Mo Vakabauta na Veivosoti i Jiova

1-2. Na cava era na vakila o ira era veivutunitaka nodra ivalavala ca? (Raica tale ga ena waqana.)

E KILA vinaka o Tui Tevita na ka era dau vakila o ira e ora na lomadra ena vuku ni nodra cala makawa. (Same 40:12; 51:​3, ulu ni same) A cakava o koya eso na cala bibi. Ia e vakaraitaka ni veivutuni dina qai vosoti koya o Jiova. (2 Sam. 12:13) E kila vinaka tale ga o Tevita na cava na lomavakacegu ni vosoti koya o Jiova.​—Same 32:1.

² Me vakataki Tevita, eda na vakila tale ga na lomavakacegu ni vosoti keda o Jiova. E veivakacegui meda kila ni tu vakarau o Jiova me vosota noda ivalavala ca ke da veivutuni dina, vakatusa noda ivalavala ca qai saga meda kua ni cakava tale, ke cala bibi mada ga! (Vkai. 28:13; Caka. 26:20; 1 Joni 1:9) E veivakacegui tale ga meda kila ni gauna e veivosoti kina o Jiova, e vosoti keda dina me vaka ga eda a sega ni valavala ca!​—Isik. 33:16.

3-4. Na cava e vakila e dua na tacida yalewa ni papitaiso oti? Cava eda na veivosakitaka ena ulutaga qo?

³ Eso na gauna, e dredre mera vakabauta eso ni sa vosoti ira o Jiova. Dikeva mada nona ivakaraitaki o Jennifer, a susu ena dina. Ni se itabagone, e cakava e levu na ka ca, e rua tu nona ivakarau ni bula. Oti e vica na yabaki, sa qai lesu vei Jiova, e cakava tale ga na veiveisau me rawa ni papitaiso. E kaya: “E liu au dau domodomoiyau, au dau veiyacovi tawadodonu, au dau gunu vakasivia, au cudrucudru tale ga. Au kila ni tukuna na iVolatabu, keu kerea na veivosoti i Jiova qai veivutuni, au na vosoti ena vuku ni isoro i Karisito. Ia e lomaqu au kaya tu ga niu se sega ni vosoti.”

⁴ Vakacava e dau dredre tale ga ena so na gauna mo vakabauta ni sa vosota o Jiova nomu cala makawa? E vinakata o Jiova meda vakila nona yalololoma me vakataki Tevita. Eda na veivosakitaka ena ulutaga qo na vuna e bibi kina meda vakabauta na veivosoti i Jiova, kei na ka meda cakava meda vakabauta kina nona veivosoti.

CAVA E BIBI KINA MEDA VAKABAUTA NA VEIVOSOTI I JIOVA?

5. Na cava e vinakata o Setani meda vakabauta? Tukuna e dua na ivakaraitaki.

⁵ Nida vakabauta na veivosoti i Jiova, eda na vorata kina e dua na dai nei Setani. Nanuma tiko, ena saga o Setani e dua na sala meda kua kina ni qaravi Jiova. E cakava qori ni saga meda vakabauta ni sega ni vosoti na noda ivalavala ca. Dikeva nona ivakaraitaki na tagane e Korinica e biu tani mai na ivavakoso, ni a veiyacovi tawadodonu. (1 Kor. 5:​1, 5, 13) Na gauna e veivutuni kina, e vinakata o Setani mera kua ni vosoti koya na lewe ni ivavakoso, mera kua tale ga ni ciqomi koya. Ena gauna vata qori, e vinakata o Setani me nanuma na tagane qori ni sega ni vosoti rawa, me “luvuci ena levu ni rarawa” me kua kina ni qaravi Jiova. E sega ni veisau na ivadi nei Setani. Ia eda “sega ni lecava na nona ilawaki.”​—2 Kor. 2:​5-11.

