O na Vakatotomuria Vakacava na Veivosoti i Jiova?

1-2. (a) Na gauna cava ena rairai dredre kina meda vosota e dua? (b) Sala cava e vakaraitaka kina o Denise na veivosoti?

VAKACAVA e dau dredre mo veivosoti? Levu vei keda e dau dredre meda cakava qori, vakabibi ke dua e kaya se cakava e dua na ka e vakamosia sara ga na lomada. Ia e rawa nida lewai keda vinaka, meda veivosoti tale ga. Kena ivakaraitaki, dikeva mada nona vakaraitaka na veivosoti e dua na tacida yalewa o Denise.a Ena 2017 ni se qai dola vou na itikotiko liu ni iVakadinadina i Jiova, eratou lai sarasara e kea vakavuvale. Ni ratou lesu tiko i vale, e ceba nona motoka e dua tale na draiva qai coqa nodratou motoka. A sega ni vakilai koya o Denise ena vakacalaka qori. Ni sa vakilai koya tale, e qai kila ni ratou mavoa vakaca na luvena, e mate tale ga na watina o Brian. Ni vakasamataka lesu na gauna qori, e kaya: “Dua na ka noqu rarawa kei na veilecayaki.” E qai kila o Denise ni a sega ni mateni o draiva se wele, e kerei Jiova gona me solia vua na vakacegu.

² E vesu na draiva qori qai veilewaitaki ni sega ni nakita nona laba. E rawa ni curu e valeniveivesu ke vakatulewataka na mataveilewai ni cala. Ia e tukuna vei Denise na mataveilewai ni vakatau nona totogitaki na tagane qori ena nona ivakamacala. E kaya o Denise: “Keu talanoataka tale na ka mosimosi au sotava, e vaka ga e dua e dolava tale noqu mavoa qai sova kina na masima.” Oti e vica na macawa, e lai vakamacalataka o Denise ena mataveilewai na ka e cakava na tagane qori. Na cava e kaya o Denise? E kerei turaganilewa me vosoti na tagane qori.b Ni vosa oti, e tagi sara ga o turaganilewa. E kaya: “Ena 25 na yabaki noqu turaganilewa tiko, au se bera vakadua ni rogoca qo ena mataveilewai. Au sega vakadua ni rogoca mera kerea na vuvale me vosoti o koya e beitaki. Au sega ni dau rogoca na vosa ni loloma kei na veivosoti.”

3. Na cava e uqeti Denise me veivosoti?

³ Na cava e uqeti Denise me veivosoti? A vakasamataka vakatitobu na veivosoti i Jiova. (Maika 7:18) Nida vakavinavinakataka vakalevu nona vosoti keda o Jiova, eda na vinakata tale ga meda veivosoti.

4. Na cava e vinakata o Jiova meda cakava? (Efeso 4:32)

⁴ E vinakata o Jiova meda vosoti ira eso tale me vaka ga nona yalorawarawa me vosoti keda. (Wilika Efeso 4:32.) E vinakata meda tu vakarau meda vosoti ira na vakararawataki keda. (Same 86:5; Luke 17:4) Eda na veivosakitaka ena ulutaga qo e tolu na ka meda cakava meda veivosoti kina vakalevu.

KAUAITAKA NA IVAKARAU NI LOMAMU

5. Me vaka e tukuni ena Vosa Vakaibalebale 12:​18, ena vakacava na lomada ni vakararawataki keda e dua?

⁵ Ena rairai vakamosia na lomada na ka e kaya se cakava e dua, vakabibi ke noda itokani voleka se lewenivuvale. (Same 55:​12-14) Eso na gauna, na levu ni noda rarawa e vaka sara ga nida lausua. (Wilika Vosa Vakaibalebale 12:18.) De dua eda na saga meda kinoca se meda kua ni kauaitaka na ivakarau ni lomada. Ia nida cakava qori e vaka ga nida lausua qai sega ni kau tani na isele. Meda kua tale ga ni namaka ni na oti noda rarawa ke da sega ni kauaitaka.

6. Na cava eda na rairai cakava ni dua e vakararawataki keda?

⁶ Ni dua e vakararawataki keda, eda na rairai cudru. E kaya na iVolatabu ni rawa nida cudru, ia e veivakasalataki meda kua ni cudru tiko ga. (Same 4:4; Efeso 4:26) Na vuna? Ni rawa nida tini cakava kina eso na ka. E sega tale ga ni vinaka na itinitini ni cudru. (Jeme. 1:20) Nanuma tiko, e rawarawa noda cudru, ia noda cudru tiko ga e vakatau sara ga vei keda.

