“Moni Digia Nikua o Koya Oni na Qarava”

1. Na cava meda cakava meda vakila kina na marau dina? Na vuna? (Aisea 48:​17, 18)

E LOMANI keda vakalevu na Tamada vakalomalagi, e vinakata meda marautaka noda bula ena gauna qo kei na gauna se bera mai. (Dauv. 3:​12, 13) E buli keda meda rawa ni cakava eso na ka vakatubuqoroqoro, ia e sega ni buli keda meda liutaki keda ga se meda lewa ga noda ivakatagedegede ni ka e donu se cala. (Dauv. 8:9; Jere. 10:23) Me rawa nida vakila na marau dina, e kila o Jiova ni bibi meda qaravi koya, meda muria tale ga nona ivakatagedegede.​—Wilika Aisea 48:​17, 18.

2. Na cava e vinakata o Setani meda vakabauta? Cava e cakava o Jiova?

² E vinakata o Setani meda vakabauta nida na marau ke da sega ni qaravi Jiova, e rawa nida liutaki keda tale ga vakataki keda. (Vkte. 3:​4, 5) Cava e cakava o Jiova? Me vakaraitaka ni lasulasu o Setani, e vakatara kina mera liutaki ira ga na tamata talaidredre me dua na gauna lekaleka. Eda vakadinadinataka tu nikua na itinitini ca ni nona veiliutaki na tamata. Ia e tu ena iVolatabu nodra ivakaraitaki e levu na tagane kei na yalewa era marautaka nodra qaravi Jiova. Vei ira kece qori, e levu duadua nona marau o Jisu Karisito. Meda veivosakitaka mada qo na vuna e digia kina me qaravi Jiova. Oti, eda na dikeva na vuna meda sokaloutaka kina na Tamada vakalomalagi. Eda na vulica tale ga eso na vuna eda digia kina meda qaravi Jiova.

VUNA E DIGIA KINA O JISU ME QARAVI JIOVA

3. Na cava a soli vei Jisu? Cava e digia?

³ Ni bula tiko e vuravura o Jisu, e vinakati me vakatulewataka o cei me qarava. Ni se qai papitaiso oti ga, e via solia vua o Setani na matanitu kece e vuravura ke sokalou wale ga vakadua vua. E kaya o Jisu: “Lako tani, Setani! Ni sa volai, ‘E dodonu mo sokalou vei Jiova na nomu Kalou, me vakatabakidua vua na nomu veiqaravi tabu.’” (Maciu 4:​8-10) Na cava e va kina qori nona vakatulewa o Jisu? Meda dikeva mada e vica na vuna.

4-5. Na cava eso na vuna e digia kina o Jisu me qaravi Jiova?

⁴ Na vuna levu duadua e digia kina o Jisu me qaravi Jiova, ya ni lomani Tamana tu ga vakalevu. (Joni 14:31) Kena ikuri, e qaravi Jiova baleta ni dodonu ga me cakava. (Joni 8:​28, 29; Vkta. 4:11) E kila ni o Jiova na iVurevure ni bula, e nuitaki, e lomasavu tale ga. (Same 33:4; 36:9; Jeme. 1:17) E dau tukuna tu ga o Jiova na ka dina vei Jisu, e solia tale ga na ka kece e tu vua. (Joni 1:14) Ia kena veibasai o Setani, e vakavuna na mate. E dau lasulasu, e kocokoco, e dau nanumi koya ga. (Joni 8:44) Nona kila qori o Jisu, e sega sara ga ni via vakasamataka me vakatotomuri Setani me talaidredre vei Jiova.​—Fpai. 2:​5-8.

⁵ Dua tale na vuna e digia kina o Jisu me qaravi Jiova, ya ni vakanamata tu ena veika vinaka ena rawati ena nona veiqaravi ena yalodina. (Iper. 12:2) E kila ke yalodina tiko ga, ena vakarokorokotaka na yaca i Tamana, ena vakarautaka tale ga na sala ena vakaotia kina vakadua na rarawa kece e vakavuna na Tevoro.