6. Na cava meda cakava me kua ni ora tale tiko na lomada?

⁶ Nida vakabauta na veivosoti i Jiova, ena sega ni ora tale tiko na lomada. Nida caka cala, ena ca ga na lomada. (Same 51:17) E vinaka qori. Ena uqeti keda kina noda lewaeloma meda cakava na veiveisau qai cakava na ka dodonu. (2 Kor. 7:​10, 11) Ia ke ora tiko ga vakasivia na lomada nida sa veivutunitaka mada ga noda ivalavala ca, eda na rawa ni soro. Nida vakabauta na veivosoti i Jiova, meda guilecava sara ga noda ivalavala ca, me kua ni ora tale tiko na lomada. Nida cakava qori, eda na marautaka vakalevu noda qaravi Jiova ena lewaeloma e savasava. (Kolo. 1:​10, 11; 2 Tim. 1:3) Ia eda na vakadeitaka vakacava e lomada ni vosoti keda dina o Jiova?

CAVA MEDA CAKAVA MEDA VAKABAUTA KINA NA VEIVOSOTI I JIOVA?

7-8. Na cava e tukuna o Jiova vei Mosese me baleti koya? Cava meda nuidei kina? (Lako Yani 34:​6, 7)

⁷ Dau vakasamataka na ka e tukuna o Jiova me baleti koya. Kena ivakaraitaki, dikeva na ka e tukuna o Jiova vei Mosese e Ulu i Saineai.a (Wilika Lako Yani 34:​6, 7.) E levu na ka e rawa ni tukuna o Jiova me baleta nona itovo kei na ka e dau cakava, ia e raica ni veiganiti me tukuna ni o koya e “Kalou dauyalololoma qai dauveinanumi.” Vakacava ena dredre me vosota e dua nona dauveiqaravi e veivutunitaka dina nona ivalavala ca? Sega! Qori ena vakaraitaka ni sega ni yalololoma, e yalodua tale ga, na itovo e sega sara ga ni kilai kina o Jiova.

⁸ Ni Kalou daudina o Jiova, eda nuidei ni na sega ni veisautaka na ka e tukuna me baleti koya. (Same 31:5) Kena ibalebale meda vakabauta na ka e tukuna. Ke se ora tiko ga na lomamu ena nomu cala makawa, mo taroga: ‘Au vakabauta ni dauyalololoma qai dauveinanumi dina o Jiova me rawa ni vosota e dua e veivutunitaka nona ivalavala ca? Cava tale meu vakatitiqataka kina ni sa vosoti au?’

9. Na cava na ibalebale ni sa vosoti noda ivalavala ca? (Same 32:5)

⁹ Dau vakasamataka na ka era vola na dauvola iVolatabu me baleta na veivosoti i Jiova. Kena ivakaraitaki, dikeva na ka e tukuna na dauvola iVolatabu o Tevita me baleta na veivosoti i Jiova. (Wilika Same 32:5.) E kaya: “Oni . . . vosota na ca ni noqu valavala ca.” Na vosa vakaIperiu e vakadewataki me “vosota” e kena ibalebale “laveta,” “kauta tani,” se “colata.” Koya gona, na gauna e vosoti Tevita kina o Jiova, e vaka ga e laveta nona ivalavala ca qai kauta tani. E vakila sara ga o Tevita na vakacegu, sa oti na ora ni lomana. (Same 32:​2-4) Eda rawa tale ga ni vakila na vakacegu qori. Nida veivutunitaka dina noda ivalavala ca, meda kua ni colata tale tiko na ora ni lomada, baleta ni sa laveta o Jiova qai kauta tani vei keda.

10-11. Na cava eda kila me baleti Jiova ena matavosa “tu vakarau [me] veivosoti”? (Same 86:5)

