Ka Mo Cakava ni o Vakatitiqa

1-2. (a) Na cava eso na ka eda na rairai vakatitiqataka na tamata i Jiova? (b) Cava eda na veivosakitaka ena ulutaga qo?

KE DA gone se qase, eda dau vakatitiqaa kece ena so na gauna. Kena ivakaraitaki, ena rairai taroga e dua na dautukutuku gone ke kauaitaki koya dina o Jiova. Ena vuku ni tikina qori, ena rairai lomalomarua me papitaiso. Dua tale na ivakaraitaki, vakasamataka e dua na tacida tagane uabula e digia me vakaliuca na Matanitu ni Kalou ni se itabagone, sega ni digia me rawa ilavo vakalevu. Ni lailai nodratou ilavo vakavuvale ena gauna qo, ena rairai vakasamataka ke donu nona vakatulewa sa oti. Se, vakasamataka e dua na tacida yalewa itabaqase sa malumalumu. De dua ena yalolailai ni sega ni rawa ni cakava na ka e dau cakava tu e liu. Vakacava o dau taroga: ‘E kauaitaki au dina o Jiova? E yaga noqu vakuai au meu qaravi koya? Au se yaga tiko ga vei Jiova?’

² Ke da sega ni sauma na taro qori, ena rawa sara ga ni vakaleqa na noda qaravi Jiova. Eda na veivosakitaka ena ulutaga qo e vica na ivakavuvuli vakaivolatabu meda muria nida nanuma (1) ni sega ni kauaitaki keda o Jiova, (2) ke da veivutunitaka noda vakatulewa meda qaravi Jiova, se (3) nida sega ni rawata na ka eda dau cakava tu e liu.

NA CAVA MEDA CAKAVA NIDA VAKATITIQA?

3. Na cava e dua na sala me wali kina noda vakatitiqa?

³ Dua na sala me wali kina noda vakatitiqa, ya meda qara na kena isau ena Vosa ni Kalou. Ke da cakava qori, eda na vakayaloqaqataki, ena dei noda veitokani kei Jiova, eda na rawa tale ga ni “tudei ena vakabauta.”​—1 Kor. 16:13.

4. Sala cava meda “vakadeitaka” kina na “dina ni ka kece”? (1 Cesalonaika 5:21)

⁴ Wilika 1 Cesalonaika 5:21. E uqeti keda na iVolatabu meda “vakadeitaka na dina ni ka kece.” Eda na cakava vakacava? Nida vakatauvatana na ka eda vakabauta kei na ka e kaya na iVolatabu. Kena ivakaraitaki, vakasamataka na dautukutuku gone e nanuma ni sega ni kauaitaki koya dina na Kalou. Vakacava me vakabauta ni dina qori? Sega. E bibi me “vakadeitaka na dina ni ka kece” ni vulica na iVolatabu me kila na rai i Jiova me baleti koya.

5. Eda na kila vakacava na rai i Jiova me baleta noda taro?

⁵ Nida wilika na Vosa ni Kalou, eda “rogoca” ni vosa tiko vei keda o Jiova. Ia e vinakati na sasaga meda kila nona rai me baleta e dua noda taro. E vinakati meda wilika na wase ni iVolatabu ena sauma noda taro. Eda rawa ni vakekeli ena ivola e vakarautaka na isoqosoqo i Jiova. (Vkai. 2:​3-6) E bibi meda masuti Jiova me vukei keda ena noda vakekeli me rawa nida kila nona rai ena noda taro. Oti meda raica na ivakavuvuli vakaivolatabu kei na so tale na itukutuku ena ganita na keda ituvaki. Kena ikuri, ena rawa ni yaga noda dikeva nodra ivakaraitaki eso e tukuni ena iVolatabu e dau va tale ga qori nodra rai.

6. Ena saumi vakacava noda taro nida tiko ena soqoni?

⁶ Eda na “rogoca” tale ga ni vosa tiko vei keda o Jiova nida vulica na iVolatabu ena noda soqoni. Ke da tiko wasoma ena soqoni, ena rawa ni saumi noda taro nida rogoca e dua na ka ena ivunau, se nona ivakamacala e dua. (Vkai. 27:17) Meda veivosakitaka mada na sala me saumi kina noda taro.

