaukauataki Iko
“O Dua o Mareqeti Vakalevu”!
“O dua o mareqeti vakalevu.”—TANI. 9:23.
KA E VAKABIBITAKI
Eda na vulica na sala mera vukei kina o ira na dau beci ira mera kila nira mareqeti ena mata i Jiova.
1-2. Eda vakadeitaka vakacava ni mareqeti keda o Jiova?
O JIOVA e dau mareqeti ira nona tamata. Ia e tiko eso era dau beci ira. Na vuna? De dua nira dau beci. Vakacava o sotava tale ga qori? Ke vaka kina, o na vakadeitaka vakacava ni mareqeti iko o Jiova?
2 Ena yaga vakalevu nomu wilika qai vakasamataka eso na italanoa vakaivolatabu, o na kila kina na ka e vinakata o Jiova meda cakava vei ira na tamata kei na noda rai me baleti ira. Kena ivakaraitaki, e dau dokai ira na lewenivanua na Luvena o Jisu, e rokovi ira tale ga. Nona cakava qori rau vakaraitaka kina vakaveitamani ni rau dau mareqeti ira na yalomalumalumu era dau beci ira. (Joni 5:19; Iper. 1:3) Eda na vulica ena ulutaga qo: (1) na sala e vukei ira kina e levu o Jisu mera kila na kedra yaga, kei na (2) na sala eda vakadeitaka kina ni mareqeti keda vakalevu na Kalou.—Akeai 2:7.
SALA E VUKEA KINA E LEVU O JISU MERA KILA NA KEDRA YAGA
3. Na cava e cakava o Jisu vei ira na kai Kalili era kere veivuke vua?
3 Ena ikatolu ni nona cakacaka vakavunau o Jisu e Kalili, era tabili yani vua e levu mai na veivanua mera rogoca na ka e tukuna, mera vakabulai tale ga. E raici ira o Jisu “nira suivotu qai biu wale tu me vaka na sipi e sega na kena ivakatawa.” (Maciu 9:36; raica study note.) Era dau beci vei ira nodra iliuliu ni lotu, era tukuna mada ga nira “tamata cudruvi.” (Joni 7:47-49; study note) Ia vakacava o Jisu? E dokai ira ni vakayagataka nona gauna me vakavulici ira, me vakabulai ira tale ga mai na kedra mate. (Maciu 9:35) Kena ikuri, me rawa ni vukea e levu tale, e vakavulici ratou nona yapositolo me ratou vunau, e solia tale ga vei ratou na kaukaua me ratou vakabulai ira na tauvimate kei ira na malumalumu.—Maciu 10:5-8.
4. Na cava eda vulica ena ka e cakava o Jisu vei ira na yalomalumalumu era rogoci koya?
4 E dau dokai ira na vakarogoci koya o Jisu, e nanumi ira tale ga. Ni cakava qori, e vakaraitaka kina kei Tamana ni rau mareqeti ira na dau beci ira. Ke o qaravi Jiova tiko o qai vakatitiqataka na kemu yaga, mo vakasamataka na ivakaraitaki i Jisu, ni dau kauaitaki ira na yalomalumalumu era via kilai koya. Ni o cakava qori, o na kila kina ni o mareqeti ena mata i Jiova.
5. Vakamacalataka na kena ituvaki na marama ni Kalili e sotava o Jisu.
5 E sega ni vakavulici ira wale ga na lewe levu o Jisu, ia e kauaitaki ira yadudua tale ga. Kena ivakaraitaki, ni vunau tiko e Kalili, e sotava e dua na marama e lako tu ga vua na dra me 12 na yabaki. (Mari. 5:25) Na kena mate e vakavuna me sega ni savasava, o ira tale ga na tarai koya era na sega ni savasava. Qori ena sega kina ni veimaliwai vakalevu. Kena ikuri, ena sega ni rawa ni sokaloutaki Jiova kei ira eso tale ena valenilotu, kei na so tale na soqo. (Vunau 15:19, 25) E macala ga ni na rarawa vakalevu na marama qori, ena beci koya tale ga.—Mari. 5:26.