¹⁰ Wilika Same 86:5. E tukuna eke o Tevita me baleti Jiova ni “tu vakarau [me] veivosoti.” E tukuna e dua na ivoladusidusi ni iVolatabu ena matavosa qori me baleti Jiova: “[E] ‘dauveivosoti’​—e ‘kilai tani kina.’” Na cava e kilai tani kina o Jiova ni dauveivosoti? E tukuni ena ikarua ni icegu ni tikina qori: “E vuabale na dei ni nomuni loloma vei ira kece na kaci yani vei kemuni.” Eda vulica ena ulutaga sa oti, na dei ni loloma i Jiova e uqeti koya me lomani keda vakalevu, ena sega tale ga ni biuti keda nida sokaloutaki koya ena yalodina. Na dei ni nona loloma qori ena uqeti koya me “veivosoti totolo” vei ira kece na veivutunitaka nodra ivalavala ca. (Aisea 55:​7, vmr.) Ke dredre mo vakabauta ni vosoti iko, mo taroga: ‘Au vakabauta ni Dauveivosoti o Jiova qai tu vakarau me vosoti ira kece na veivutuni era kaciva nona veivosoti? Cava tale meu vakatitiqataka kina nona veivosoti niu tagici koya me vosoti au?’

¹¹ E veivakacegui meda kila ni o Jiova e kila vinaka na keda ituvaki ivalavala ca. (Same 139:​1, 2) Eda kila qori ena dua tale na same i Tevita, me rawa tale ga nida vakabauta na veivosoti i Jiova.

KUA NI GUILECAVA NA KA E NANUMA TIKO O JIOVA

12-13. Me vaka e tukuni ena Same 103:​14, na cava e nanuma tiko o Jiova me baleti keda? Cava e vinakata me cakava?

¹² Wilika Same 103:14. E tukuna o Tevita me baleti Jiova ni “nanuma tiko nida kuvuniqele.” Sa rauta me vakamacalataka o Tevita e dua na vuna levu e tu vakarau kina o Jiova me vosoti ira nona dauveiqaravi era veivutuni: E kila vinaka tu na keda ituvaki ivalavala ca. Me matata vei keda qori, meda dikeva vinaka na ka e tukuna o Tevita.

¹³ E tukuna me baleti Jiova ni “kila vinaka o koya na keda ibulibuli.” E buli Atama “mai na kuvuniqele,” e kila vinaka ni vakaiyalayala na ka e rawa ni cakava na tamata uasivi. Kena ivakaraitaki, e vinakati me kana, moce, me cegu tiko. (Vkte. 2:7) Ia ni rau sa valavala ca o Atama kei Ivi, sa dua tale na kena ibalebale na kuvuniqele. Nida kawa mai vei rau, eda sucu kaya na ivalavala ca, ya na vuna eda vinakata tu ga kina meda cakava na ka ca. E sega wale ga ni kila o Jiova na keda ituvaki ivalavala ca, ia e kaya o Tevita ni “nanuma tiko” nida ivalavala ca. Na vosa vakaIperiu e vakayagataki eke, e kena ibalebale me cakava na ka vinaka. Eda rawa ni tukuna va qo na ka e kaya o Tevita: E kila o Jiova nida na dau cala ena so na gauna. Ia ena gauna eda valavala ca kina qai veivutuni, e vinakata sara ga me vakaraitaka vei keda nona yalololoma kei na veivosoti.​—Same 78:​38, 39.

14. (a) E vakamacalataka vakacava o Tevita na rabailevu ni veivosoti i Jiova? (Same 103:12) (b) E laurai vakacava ena ivakaraitaki nei Tevita na ivakarau ni veivosoti i Jiova? (Raica na kato “Ni Veivosoti o Jiova, e Guilecava Tale Ga.”)

¹⁴ E vakacava na rabailevu ni veivosoti i Jiova? (Wilika Same 103:12.) E kaya o Tevita ni gauna e veivosoti kina o Jiova, e biuta vakayawa noda ivalavala ca “me vaka na yawa ni icabecabe ni siga [ena tokalau] mai na idromudromu ni siga [ena ra].” Eda rawa ni kaya ni vanua e cabe kina na siga kei na vanua e dromu kina erau vanua veiyawaki duadua, rau na sega vakadua ni sota. Cava eda vulica kina me baleta na veivosoti i Jiova? E kaya e dua na ivola me baleta na tikinivolatabu qori: “Ke sa kau tani vakayawa na noda ivalavala ca, meda nuidei ni kena iboi, na kena mawe, kei na kena vakanananu sa na oti vakadua.” Vakasamataka na iboi ni kakana kei na so tale na ka, e rawa nida nanuma lesu kina eso na ka. Ia ni veivosoti o Jiova, e sega tale ni dua na ka va qori e vakavuna me nanuma lesu kina noda ivalavala ca qai beitaki keda tiko.​—Isik. 18:​21, 22; Caka. 3:19.