VUNA MEDA SOKALOUTAKI JIOVA KINA

6-7. Na cava era sega ni qaravi Jiova kina e levu nikua? Cava e veiganiti kina meda sokaloutaki koya?

⁶ Levu nikua era sega ni qaravi Jiova nira sega ni kila nona itovo talei kei na ka e cakava ena vukudra. Era va tu qori mai Aceni ena gauna e vunau kina vei ira na yapositolo o Paula.​—Caka. 17:​19, 20, 30, 34.

⁷ E vakamacalataka vei ira o Paula me baleta na Kalou dina ni “solia vei keda kece na bula, na icegu, kei na ka kece ga.” E kuria: “Ni o koya ga e buli keda, e vakavuna tale ga noda bula tiko kei na noda yavala.” Ni Dauveibuli na Kalou, e “bulia na matatamata kece mai na dua ga na tamata,” e ganiti koya ga me sokaloutaki.​—Caka. 17:​25, 26, 28.

8. Na cava ena sega tu ga ni cakava o Jiova? Vakamacalataka.

⁸ Ni Dauveibuli o Jiova, e Turaga Cecere Duadua ni lomalagi kei na vuravura, e rawa ni vakasaurarataki keda meda sokaloutaki koya. Ia ena sega tu ga ni cakava qori. E vakarautaka vei keda na ivakadinadina ni bula tiko, e lomani keda tale ga vakalevu. E vinakata mera veitokani kei koya e levu tale. (1 Tim. 2:​3, 4) Qori na vuna e vakavulici keda kina me rawa nida vakavulica nona inaki vei ira eso tale, meda tukuna tale ga na veika vinaka ena cakava vua na kawatamata. (Maciu 10:​11-13; 28:​19, 20) Kena ikuri, e vakarautaka na ivavakoso kei ira na qase se ovasia dauloloma mera karoni keda.​—Caka. 20:28.

9. Na cava eso na sala e vakaraitaka kina o Jiova nona lomani keda kece?

⁹ E laurai na loloma levu ni Kalou ena ka e cakava vei ira na sega ni vakabauta ni bula dina tiko. Dikeva mada na ivakaraitaki qo: Ena veigauna sa oti, era digia e levu mera muria ga na nodra ivakatagedegede ni ka e donu kei na ka e cala. Ia e yalovinaka tiko ga o Jiova me vakarautaka na ka era gadreva mera bula kina, mera marautaka tale ga. (Maciu 5:​44, 45; Caka. 14:​16, 17) E solia vei ira na galala mera vakaitokani, mera vakavuvale, mera marautaka tale ga na vua ni nodra cakacaka vakaukaua. (Same 127:3; Dauv. 2:24) E matata ena ivakadinadina qori ni lomani keda kece na Tamada vakalomalagi. (Lako 34:6) Meda dikeva mada eso na vuna eda digia kina meda qaravi Jiova kei na ka e cakava ena vukuda.

VUNA EDA DIGIA KINA MEDA QARAVI JIOVA

10. (a) Na cava na vuna levu duadua eda qaravi Jiova kina? (Maciu 22:37) (b) E yaga vakacava vei iko na vosovoso i Jiova? (Same 103:​13, 14)

¹⁰ Me vakataki Jisu, na vuna levu duadua eda qaravi Jiova kina ya nida lomani koya vakalevu. (Wilika Maciu 22:37.) Eda vinakata meda toro volekati Jiova nida vulica nona itovo talei. Kena ivakaraitaki, vakasamataka mada nona vosovoso. Nira talaidredre vua na Isireli, e vakamasuti ira: “Moni biuta mada na nomuni itovo ca.” (Jere. 18:11) E kila vinaka o Jiova nida sega ni uasivi, eda kuvuniqele ga. (Wilika Same 103:​13, 14.) Ni o vakasamataka vakatitobu na vosovoso i Jiova kei na so tale nona itovo talei, ena uqeti iko sara ga mo qaravi koya me tawamudu.