6. E vakabulai vakacava na marama e lako tu ga vua na dra?
6 E vinakata na marama tauvimate qori me vakabulai koya o Jisu. Ia e sega ni lako vakadodonu vei Jisu. Na vuna? De dua e maduataka na kena mate. Se leqataka ni na vakasavi koya o Jisu ni sega ni savasava, qai lako tu yani kei ira na lewe levu. E mani tara wale ga na bele ni nona isulu e sau, ni kila ni na bula kina. (Mari. 5:27, 28) E kaukaua dina nona vakabauta, mani vakabulai. E qai taroga o Jisu o cei e tarai koya. E tukuna vakadodonu na marama qori na ka e cakava. Na cava e cakava o Jisu?
7. Na cava e cakava o Jisu vua na marama tauvimate? (Marika 5:34)
7 E cakavinaka o Jisu vua na marama qori, e dokai koya tale ga. E raica nona ‘rere kei na sautaninini.’ (Mari. 5:33) E kauaitaka qori o Jisu, e vosa kina vakayalovinaka vua. E kacivi koya mada ga “luvequ,” na vosa ni veivakamenemenei qori e sega wale ga ni tau ena veidokai, e tau tale ga ena loloma kei na veinanumi. (Wilika Marika 5:34.) Qo duadua ga na gauna e kaciva kina o Jisu e dua na marama “luvequ.” E rairai vakayagataka na vosa ni veinanumi qori ni raica nona sautaninini. Vakasamataka na levu ni nona marau! Ke a sega ni vosa vakayalovinaka vua o Jisu, de dua sa na vakabulai mai na kena mate, ia se ora tiko ga na lomana. A vinakata sara ga o Jisu me kila na marama qori ni mareqeti koya vakalevu na Tamana vakalomalagi.
8. Na ituvaki dredre cava e vosota e dua na tacida mai Brazil?
8 Eso tale na dauveiqaravi ni Kalou nikua e tauvi ira eso na mate e vakavuna nodra yalolailai, era beci ira kina. Kena ivakaraitaki o Mariaa mai Brazil, e painia tudei, ni sucu mai e sega na yavana ruarua kei na ligana imawi. E kaya: “Au dau vakalialiai tu ga e koronivuli niu lokiloki. Era bulia eso na yacaqu, e dau mosimosi vei au. Era vakaduiduitaki au mada ga noqu lewenivuvale.”
9. E vukei vakacava o Maria me kila ni mareqeti koya o Jiova?
9 E vukei vakacava o Maria? Na gauna e mai iVakadinadina i Jiova kina, era vakacegui koya na mataveitacini, era vukei koya tale ga me raici koya mai na rai i Jiova. E kaya: “Sa oso ga noqu ivola meu vola kece kina na yacadra o ira era vukei au! Au vakavinavinakataki Jiova mai vu ni lomaqu ni vakarautaka vei au e dua na vuvale vinaka vakayalo.” Era vukei Maria na tacina vakayalo me kila kina ni mareqeti koya na Kalou.
10. Na ituvaki cava e vakararawataki Meri Makitala? (Raica tale ga na iyaloyalo.)
10 Dikeva na sala e vukea tale kina e dua o Jisu, ya o Meri na yalewa ni Makitala. A curumi koya e vitu na timoni! (Luke 8:2) De dua e cakava eso na ivukivuki duatani ni curumi koya tu na timoni, ya na vuna era rerevaki koya kina e levu. E vakaloloma sara ga na kena ituvaki, de dua e sega ni lomani, rere, e yalolailai tale ga. Kena irairai ni vakasava o Jisu na timoni era vakararawataki Meri, e qai mai nona tisaipeli yalodina. Sala cava tale e vukei Meri Makitala kina o Jisu me kila ni mareqeti koya na Kalou?