15. Na cava meda cakava ke ora tiko ga na lomada ena noda cala makawa?

¹⁵ Eda na vakabauta vakacava ni vosoti keda o Jiova ena ka e tukuna o Tevita ena Same 103? Ke ora tiko ga na lomada ena noda cala makawa, meda taroga: ‘Au sa guilecava na ka e nanuma tiko o Jiova, qori niu guilecava ni kila tiko o Jiova na kequ ituvaki ivalavala ca, ena vosota tale ga e dua e veivutuni me vakataki au? Vakacava au nanuma tale tiko na ka e vakatulewataka o Jiova me guilecava, qori niu nanuma tale tiko na ivalavala ca e sa vosota oti qai sega ni kauta cake tale mai?’ E sega ni kauaitaka o Jiova na noda cala makawa. Meda kua tale ga ni kauaitaka qori. (Same 130:3) Nida vakabauta na veivosoti i Jiova, ena sega ni ora tale tiko na lomada ia eda na toso i liu.

16. Tukuna e dua na ivakatautauvata ni kena leqataki na ora ni lomada. (Raica tale ga na iyaloyalo.)

¹⁶ Vakasamataka mada na ivakatautauvata qo. Ni ora na lomada ena noda cala makawa, e vaka noda via draivataka e dua na motoka ia eda raica tale tiko na kena iloilo. E vinaka meda rai kina ena so na gauna meda kila eso na ka e yaco tiko mai dakuda. Ia meda kua ni coqa, e bibi meda rai tiko ga i liu. E va tale ga qori noda cala makawa. E vinaka meda raica lesu ena so na gauna meda vuli kina qai kua ni cakava tale. Ia ke da kauaitaka tiko ga, eda na sega ni qaravi Jiova vinaka kina ena gauna qo. E bibi gona meda rai tiko ga i liu. Eda muria tiko na sala ina bula tawamudu ena vuravura vou e yalataka na Kalou, ena “sega tale ni nanumi” kina na veika makawa.​—Aisea 65:17; Vkai. 4:25.

VAKADEITAKA TIKO GA NA LOMAMU

17. Na cava meda vakadeitaka kina e lomada ni lomani keda o Jiova, e vosoti keda tale ga?

¹⁷ E bibi meda vakadeitaka tiko ga e lomada ni lomani keda o Jiova, e vosoti keda tale ga. (1 Joni 3:19) Na vuna? Ena soli isele tiko ga o Setani meda vakabauta nida sega ni lomani se vosoti. Na iwalewale cava ga e vakayagataka, e dua tiko ga nona inaki meda kua ni qaravi Jiova. Meda namaka ni na qai kaukaua tiko ga na sasaga nei Setani ni kila tiko ni sa lekaleka nona gauna. (Vkta. 12:12) Meda kua sara ni vakamalumalumu vua!

18. Na cava mo cakava mo vakadeitaka kina ni lomani iko o Jiova, e vosoti iko tale ga?

¹⁸ Mo vakadeitaka ni lomani iko o Jiova, mo muria e vica na vakatutu eda vulica ena ulutaga sa oti. Mo vakadeitaka e lomamu ni vosoti iko o Jiova, dau vakasamataka na ka e tukuna me baleti koya. Dau vakasamataka na ka era tukuna na dauvola iVolatabu me baleta nona veivosoti. Kua ni guilecava ni kila vinaka o Jiova na kemu ituvaki ivalavala ca qai yalololoma vei iko. Nanuma tale ga ni gauna e veivosoti kina, e guilecava vakadua na nomu cala. Ni o cakava qori, o na nuidei tale ga me vakataki Tevita ni nuitaka na yalololoma i Jiova, ni o kaya, “Vinaka Jiova nomuni vosota ‘na ca ni noqu valavala ca’!”​—Same 32:5.