7. Na cava tale eda dau vakila ni vakararawataki keda e dua?

⁷ Ni dua e vakararawataki keda, ena rawa ni vakamosia vakalevu na lomada. Kena ivakaraitaki, e kaya e dua na tacida o Ann: “Niu se gone, e biuti Na o Ta qai vakawatitaki daumeimei. E vaka meu sa guilecavi. Ni rau vakaluveni, e vaka meu sa sega ni kauaitaki. Niu tubu tiko, au vakila niu sega ni taleitaki.” E vakamacalataka nona rai e dua tale na tacida yalewa o Georgette, ni sega ni yalodina o watina: “Keirau se veitokani tu mai niu se gone. Keirau painia vata! E mosi sara ga vei au.” E kaya e dua na tacida o Naomi: “Au sega ni vakabauta ni na vakararawataki au o watiqu. Ni vakatusa nona dau sarava lo tiko na iyaloyalo vakasisila, e vaka ga au lawakitaki, au liumuritaki tale ga.”

8. (a) Na cava eso na vuna meda veivosoti kina? (b) Cava na yaga ni veivosoti? (Raica tale ga na kato “Vakacava ke Dua e Vakamosia na Lomada?”)

⁸ Eda sega ni lewa rawa na ka era tukuna se cakava eso tale, ia eda rawa ni lewa na ka eda cakava. Levu na gauna e vinaka ga meda veivosoti. Na vuna? Eda lomani Jiova, e vinakata meda dau veivosoti. Ke da cudru tiko ga qai sega ni veivosoti, eda na rawa ni cakava kina eso na ka lialia ena vakaleqai keda. (Vkai. 14:​17, 29, 30) Dikeva nona ivakaraitaki e dua na tacida o Christine. E kaya: “Niu cudru se rarawa, au sega ni matamamarau. Au sega ni digia vinaka na ka au kania. Au sega ni moce vinaka, e dredre meu lewa vinaka na lomaqu, e vakaleqa tale ga noqu veimaliwai kei watiqu kei ira eso tale.”

9. Na cava meda kua ni cudru tiko ga kina?

⁹ Ke sega mada ga ni kere veivosoti o koya e vakamosia na lomada, meda kua ni cudruvi koya tiko ga. Ena sala cava? E kaya o Georgette sa tukuni oti mai: “E taura toka na gauna me oti noqu cudru kei na noqu rarawataki watiqu e liu. Niu sega ni cudru tiko ga, au vakila sara ga na vakacegu.” Nida sega ni cudru tiko ga, ena taqomaki na lomada meda kua ni loma ca. Ena yaga tale ga vei keda nida na guilecava kina na ka sa oti qai marautaka tale na noda bula. (Vkai. 11:17) Ia vakacava ke se bera ni o tu vakarau mo veivosoti?

KA MO CAKAVA ME RURU NOMU CUDRU

10. Na cava e vinakati kina na gauna me ruru nomu cudru? (Raica tale ga na iyaloyalo.)

¹⁰ Na cava mo cakava mo kua ni cudru tiko ga? Ena vinakati na gauna me ruru kina nomu cudru. Kena ivakaraitaki, ke sa qaravi oti vakavuniwai e dua e mavoa levu, e vinakati na gauna me mavo kina nona mavoa. E vinakati tale ga na gauna me ruru noda cudru me qai vu mai lomada noda veivosoti.​—Dauv. 3:3; 1 Pita 1:22.

11. E yaga vakacava vei iko na masu mo dau veivosoti?

¹¹ Mo masuti Jiova me vukei iko mo dau veivosoti.c E vakamacalataka o Ann sa tukuni oti mai, na yaga ni masu: “Au kerei Jiova me vosoti keitou kece vakavuvale ena ka ca keitou tukuna se cakava. Oti au qai volavola vei Ta kei watina vou, au kaya niu sa vosoti rau.” E kuria o Ann ni sega ni rawarawa me cakava qori. Ia e qai kaya: “Au vakanuinui tu ni noqu saga meu muria na veivosoti i Jiova ena uqeti Ta kei watina vou me rau vulica na dina.”