E vakadeitaka vakacava o Jisu vei Meri Makitala ni mareqeti koya o Jiova? (Raica na parakaravu 10-11)
11. E vakaraitaka vakacava o Jisu ni mareqeti Meri Makitala o Jiova? (Raica tale ga na iyaloyalo.)
11 E sureti Meri Makitala o Jisu me tomani koya ena nona ilakolako vakavunau.b E yaga kina vakalevu vua nona rogoci Jisu ni vakavulici ira eso tale. E rairai tale ga vua o Jisu ena siga e vakaturi kina. O Meri na imatai ni tisaipeli e vosa vua o Jisu ena siga qori. E lesi koya mada ga o Jisu me lai tukutuku vei ratou na vo ni yapositolo ni sa vakaturi. Na ka e cakava qori o Jisu e vakaraitaka ni mareqeti Meri vakalevu o Jiova!—Joni 20:11-18.
12. Vakamacalataka na vuna e nanuma kina o Lidia ni sega ni lomani.
12 Me vakataki Meri Makitala, e levu tale ga nikua era sega tu ni lomani. Kena ivakaraitaki o Lidia, e dua na tacida yalewa mai Sipeni, e kaya ni vinakata o tinana me vakalutu ni se buketetaki koya tiko. Ni se goneyalewa lailai mada ga, e nanuma vinaka tu nona dau vakawaletaki koya o tinana qai vosavosataki koya. E kaya: “Au dau vinakata tu meu lomani, me so noqu itokani. Au lomaleqataka ni na sega ni dua ena lomani au baleta ni dau kaya tu ga o Na niu gone ca.”
13. E vakadeitaka vakacava o Lidia ni mareqeti koya o Jiova?
13 E vakadeitaka vakacava o Lidia ni mareqeti koya o Jiova? Ni mai vulica na dina o Lidia, na nona dau vuli vakataki koya, na masu, kei na nodra vosa vakayalovinaka na mataveitacini e kila kina ni mareqeti koya o Jiova. E kaya: “E dau tukuna tu ga vei au o watiqu ni lomani au. E dau tukuna tale ga vei au na noqu itovo vinaka. Era dau cakava tale ga qori eso na noqu itokani.” O bau vakasamataka e dua mo vukea me kila ni mareqeti koya o Jiova?
MEDA RAICI KEDA ENA RAI NEI JIOVA
14. Eda na kila vakacava na rai nei Jiova me baleti keda ena 1 Samuela 16:7? (Raica tale ga na kato “Cava e Mareqeti Ira Kina Nona Tamata o Jiova?”)
14 Mo nanuma tiko ni sega ni raici iko o Jiova mai na rai ni vuravura. (Wilika 1 Samuela 16:7.) O vuravura e kauaitaka ga na irairai, na levu ni nomu ilavo, kei na nomu vuli vinaka. Ia e sega raica qori o Jiova. (Aisea 55:8, 9) Mo kua gona ni vakatautaka na kemu yaga ena rai ni vuravura, ia mo vakatautaka ena ivakatagedegede i Jiova. O na rairai wilika na kedra italanoa eso e tukuni ena iVolatabu nira vakatitiqataka na kedra yaga, me vakataki Ilaija, Neomai, kei Ana. Ia e mareqeti ira o Jiova. De dua o na via vola tale ga eso na veika o sotava o vakadeitaka kina ni lomani iko dina o Jiova, e mareqeti iko tale ga. Kena ikuri, o rawa ni dikeva na ulutaga me baleta na yalolailai kei na vakatitiqa ena noda ivola.c
15. Na cava e ‘mareqeti Taniela kina vakalevu’ o Jiova? (Taniela 9:23)
15 Mo kila tiko ni mareqeti iko o Jiova ena nomu yalodina. De dua ni sa yabaki 90 vakacaca na parofita o Taniela e vakila ni ‘oca sara ga,’ e yalolailai tale ga. (Tani. 9:20, 21) E vakayaloqaqataki koya vakacava o Jiova? E tala na agilosi o Keperieli me lai tukuna vei Taniela ni “mareqeti vakalevu,” sa rogoci tale ga nona masu. (Wilika Taniela 9:23.) Na cava e tukuni kina ni mareqeti Taniela vakalevu na Kalou? Ni dau cakava na ka dodonu, e yalodina tale ga. (Isik. 14:14) E maroroya o Jiova na kena italanoa ena nona Vosa meda vakacegui kina. (Roma 15:4) E rogoca tale ga o Jiova nomu masu, e mareqeti iko ni o dau cakava na ka dodonu kei na nomu yalodina vua.—Maika 6:8, vmr.; Iper. 6:10.