11. Na cava eso tale na vuna eda digia kina meda qarava na Tamada vakalomalagi?

¹¹ Eda vinakata meda qaravi Jiova baleta ni dodonu ga meda cakava qori. (Maciu 4:10) Eda kila tale ga na ka ena rawati nida yalodina ena noda veiqaravi. Na noda yalodina ena vakarokorokotaki kina na yaca i Jiova, ena vakalasui kina na Tevoro, ena vakamarautaka tale ga na loma i Tamada. Kena ikuri, ke da digia meda qaravi Jiova ena gauna qo, ena rawa nida qaravi koya tiko ga me tawamudu!​—Joni 17:3.

12-13. Na cava eda vulica ena ivakaraitaki nei Jane kei Pam?

¹² Nida se gone, eda rawa ni vulica meda lomani Jiova vakalevu, ia ke da qase mada ga eda na lomani koya tiko ga. Dikeva mada nodrau ivakaraitaki e dua na veitacini yalewa o Jane kei Pam.a Ni yabaki 11 o Jane, e yabaki 10 o Pam rau tekivu vulica na iVolatabu. Erau sega ni via vulica na iVolatabu na nodrau itubutubu, ia rau vakadonuya me rau veimaliwai na gone kei ira na mataveitacini, kevaka wale ga rau na veitomani ena nodratou lotu vakavuvale ena muanimacawa. E kaya o Jane: “E yaga sara ga vei au na ka era vakavulica mai na iVolatabu na iVakadinadina i Jiova, au vorata kina nodra veitemaki noqu icaba me baleta na wainimate gaga kei na veiyacovi tawadodonu.”

¹³ Ni rau sa voleka ni yabaki 20, rau sa dautukutuku. Toso na gauna, rau painia sara, rau qaravi rau tale ga nodrau itubutubu itabaqase. Ni vakasamataka lesu o Jane na nodrau vakatulewa, e kaya: “Au vakadinadinataka sara ga ni yalodina o Jiova me karoni ira nona itokani me vaka e tukuni ena 2 Timoci 2:​19, ‘O Jiova e kilai ira na nona tamata.’” E macala ni o Jiova e dau karoni ira tu ga na digia mera lomani koya ra qai qaravi koya!

14. Eda na vakaraitaka vakacava nida via vakalasuya na ka e beitaki kina o Jiova? (Raica tale ga na iyaloyalo.)

¹⁴ Eda vinakata meda vakalasuya na ka lasutaki e dau tukuni me baleti Jiova. Dikeva mada na ivakaraitaki qo: E dua tiko nomu itokani dredre e dau yalovinaka, e lomasavu, e dau veivosoti tale ga. Dua na siga, o rogoca sara ni dua e beitaki koya ni dau veivakalolomataki, e lasulasu tale ga. Cava o na cakava? O na tokoni nomu itokani. E saga tale ga o Setani kei ira nona ito mera tukuna na veika lasutaki me vakarogorogocataki Jiova. Ia eda na vakalasuya qori nida tukuna na ka dina me baleti koya, eda na gumatua ni taqomaka na yacana. (Same 34:1; Aisea 43:10) Eda na vakaraitaka ena ka eda tukuna kei na ka eda cakava nida via qaravi Jiova mai vu ni lomada.

15. E yaga vakacava nona veisautaka na yapositolo o Paula nona bula? (Filipai 3:​7, 8)

¹⁵ Eda yalorawarawa meda veisautaka noda bula me rawa nida vakamarautaki Jiova se vakarabailevutaka noda veiqaravi. Kena ivakaraitaki, e digia na yapositolo o Paula me biuta nona itutu ena lotu vakaJiu me muri Karisito, me qaravi Jiova tale ga. (Kala. 1:14) Cava na kena yaga? E marautaka nona veiqaravi, e lesi tale ga me veiliutaki kei Karisito i lomalagi. E sega sara ga ni veivutunitaka nona vakatulewa me qaravi Jiova. Eda na sega tale ga ni veivutunitaka noda veiqaravi.​—Wilika Filipai 3:​7, 8.