12. Na cava meda nuitaki Jiova kina, sega ni lomada? (Vosa Vakaibalebale 3:​5, 6)

¹² Mo nuitaki Jiova, kua ni nuitaka na lomamu. (Wilika Vosa Vakaibalebale 3:​5, 6.) E kila o Jiova na ka e vinaka vei keda. (Aisea 55:​8, 9) Ena sega ni tukuna meda cakava na ka ena vakaleqai keda. E uqeti keda gona meda veivosoti, eda nuidei ni na yaga vei keda. (Same 40:4; Aisea 48:​17, 18) Ia ke da nuitaka ga na lomada, eda na sega tu ga ni veivosoti. (Vkai. 14:12; Jere. 17:9) E kaya o Naomi, sa tukuni oti mai: “Au nanuma ni donu sara tu ga noqu sega ni vosoti watiqu ena nona dau sara iyaloyalo vakasisila. Au leqataka ni na vakararawataki au tale, se na guilecava na levu ni nona vakamosia na yaloqu. Au kaya ni kila vinaka tu o Jiova na lomaqu. Ia au qai liaca ke kila o Jiova na ivakarau ni lomaqu, e sega ni kena ibalebale qori ni duavata kina. E kila vinaka ni na taura na gauna me ruru noqu cudru, e vinakata tale ga meu dau veivosoti.”d

SAGA ME DONU TIKO GA NOMU RAI

13. Me vaka e tukuni ena Roma 12:​18-21, na cava meda cakava?

¹³ Nida vosoti koya e vakamosia na lomada, eso na gauna eda na sega ni via veivosakitaka na ka e yaco. Ia e tiko eso tale na ka meda cakava. Ke vakararawataki keda e dua na tacida, eda na saga meda veivakameautaki se veiyaloni. (Maciu 5:​23, 24) Eda na sosomitaka noda cudru ena yalololoma, noda loma ca ena veivosoti. (Wilika Roma 12:​18-21; 1 Pita 3:9) Na cava ena vukei keda meda cakava qori?

14. Na cava meda saga meda cakava? Na vuna?

¹⁴ Meda saga meda raici koya e vakararawataki keda mai na rai i Jiova. E digia o Jiova me raica ga na ka vinaka vei keda. (2 Vei. 16:9; Same 130:3) Ia vakacava o keda? Ena vakatau tu ga ena ka eda via raica, na nodra itovo vinaka se ca. Nida raica na ka era vinaka kina, ena rawarawa meda vosoti ira. Kena ivakaraitaki, e kaya e dua na tacida o Jarrod: “E rawarawa meu vosota e dua na taciqu niu vakatauvatana nona cala kei na levu ni nona itovo vinaka au taleitaka.”

15. Na cava e rairai bibi kina mo tukuna ni o sa vosoti koya?

¹⁵ Dua tale na ka bibi mo cakava, ya mo tukuna vua ni o sa vosoti koya. Na vuna? Rogoca na ka e kaya o Naomi, sa tukuni oti mai: “E tarogi au o watiqu, ‘O sa vosoti au?’ E dredre sara ga meu cavuta, ‘Au vosoti iko.’ Au qai liaca niu sega ni vosoti koya mai vu ni lomaqu. Toso na gauna, au sa rawa ni cavuta vinaka na tolu na vosa bibi qori, ‘Au vosoti iko.’ Au kurabui sara ga ni luluvu o watiqu ni vakila na vakacegu, qori tale ga na ka au vakila. Tekivu mai na siga qori, au sa nuitaki watiqu tale, keirau sa veivolekati tale ga.”

16. Na cava o sa vulica mai me baleta na veivosoti?

¹⁶ E vinakata o Jiova meda dau veivosoti. (Kolo. 3:13) Ia e sega ni rawarawa meda cakava qori. E rawa nida veivosoti ke da sega ni vunia noda cudru, meda saga tale ga meda kua ni cudru tiko ga. Nida cakava qori, sa qai rawa ni donu na noda rai.​—Raica na kato “Tolu na ka Mo Cakava Mo Veivosoti Kina.”

VAKASAMATAKA NA YAGA NI VEIVOSOTI

17. Na cava eso na vuna meda veivosoti kina?

¹⁷ E levu tu na vuna meda veivosoti kina. Dikeva mada e vica. Kena imatai, eda vakatotomuria na Tamada dauloloma o Jiova, eda vakamarautaki koya tale ga. (Luke 6:36) Kena ikarua, eda vakavinavinakataka vakalevu nona yalovinaka me vosoti keda. (Maciu 6:12) Kena ikatolu, eda na bulabula vinaka, e dei tale ga noda veitokani kei koya.

18-19. Na cava e rawa ni yaco ke da veivosoti?

¹⁸ Eda na rairai sega ni namaka na yaga ni noda veivosoti. Vakasamataki Denise mada, sa tukuni oti mai. A sega ni kila ena gauna ya ni nanuma tiko na tagane e coqai ratou me vakamatei koya ga ni oti na veilewai. Ia ni vosoti koya o Denise, e vinakata sara ga na tagane qori me vulica na iVolatabu kei ira na tacida.

¹⁹ Eda na rairai nanuma ni dredre sara meda veivosoti, ia e rawa ni yaga vakalevu. (Maciu 5:7) Koya gona, meda saga kece ena noda vinaka taucoko meda vakatotomuria na veivosoti i Jiova.