16. Na cava mo cakava mo raici Jiova kina me Tamamu dauloloma?
16 Mo raici Jiova me Tamamu dauloloma. E vinakata me vukei iko, e sega ni dau vaqara cala. (Same 130:3; Maciu 7:11; Luke 12:6, 7) Nira vakasamataka vakatitobu qori e levu, era sega kina ni beci ira. Kena ivakaraitaki o Michelle, e dua na tacida yalewa mai Sipeni, e vica vata na yabaki nona dau vosavosataki koya o watina, e nanuma kina ni sega ni lomani, e yalolailai tale ga. E kaya: “Niu dau yalolailai, au saga meu raitayaloyalotaka ni keveti au tiko o Jiova, e lomani au, e taqomaki au.” (Same 28:9) E kaya e dua na tacida yalewa o Lauren, mai Sauca Aferika: “Ke sa vagolei au mai o Jiova ena ivau ni loloma, e vukei au me keirau veivolekati ena gauna kece qo, e vakayagataki au tale ga meu vakavulica eso tale, qori e vakaraitaka ni mareqeti au, e tiko tale ga na kequ yaga.”—Osea 11:4.
17. O na kila vakacava ni vakadonui iko o Jiova? (Same 5:12) (Raica tale ga na iyaloyalo.)
17 Mo vakadeitaka ni vakadonui iko o Jiova. (Wilika Same 5:12.) E vakatauvatana o Tevita na veivakadonui i Jiova kei na dua “na isasabai levu” e taqomaki ira na yalododonu. Ni o kila ni vakadonui iko o Jiova e tokoni iko tale ga, o na sega kina ni vakatitiqa. O na kila vakacava ni vakadonui iko o Jiova? Me vaka eda sa vulica mai, e vakayagataka nona Vosa. E vakayagataki ira tale ga na qase ni ivavakoso, itokani voleka, kei na so tale meda kila kina ni mareqeti keda. Na cava mo cakava nira vakayaloqaqataki iko?
Eda na sega ni beci keda nida kila ni vakadonui keda o Jiova (Raica na parakaravu 17)
18. Na cava mo ciqoma kina nodra vosa ni veivakacaucautaki na tacida?
18 Mo kua ni vakawalena na nodra vosa ni veivakayaloqaqataki o ira na kilai iko, era lomani iko. Nanuma tiko, de dua e vakayagataki ira o Jiova mera vukei iko mo kila ni vakadonui iko. E kaya o Michelle, sa tukuni oti mai: “Toso na gauna, au sa qai vulica meu ciqoma na nodra vosa ni vakavinavinaka na taciqu. E sega ni rawarawa, ia au kila ni vinakata o Jiova meu cakava qori.” E yaga vei Michelle na nodra veivuke vakayalololoma na qase ni ivavakoso. Sa painia tiko ena gauna qo, e veivuke tale ga e Peceli ni cakacaka ga mai vale.
19. O vakadeitaka vakacava ni o mareqeti ena mata ni Kalou?
19 E tukuna vei keda o Jisu ni mareqeti keda vakalevu na Tamada vakalomalagi. (Luke 12:24) Meda vakadeitaka gona ni mareqeti keda o Jiova. Meda kua vakadua ni guilecava qori! Meda saga tale ga meda vukea eso tale mera kila ni mareqeti ira na Kalou!
SERE 139 Mo Raica ni sa Vou na ka Kece
a Sa veisau eso na yaca.
b Kena irairai ni o Meri Makitala e dua vei ira na yalewa era veitomani kei Jisu. Era vakayagataka nodra iyau mera tokoni Jisu kina kei ratou na yapositolo.—Maciu 27:55, 56; Luke 8:1-3.
c Kena ivakaraitaki, raica na wase 24 ni ivola Toro Voleka Vei Jiova, wilika tale ga na tikinivolatabu kei na italanoa vakaivolatabu ena ulutaga “Vakatitiqa” ena ivola iDusidusi ena Noda Bula vaKarisito.