Vuna e Yaco Tiko Kina na iValu kei na iTovo Kaukaua
E kaya na iVolatabu na ka e vakavuna na ivalu kei na itovo kaukaua, kei na vuna e yaco tiko ga kina.
IVALAVALA CA
Na Kalou e buli rau na imatai ni noda itubutubu o Atama kei Ivi me rau ucui koya. (Vakatekivu 1:27) Kena ibalebale, rau na vakatotomuria na itovo ni Kalou me vaka na vakacegu kei na loloma. (1 Korinica 14:33; 1 Joni 4:8) Ia rau talaidredre vua na Kalou qai ivalavala ca. Kena itinitini? E dewa kina vei keda kece na ivalavala ca, eda mate tale ga. (Roma 5:12) E lai vakavuna meda vakasamataka na veika ca kei na itovo kaukaua, da qai cakava sara.—Vakatekivu 6:5; Marika 7:21, 22.
MATANITU VAKATAMATA
E sega ni buli keda na Kalou meda lewai keda ga. E kaya na iVolatabu: “E sega ni vu vua na tamata e lako tu me lewa na nona ilakolako.” (Jeremaia 10:23) Oya na vuna ena sega ni rawa ni vakaotia vakadua na matanitu vakatamata na ivalu kei na itovo kaukaua.
SETANI KEI IRA NONA TIMONI
E kaya na iVolatabu ni “lewa tiko na vunica na vuravura taucoko.” (1 Joni 5:19) Na “vunica” qori o Setani na Tevoro, e daulaba tale ga. (Joni 8:44) O koya kei ira na timoni era vakamuai ira na tamata mera veivaluvaluti, ra qai cakava na itovo kaukaua.—Vakatakila 12:9, 12.
Eda sega ni rawa ni vakaotia na ka e vakavuna na ivalu kei na itovo kaukaua.Na Kalou duadua ga e rawa ni cakava qori.