16. Na cava eda vulica ena ivakaraitaki nei Julia? (Raica tale ga na iyaloyalo.)

¹⁶ Ke bibi duadua ena noda bula na qaravi Jiova, eda na marau ena gauna qo kei na gauna se bera mai. Dikeva mada nona ivakaraitaki na tacida yalewa o Julia. Ni bera ni vulica na dina ni se gone, e dau lewena tu na matasere ni nona valenilotu. E qoroya nona taledi e dua na daulagasere, mani vakavulici koya. E totolo sara nona rogo o Julia, e lagasere tale ga ena so na vanua rogo. Ni vuli tiko ena dua na koronivuli ni lagasere kilai levu, e tukuna vua e dua rau vuli vata na veika me baleta na Kalou kei na yacana o Jiova. Oti qori, sa tekivu vulica na iVolatabu, e vuli vakarua e veimacawa. Lakolako sa vakatulewataka me vakaliuca nona qaravi Jiova, me sa cegu na vuli lagasere. E sega ni rawarawa na vakatulewa qori. E kaya: “Levu era tukuna vei au niu vakamaumautaka noqu taledi, ia au via vakayagataka noqu bula meu qaravi Jiova vakatabakidua.” Cava nona rai ena gauna qo me baleta nona vakatulewa ena sivia ni 30 na yabaki sa oti? E kaya: “Au vakila na vakacegu, au nuidei tale ga ni na solia vei au o Jiova na ka kece au gadreva ena gauna se bera mai.”​—Same 145:16.

QARAVI JIOVA TIKO GA

17. Nida bula tiko ena dua na gauna bibi sara, cava na kena ibalebale qori?

¹⁷ Eda bula tiko ena dua na gauna bibi sara. E vola na yapositolo o Paula: “Ena ‘dua na gauna lekaleka,’ ‘ena qai yaco mai o koya e lako tiko mai, ena sega ni berabera.’” (Iper. 10:37) Cava na kena ibalebale qori? Dua, sa lekaleka sara na gauna e vo mera digia kina e levu mera qaravi Jiova. (1 Kor. 7:29) Dua tale, ke da sa vakatulewataka meda qarava na Kalou, eda kila nida na vosota tiko na veika dredre, ia ena “lekaleka” ga.

18. Na cava rau vinakata o Jiova kei Jisu meda cakava?

¹⁸ E uqeta e levu o Jisu mera nona tisaipeli, mera muri koya tiko ga. (Maciu 16:24) Koya gona, ke sa dede mada ga noda qaravi Jiova tiko, meda vakadeitaka meda kua ni soro. E vinakati na sasaga meda dei tiko ga ena noda vakatulewa meda qaravi koya. Ena sega toka ni rawarawa, ia eda na vakalougatataki ena gauna qo, eda na marau tale ga!​—Same 35:27.

19. Na cava eda vulica ena ivakaraitaki nei Gene?

¹⁹ Era nanuma eso ni sa sivia tale na ka era vakuai ira kina mera qaravi Jiova. Ke o se gone, vacava o nanuma ni o sega ni marautaka e levu na ka ni o qaravi Jiova? E kaya e dua na tacida tagane gone o Gene: “Au nanuma niu na sega ni marau niu iVakadinadina i Jiova. Levu na gone keimami susu vata e vaka mera marautaka na pati, na vakaitau, se ra qitora na video game voravora, ia o yau au vakayagataka ga noqu gauna ena soqoni kei na cakacaka vakavunau.” E vakaleqai Gene vacava na rai qori? E kaya: “E rua tu noqu ivakarau ni bula, au marautaka ni se qai tekivu. Ia e lekaleka ga na marau qori. Oti au qai vakasamataka na ka dina vakaivolatabu au vakawalena, au mani vakatulewataka meu qaravi Jiova mai vu ni lomaqu. Tekivu mai na gauna qori, e vaka me sauma tu ga o Jiova noqu masu kece.”

20. Na cava meda vakadeitaka?

²⁰ E lagata vei Jiova na daunisame: “E marau o koya oni digia qai kauta voleka mai, me mai tiko ena nomuni lomanibai.” (Same 65:4) Meda vakadeitaka mada ga meda qaravi Jiova tiko ga. Me vaka e tukuna o Josua: “O yau kei ratou na noqu vuvale, keitou na qaravi Jiova ga.”​—Josua 24:15.