Vakilai na Vakacegu ena Gauna Dredre
A lewena tu na mataivalu o Gary. E kaya: “Ni bera niu vulica na iVolatabu, au sega ni kila na vuna e yaco tu kina e vuravura na leqa, veivakalolomataki, kei na veika tawadodonu. Ia qo e vakacegu noqu vakasama. Au kila ni Kalou o Jiova ena veisautaka na vuravura me rawa nida taqomaki vinaka kina.”
Sega ni o Gary ga e vakila qori. Raica na sala e yaga tale ga kina vei ira eso tale na ka e kaya na iVolatabu.
KA E KAYA NA IVOLATABU: “Ni o kemuni Jiova, oni vinaka qai tu vakarau moni veivosoti.”—Same 86:5.
KENA YAGA: “Au vakadeitaka ena tikinivolatabu qori ni o Jiova e dau yalololoma. E tu vakarau me vosota na ka kece au cakava ena gauna sa oti niu vakaitavi ena ivalu.”—Wilmar, Colombia.
KA E KAYA NA IVOLATABU: “Au sa bulia na lomalagi vou kei na vuravura vou, ena sega tale ni nanumi na ka makawa, ena sega ni tiko e lomamuni.”—Aisea 65:17.
KENA YAGA: “Au dau yalolailai qai nuiqawaqawataka na veika au sotava niu lewena tu na mataivalu. Ia e vakacegui au na tikinivolatabu qori, ni sa voleka na gauna me kauta laivi kina na Kalou noqu dau vakasamataka na veika ca e yaco, kei na noqu tadra na ka vakadomobula. Ena sega ni tiko tale e lomaqu se noqu vakasama. Qori e dua dina na ka totoka!”—Zafirah, Merika.
KA E KAYA NA IVOLATABU: “Ena nona siga era na buroro na yalododonu, ena qai vakilai na sautu me yacova ni oti na vula.”—Same 72:7.
KENA YAGA: “Au dau vakasamataka vakalevu na veivosa qori. Sa voleka na gauna me oti kina na ivalu, kei na ka vakadomobula e dau yaco kina. Eda na sega ni leqataka tiko nodra taqomaki noda vuvale.”—Oleksandra, Ukraine.
KA E KAYA NA IVOLATABU: “Era na bula na nomuni mate. . . . Moni yadra moni kaila ena reki o kemuni na tiko ena kuvuniqele!”—Aisea 26:19.
KENA YAGA: “Voleka nira vakamatei kece noqu vuvale ena kena sagai mera vakawabokotaki na Tutsi. Ia e vakanuideitaki au na tikinivolatabu qori niu na raici ira tale. Au vakanamata meu na rogoca tale na domodra ena veivakaturi!”—Marie, Rwanda.
KA E KAYA NA IVOLATABU: “Malua mada vakalailai, sa na sega vakadua na daucaka ca . . . Ia era na taukena na vuravura na yalomalumalumu, era na kunea na marau vakasakiti ena levu ni vakacegu.”—Same 37:10, 11.
KENA YAGA: “Dina ni sa oti na ivalu, ia e yaco tiko ga na veika tawadodonu kei na ivakarau ca. E vakayaloqaqataki au gona na tikinivolatabu qori, ni o Jiova e raica qai kila vinaka na kequ ituvaki. E yalataka ni sa na vakarau vakaotia na rarawa kece, qai sega tale ni nanumi.”—Daler, Tajikistan.
O ira na cavuti ena mekesini qo era maliwai ira na vica vata na milioni na iVakadinadina i Jiova. E vukei ira tale ga na iVolatabu mera vakila na vakacegu. Era sa kila na sala mera vosota kina na veivakaduiduitaki vakamatatamata, vakamatanitu, yavusa kei na veicati. (Efeso 4:31, 32) Era dau tawaveitovaki na iVakadinadina i Jiova, ra qai sega ni vakaitavi ena itovo kaukaua.—Joni 18:36.
Era dau veitokoni tale ga na iVakadinadina i Jiova e vuravura raraba. (Joni 13:35) Kena ivakaraitaki o Oleksandra sa cavuti oti mai. E dro kei tacina ina dua tale na matanitu ena vuku ni ivalu. E kaya: “Ni keirau takosova na iyala ni vanua, era kidavaki keirau mai na iVakadinadina i Jiova e kea. Nodra veitokoni e vukea me keirau matau ena vanua ya.”
Keimami sureti iko mo tomani keimami ena neimami soqoni. O na vulica kina na itukutuku veivakacegui ena iVolatabu kei na sala mo bulataka kina. Raica ena jw.org na vanua e voleka vei iko, se kerea mo vulica wale na iVolatabu kei na dua na iVakadinadina i Jiova, ni vakayagataki na ivola Marau me Tawamudu!