KE O NANUMA NI SEGA NI KAUAITAKI IKO O JIOVA

7. Na taro cava era na rairai taroga eso?

⁷ O bau taroga: ‘E kauaitaki au dina o Jiova?’ Ke o dau beci iko, o na rairai nanuma ni dredre mo drau veitokani kei na Dauveibuli. A rairai va tale ga qori na rai nei Tui Tevita. E qoroqoro ni kauaitaki keda o Jiova, e taroga: “Kemuni Jiova, na cava na tamata moni kauaitaki koya kina, na luve ni tamata moni nanumi koya kina?” (Same 144:3) Eda na raica e vei na isaunitaro qo?

8. Me salavata kei na 1 Samuela 16:​6, 7, 10-12, na cava e raica vei keda o Jiova?

⁸ Eda vulica ena iVolatabu ni o Jiova e kauaitaki ira era rairai beci tu. Kena ivakaraitaki, e talai Samuela o Jiova ina vuvale nei Jese me lumuta e dua na luvena tagane me na tui Isireli. E walu na luvena tagane o Jese, e kaciva mai e vitu me ratou sotavi Samuela, sega ni wili kina o koya e gone duadua o Tevita.b Ia o Jiova e digitaki Tevita. (Wilika 1 Samuela 16:​6, 7, 10-12.) E raica o Jiova na lomana ni dau mareqeta na ka vakayalo.

9. Na cava mo nuidei kina ni kauaitaki iko o Jiova? (Raica tale ga na iyaloyalo.)

⁹ Vakasamataka na sala e vakaraitaka kina o Jiova ni kauaitaki iko ena gauna sa oti. E vakarautaka na ivakasala vinaka duadua me ganita na kemu ituvaki. (Same 32:8) Qori e vakaraitaka ni kilai iko vinaka. (Same 139:1) Ni o muria na ivakasala i Jiova qai raica na kena yaga vei iko, o na nuidei ni kauaitaki iko. (1 Vei. 28:9; Caka. 17:​26, 27) E kila o Jiova nomu sasaga. E kila nomu itovo vinaka, e vinakata sara ga mo drau veitokani. (Jere. 17:10) Ena marau ke o via nona iTokani tale ga.​—1 Joni 4:19.

KE O NANUMA NI SEGA NI DONU NOMU VAKATULEWA SA OTI

10. Na cava eda na rairai taroga nida vakasamataka noda vakatulewa sa oti?

¹⁰ Toso na gauna, era rairai vakasamataka eso ke donu nodra vakatulewa. De dua era biuta nodra cakacaka vinaka se bisinisi me rawa nira vakarabailevutaka nodra qaravi Jiova. Ia qo sa rairai oti e vica vata na yabaki. Era na rairai kila eso nodra itokani era sasagataka na cakacaka vinaka, vaka mera sa tikovinaka tale ga. Era na rairai taroga: ‘E yaga noqu vakuai au meu qaravi Jiova? Seu sa calata tiko kina eso na ka vinaka?’

11. Na raicala cava e tiko vei koya e vola na Same 73?

¹¹ Ke o dau taroga tale ga qori, dikeva mada nona rai o koya e vola na ika73 ni Same. E raica ni vaka mera bulabula vinaka o ira na sega ni qaravi Jiova, era vutuniyau, vaka me sega tu nodra leqa. (Same 73:​3-5, 12) Ni raici ira kei na nodra marautaka tu na nodra bula, e nanuma kina ni tawayaga nona sasaga me qaravi Jiova. E “lomaleqa voli ena siga taucoko” ni vakasamataka tiko qori. (Same 73:​13, 14) Na cava e qai cakava?

12. Me vaka e tukuni ena Same 73:​16-18, na cava e cakava na daunisame me donu nona rai?

¹² Wilika Same 73:​16-18. E lako na daunisame ena itikotiko tabu i Jiova. Nona veimaliwai kei ira na tamata ni Kalou e donu tale kina nona rai. E kila ni vaka mera marautaka tiko eso nodra bula, ia e sega tu nodra inuinui ena gauna se bera mai. E vakila na vakacegu ni vakasama ni kila ni nona vakaliuca na veika vakayalo e vakatulewa vinaka duadua. E vakadeitaka gona me qaravi Jiova tiko ga.​—Same 73:​23-28.

13. Ke o nanuma ni sega ni donu nomu vakatulewa ena gauna sa oti, o na vakila vakacava na vakacegu ni vakasama? (Raica tale ga na iyaloyalo.)

