E Yaga Vakacava Vei Iko na Veivosoti i Jiova?

1. Na cava e sega ni dau matata kina ena so na gauna noda veivosoti na tamata?

“AU SA VOSOTI IKO.” E veivakacegui sara ga na vosa qori, vakabibi ke o kila ni ka o tukuna se cakava e vakararawataka e dua! Ia na cava na ibalebale ni matavosa “Au sa vosoti iko”? Vakacava e kaya tiko o koya ni drau sa veitokani vinaka tale? Se, sa sega ni via veivosakitaka tale nomudrau veileqaleqati? Na noda veivosoti gona na tamata e rawa ni sega ni matata ena so na gauna.

2. E vakamacalataki vakacava ena iVolatabu na veivosoti i Jiova? (Raica tale ga na ivakamacala e ra.)

² E duidui nona vosoti keda o Jiova ni vakatauvatani kei na noda veivosoti. E duatani duadua na veivosoti i Jiova. E tukuna na daunisame me baleta na noda Kalou: “E tu ga vei kemuni na veivosoti dina, me rawa ni oni qoroi tu ga.”a (Same 130:4) Io, na veivosoti i Jiova e “veivosoti dina.” E vakaraitaka vei keda na ibalebale dina ni veivosoti. Era vakayagataka na dauvola iVolatabu ena so na tikinivolatabu vakaIperiu e dua na vosa e vakamacalataka na veivosoti i Jiova, ia era sega ni vakayagataka na vosa qori me vakamacalataka na noda veivosoti na tamata.

3. E duatani vakacava na veivosoti i Jiova? (Aisea 55:​6, 7)

³ Ni vosota e dua o Jiova, sa bokoci vakadua na nona ivalavala ca. E vinaka tale na nodrau veitokani. Eda vakavinavinakataka ni dau veivosoti dina mai vu ni lomana o Jiova, e dau tu vakarau tale ga e veigauna me veivosoti.​—Wilika Aisea 55:​6, 7.

4. E vukei keda vakacava o Jiova meda kila na ibalebale dina ni nona veivosoti?

⁴ Ke duatani sara na veivosoti i Jiova, ena rawa vakacava nida kila na tamata ivalavala ca na kena ibalebale dina? E vukei keda o Jiova ni vakayagataka eso na vosa vakatautauvata totoka me vakamacalataka nona veivosoti. Eda na dikeva ena ulutaga qo eso. Eda na kila na sala e kauta tani kina o Jiova na ivalavala ca qai vakadonuya meda veitokani vinaka tale kei koya. Nida dikeva na vosa vakatautauvata qori, eda na lomani koya kina vakalevu, eda na vakavinavinakataka tale ga na nona yalovinaka me veivosoti vakalevu.

E KAUTA TANI O JIOVA NODA IVALAVALA CA

5. Na cava e yaco ni vosota o Jiova na noda ivalavala ca?

⁵ Levu na gauna e vakatauvatana na iVolatabu na ivalavala ca me icolacola bibi. E vakamacalataka va qo o Tui Tevita na nona ivalavala ca: “[Na] noqu cala sa sivia na uluqu, vaka na icolacola bibi, au sa sega ni colata rawa.” (Same 38:4) O Jiova e vosota na nodra ivalavala ca na veivutuni. (Same 25:18; 32:5) Na vosa vakaIperiu e vakadewataki me “vosota,” e kena ibalebale me “laveta” se “colata.” Eda rawa ni vakasamataki Jiova me vaka e dua na tagane kaukaua e laveta tani mai tabada na icolacola bibi ni ivalavala ca qai kauta tani.

6. E vakacava na yawa ni vanua e kauta tani kina o Jiova na noda ivalavala ca?

⁶ E vakayagataka na iVolatabu e dua tale na vosa vakatautauvata me vakaraitaka na yawa ni vanua e kauta tani kina o Jiova noda ivalavala ca. E kaya na Same 103:12: “Me vaka na yawa ni icabecabe ni siga mai na idromudromu ni siga, sa biuta vakayawa vei keda o koya na noda cala.” E yawa sara na icabecabe ni siga mai na kena idromudromu. Rau na sega vakadua ni sota. Kena ibalebale, e kauta tani vakayawa o Jiova na noda ivalavala ca. E vakacegui keda sara ga na sala e veivosoti kina!

7. E vakamacalataka vakacava na iVolatabu na ka e cakava o Jiova ena noda ivalavala ca? (Maika 7:​18, 19)

⁷ Ni kauta tani vakayawa o Jiova na noda ivalavala ca, vakacava e taura tu ga? Sega. E vola o Tui Esekaia me baleti Jiova: “Oni biuta i dakumuni na noqu ivalavala ca kece.” (Aisea 38:​9, 17) E vakaraitaka na vosa vakatautauvata qori ni viritaka laivi o Jiova na nodra ivalavala ca na veivutuni me kua tale ni raica. E rawa tale ga ni vakadewataki va qo na yatuvosa qori: “Oni sa guilecava vakadua [na noqu ivalavala ca].” E vakabibitaka tale na iVolatabu na tikina qori ena dua tale na vosa vakatautauvata ena Maika 7:​18, 19. (Wilika.) E tukuni kina ni biuta o Jiova na noda ivalavala ca ina wasa titobu. Ena gauna makawa, ena dredre me kau lesu mai e dua na ka e viritaki ina wasa titobu.