¹³ O na vakila tale ga na vakacegu ni vakasama ena veivuke ni Vosa ni Kalou. Ena sala cava? Vakasamataka na veika vinaka o sa rawata, okati kina na veivakalougatataki i Jiova qai vakatauvatana na ka era rawata na sega ni qaravi Jiova. Era na rairai vakanuinui tu ga ena ka era rawata ena bula qo, ni sega tale ni dua na ka era nuitaka ena gauna se bera mai. Ia e solia tu vei iko o Jiova e levu na ka vinaka ena gauna qo qai yalataka ni na levu tale na ka o na rawata ena gauna se bera mai. (Same 145:16) Vakasamataka tale ga na taro qo: Vakacava eda na kila na ka ena yaco ena noda bula ke a duatani na noda vakatulewa? Ia e dua na ka eda kila: O ira na yavutaka nodra vakatulewa nira lomana na Kalou kei ira eso tale, era na sega sara ni calata na veika vinaka ra qai marautaka na bula.

KE O NANUMA NI SEGA NA KEMU YAGA VEI JIOVA

14. Na ituvaki cava era tu kina eso? Cava era na rairai taroga?

¹⁴ Eso na dauveiqaravi Jiova era sega ni rawa ni cakava e levu na ka ena vuku ni bula vaqase, tauvimate, se ra malumalumu. Era na rairai nanuma ke se tiko na kedra yaga vei Jiova. Era na rairai taroga: ‘Au se yaga tiko ga vei Jiova?’

15. Na cava e vakadeitaka o koya e vola na ika71 ni Same?

¹⁵ E lomaleqa tale ga va qori o koya e vola na ika71 ni Same. E masulaka: “Ni kua ni biuti au ni sa oti noqu kaukaua.” (Same 71:​9, 18) E vakadeitaka na daunisame ke qaravi Jiova tiko ga ena yalodina, ena dusimaki koya, ena tokoni koya tale ga. E vulica na daunisame ni o Jiova e marautaki ira era solia nodra vinaka taucoko mera qaravi koya, se mani vakacava na kedra ituvaki.​—Same 37:​23-25.

16. Sala cava era yaga tiko kina vei Jiova na itabaqase? (Same 92:​12-15)

¹⁶ Ke o itabaqase, vakasamataka na rai i Jiova me baleta na kemu ituvaki. E rawa ni vukei iko mo qaravi koya ena yalodina, ke lailai mada ga na ka o rawata. (Wilika Same 92:​12-15.) Vakasamataka ga na ka o rawa ni cakava, kua ni vakasamataka na ka o sega ni rawa ni cakava. Kena ivakaraitaki, o rawa ni vakayaloqaqataka eso tale ena nomu ivakaraitaki vinaka ni yalodina kei na veikauaitaki. O rawa ni talanoataka na sala e vukei iko kina o Jiova me vica vata na yabaki, kei na inuinui totoka o vakanamata kina. Kua ni guilecava ni yaga vakalevu nomu masulaki ira eso tale. (1 Pita 3:12) Se mani vakacava na keda ituvaki, e tiko na ka eda rawa ni cakava vei Jiova kei ira eso tale.

17. Na cava meda kua ni vakatauvatani keda kina kei ira eso tale?

¹⁷ Ke o nanuma ni sega ni levu na ka o rawa ni cakava ena nomu qaravi Jiova, mo nuidei ni mareqeta o koya na ka o rawa ni cakava. O na rairai vakatauvatana na ka o cakava kei ira eso tale. Me kua ni va qori nomu rai! Na vuna? Ni sega ni dau vakatauvatani keda o Jiova. (Kala. 6:4) Kena ivakaraitaki, e solia vei Jisu o Meri na waiwai saulevu, e boivinaka tale ga. (Joni 12:​3-5) Ia e biuta na yada dravudravua e rua na ilavo lailai sara ena valenisoro, na ka sara ga me bula kina. (Luke 21:​1-4) E raica o Jisu na iloloma ruarua qori me ivakaraitaki ni vakabauta. E mareqeta o Jiova na veika o cakava ena vuku ni nomu vakabauta kei na nomu lomani koya, ke o nanuma mada ga ni lailai.

18. Na cava ena vukei keda meda valuta na vakatitiqa? (Raica tale ga na kato “Ena Vukei Iko na Vosa i Jiova Mo Kua ni Vakatitiqa.”)

¹⁸ Eda dau vakatitiqa kece ena so na gauna. Me vaka eda vulica mai, ena rawa ni vukei keda na iVolatabu. Koya gona, saga mo kunea na isau ni nomu lomatarotaro, o na sega kina ni lomaleqa. E kilai iko vinaka o Jiova. E mareqeta na ka kece o vakuai iko kina mo vakaliuci koya, e yalataka tale ga me vakaicovitaki iko. Mo nuidei ni o Jiova e lomani ira kece na yalodina vua, e kauaitaki ira tale ga.