8. Na cava eda sa vulica mai?

⁸ Eda vulica ena vica na vosa vakatautauvata qori, ni gauna e vosoti keda kina o Jiova e sa guilecava vakadua, meda kua ni leqataka tale tiko. E dina sara ga na ka e tukuna o Tevita: “Era marau o ira e vosoti nodra caka cala qai ubi na nodra ivalavala ca, e marau o koya ena sega ni wilika o Jiova na nona ivalavala ca.” (Roma 4:​7, 8) Qori na veivosoti dina!

E SAVATA TANI O JIOVA NA IVALAVALA CA

9. Na vosa vakatautauvata cava e vakayagataka o Jiova meda kila kina na levu ni nona veivosoti?

⁹ E vakayagataka o Jiova eso tale na vosa vakatautauvata, meda vakavinavinakataka kina nona savata tani nodra ivalavala ca na veivutuni ena vuku ni isoro ni veivoli. E tukuni ena iVolatabu ni o Jiova e savata qai vuya na ivalavala ca qori. Qori e vakasavasavataki koya e valavala ca. (Same 51:7; Aisea 4:4; Jere. 33:8) E vakamacalataka sara ga o Jiova na kena yaga: “Ke damudamu na nomuni ivalavala ca, ena vakavulavulataki me vaka na ucacevata, ke damu me vaka na tikinisulu kulakula, ena vaka na vutinisipi.” (Aisea 1:18) Sa bau dredre me kau tani na roka damudamu e tauva e dua na tikinisulu. Ia e vakayagataka o Jiova na vosa vakatautauvata qo me vakadeitaka vei keda ni rawa ni savata tani vakadua noda ivalavala ca me kua tale ni laurai.

10. Na vosa vakatautauvata cava tale e vakayagataka o Jiova me dusia na levu ni nona veivosoti?

¹⁰ Me vaka e tukuni ena ulutaga sa oti, na ivalavala ca e vaka na “dinau.” (Maciu 6:​12, vmr.; Luke 11:​4, vmr.) Kena ibalebale na gauna kece eda valavala ca kina vei Jiova, e toso cake tiko ga na noda dinau. Sa bini tu vua na noda dinau! Ia ni vosoti keda, e vaka sara ga e bokoca na dinau qori. E sega ni tukuna meda sauma na itotogi ni ivalavala ca sa vosota oti. E veivakacegui sara ga na vosa vakatautauvata qori nida kila ni sa vosoti keda o Jiova!

11. Na cava na kena ibalebale ni tukuna na iVolatabu ni sa ‘boko’ na noda ivalavala ca? (Caka. 3:19)

¹¹ O Jiova e sega wale ga ni vosota noda ivalavala ca se dinau, e bokoca sara ga vakadua. (Wilika Cakacaka 3:19.) Ni boko na dinau, eda na rairai vakasamataka e dua na korosi levu (X) e biu tu ena dinau qori. Eda se rawa tiko ga ni raica na naba ena ruku ni korosi qori. Ia e duatani ni sa boko. Meda kila vinaka na vosa vakatautauvata qo, me nanumi tiko na iqi ni volavola ena gauna makawa e rawarawa ni boko ena wai. E rawa ni dua e vakayagataka na isulu suasua me qusia tani kina na ka e volai. Koya gona ni “bokoci” na dinau, sa na sega ni laurai tale na ka e volai tu. E vaka ga a sega tu na dinau. Eda marau vakalevu meda kila ni sega wale ga ni vosota o Jiova na noda ivalavala ca, ia e bokoca sara ga vakadua!​—Same 51:9.

12. Na cava eda vulica ena vosa vakatautauvata me baleta na o vavaku?

¹² E vakayagataka o Jiova e dua tale na vosa vakatautauvata me vakamacalataka na sala e bokoca kina na noda ivalavala ca. E kaya: “Au na tabonaka na nomu cala me vaka na o, kei na nomu ivalavala ca me vaka na o vavaku.” (Aisea 44:22) Ni veivosoti o Jiova, e vaka ga e taura na noda ivalavala ca qai vunia ena o vavaku me kua tale ni laurai.

13. Na cava meda cakava ni sa vosota o Jiova noda ivalavala ca?

¹³ Na cava eda vulica ena vica na vosa vakatautauvata qori? Ni vosota o Jiova noda ivalavala ca, meda kua tale ni lomaleqataka tiko ena vo ni noda bula. Ena vuku ni dra i Jisu Karisito, e bokoci vakadua na noda dinau. E vaka ga eda sega ni valavala ca. Qori na veivosoti dina i Jiova ke da veivutunitaka noda ivalavala ca.

VAKADONUYA O JIOVA MEDA VEITOKANI TIKO GA KEI KOYA

14. Na cava meda nuitaka kina na veivosoti i Jiova? (Raica tale ga na iyaloyalo.)

¹⁴ Ni veivosoti dina o Jiova e rawa kina nida veitokani vinaka tale kei koya. E yaga vei keda qori me kua ni ca tiko na lomada. Meda kua ni nanuma ni cudru tiko ga o Jiova qai qara na sala me totogitaki keda kina. Ena sega tu ga ni cakava qori. Na cava meda nuitaka kina nona tukuna o Jiova ni sa vosoti keda? E tukuna o Jiova vua na parofita o Jeremaia: “[Au] na vosota na nodra cala, au na sega tale ni nanuma na nodra ivalavala ca.” (Jere. 31:34) A cavuta tale ga qori na yapositolo o Paula, e kaya: “Au na sega ni nanuma tale na nodra ivalavala ca.” (Iper. 8:12) Ia na cava na kena ibalebale qori?

15. Na cava na kena ibalebale ni sega ni nanuma tale o Jiova na noda ivalavala ca?

¹⁵ Ni tukuni ena iVolatabu na vosa “nanuma,” e sega ni kena ibalebale tu ga meda vakasamataka e dua na ka sa yaco oti. E rawa ni kena ibalebale tale ga me caka kina e dua na ka. E kerea na dau basulawa e lili tu ena kau: “Jisu, qai nanumi au ni oni sa tiko ena nomuni Matanitu.” (Luke 23:​42, 43) A sega ni kerea tiko me vakasamataki koya o Jisu ena gauna ya. Ia na ka e tukuna o Jisu e vakaraitaka ni na vakaturi koya na dau basulawa qori. Ni tukuna gona o Jiova ni sega ni nanuma tale na noda ivalavala ca, kena ibalebale ga ni sa vosoti keda. Koya gona, ena sega ni totogitaki keda ena vuku ni ivalavala ca qori ni toso na gauna.

16. E vakamacalataka vakacava na iVolatabu na galala e vu mai na veivosoti dina?

¹⁶ E vakayagataka na iVolatabu e dua tale na vosa vakatautauvata meda kila kina na ibalebale ni galala e vu mai na veivosoti dina. Nida kawa ivalavala ca, eda sa “bobula ina ivalavala ca.” Ia ni vosoti keda o Jiova, eda vaka sara ga na bobula e “sereki . . . mai na ivalavala ca.” (Roma 6:​17, 18; Vkta. 1:5) Io, nida kila ni vosoti keda o Jiova, eda marau vakalevu me vaka ga na bobula e sereki.

17. E yaga vakacava na veivosoti i Jiova meda vakabulai kina? (Aisea 53:5)

¹⁷ Wilika Aisea 53:5. Na iotioti ni vosa vakatautauvata e vakatauvatani keda kei ira na tauvimate bibi. Na isoro ni veivoli e vakarautaka o Jiova ena vuku i Luvena, eda vakabulai kina. (1 Pita 2:24) A vakaleqai na noda veiwekani kei Jiova nida tauvimate vakayalo, ia na ivoli e rawa ni vinaka tale kina noda veiwekani kei koya. Me vaka ga nona marau vakalevu o koya e bula mai na tauvimate bibi, eda marau tale ga vakalevu nida vakabulai vakayalo qai vakadonui keda o Jiova ena vuku ni nona veivosoti.

YAGA VEI KEDA NA VEIVOSOTI I JIOVA

18. Na cava eda vulica ena vica na vosa vakatautauvata me baleta na veivosoti i Jiova? (Raica tale ga na kato “E Vosoti Keda o Jiova.”)

¹⁸ Na cava eda vulica ena vica na vosa vakatautauvata me baleta na veivosoti i Jiova? Ni sa veivosoti, e vu dina mai lomana, ena sega ni nanuma tale tiko. Eda veiwekani vinaka kina kei na Tamada vakalomalagi. Kena ikuri, meda nanuma ni veivosoti dina e dua na iloloma talei, e sega ni ganiti keda. Ia e rawati ga ena loloma i Jiova kei na nona loloma soli wale vei keda na kawa ivalavala ca.​—Roma 3:24.

19. (a) Na cava meda marau kina vakalevu? (Roma 4:8) (b) Cava ena vakamacalataki ena ulutaga tarava?

¹⁹ Wilika Roma 4:8. Eda marau vakalevu ni Kalou o Jiova e dau “veivosoti dina”! (Same 130:4) Ia e vakatau tiko ena dua na ka bibi. E tukuna o Jisu: “Ke dou sega ni vosoti ira era cala vei kemudou, ena sega tale ga ni vosoti kemudou na Tamamudou.” (Maciu 6:​14, 15) E bibi gona meda vakatotomuria na veivosoti i Jiova. Ia eda na cakava vakacava qori? Ena vakamacalataki ena ulutaga tarava na ka e vauci kina.