Sala Mo Veivakasalataki Kina

1. O cei me veivakasalataki? Na vuna?

NA CAVA nomu rai me baleta na veivakasalataki? Eso e dau rawarawa vei ira. Eso tale era dau tu suka, se madua. Se cava noda rai, e noda itavi kece meda veivakasalataki ena so na gauna. Na vuna? E kaya o Jisu nira na kilai tani nona imuri dina nira vakaraitaka na veilomani. (Joni 13:35) Dua gona na sala eda na vakaraitaka kina na loloma qori, nida vakasalataki ira na tacida ena gauna veiganiti. E kaya na Vosa ni Kalou “na kamica ni veitokani,” e yavutaki ena “ivakasala vinaka.”​—Vkai. 27:9.

2. Na cava e bibi mera cakava na qase? Na vuna? (Raica tale ga na kato “Veivakasalataki ena Soqoni ena Lomanimacawa.”)

² E bibi vei ira na qase ni ivavakoso me yaga nodra veivakasalataki. E vakayagataki Jisu o Jiova me lesi ira na tagane qo mera vakatawa na ivavakoso. (1 Pita 5:​2, 3) Dua na sala era cakava kina qori ni yavutaki vakaivolatabu nodra ivunau ena ivavakoso. E bibi tale ga mera vakasalataki ira yadua na sipi, okati kina o ira na biuta na qelenisipi. Ena yaga vakacava nodra ivakasala na qase kei keda na kena vo?

3. (a) Ena rawa vakacava nida daunivakasala vinaka? (Aisea 9:6; Raica tale ga na kato “Vakatotomuri Jisu ni o Veivakasalataki.”) (b) Na cava eda na veivosakitaka ena ulutaga qo?

³ Eda na daunivakasala vinaka nida vulica nodra ivakaraitaki na tukuni ena iVolatabu, vakabibi o Jisu. E dua na kena icavuti na “Daunivakasala Vuku.” (Wilika Aisea 9:6.) Eda na veivosakitaka ena ulutaga qo na ka meda cakava nida kerei meda veivakasalataki, kei na ka meda cakava nida veivakasalataki ia eda sega ni kerei. Eda na dikeva tale ga na bibi ni noda veivakasalataki ena gauna donu kei na sala donu.

NIDA KEREI MEDA VEIVAKASALATAKI

4-5. Ni dua e mai kere ivakasala, cava meda taroga mada e liu? Tukuna e dua na kena ivakaraitaki.

⁴ Ni dua e mai kere ivakasala, cava e dau yacovi keda? De dua eda na marau da qai via veivuke sara ga. Ia e dodonu meda taroga mada e liu, ‘Au rawa ni veivakasalataki ena tikina qo?’ Eso na gauna na ka vinaka ga meda cakava, meda vukei koya me lai raica e dua e kila vinaka na ituvaki qori.

⁵ Dikeva mada na ivakaraitaki qo. Kaya mada ke tauvimate bibi e dua nomu itokani voleka. E kaya vei iko ni sa vakekeli tiko ena veiqaravi me na caka vua, oti qai taroga nomu nanuma ena veiqaravi cava ena vinaka. De dua o tukuna sara ga vua na veiqaravi me digia, ia na kena leqa ni o sega ni vuniwai, o sega tale ga ni kila e dua na ka me baleta na mate qori. Ena ituvaki qori, na ka vinaka ga mo cakava mo vukei nomu itokani me lai raica e dua na vuniwai e kila vinaka na mate qori.

6. Na cava meda wawa kina vakalailai da qai veivakasalataki?

⁶ Ke da nanuma mada ga ni rawa nida veivakasalataki ena dua na ituvaki, e vinaka meda wawa mada vakalailai da qai veivakasalataki. Na vuna? E kaya na Vosa Vakaibalebale 15:28 ni “tamata yalododonu e vakasama mada qai vosa.” Vakacava ke da nanuma nida kila na ka meda tukuna? Se vinakati tiko ga na gauna meda vakekeli kina, masu, meda vakasama vakatitobu. Ke da cakava qori, eda na nuidei ni noda ivakasala e salavata kei na rai i Jiova. Dikeva mada na ivakaraitaki ni parofita o Necani.

7. Na cava o vulica vua na parofita o Necani?

⁷ E tukuna o Tui Tevita vua na parofita o Necani ni via tara na valenisoro i Jiova. E vakasalataki koya sara ga o Necani me cakava. Ia e dodonu me tarogi Jiova mada. Na vuna? Ni sega ni vinakata o Jiova me tara o Tevita na valenisoro. (1 Vei. 17:​1-4) Eda vulica ena ivakaraitaki qo, ke da kerei meda veivakasalataki, e ka vakayalomatua meda “berabera ni vosa.”​—Jeme. 1:19.

8. Na cava e dua tale na vuna meda qarauna kina noda ivakasala?

⁸ Dikeva e dua tale na vuna meda qarauna kina noda veivakasalataki: E rawa nida beitaki ke lai tini leqa o koya e muria noda ivakasala. Oya na vuna e vinaka kina meda vakasama rawa ni bera nida vakasalataka e dua.

VEIVAKASALATAKI NI O SEGA NI KEREI

9. Ni bera ni ratou veivakasalataki na qase, na cava me ratou vakadeitaka mada? (Kalatia 6:1)

⁹ Eso na gauna e vinakati vei ira na qase ni ivavakoso mera vakaliuliu mera vakasalataka e dua na tacida e “butucala.” (Wilika Kalatia 6:1.) De dua e sa cakava tiko eso na ka ena tini valavala ca bibi kina. E nodra inaki na qase mera vukei koya me muria tiko ga na sala ina bula tawamudu. (Jeme. 5:​19, 20) Ia me yaga nodra ivakasala, e vinakati mera vakadeitaka ke sa butucala dina tiko na tacida qori. Ni solia vei keda o Jiova na galala ni vakatulewa e yavutaki ena noda dui lewaeloma. (Roma 14:​1-4) Vakacava ke sa butucala na tacida qori, ratou qai vakatulewataka na qase me ratou vakaliuliu ni vakasalataki koya?

10-12. Na cava mera cakava na qase ni ivavakoso ni sega ni kerei nodra ivakasala? Vakatauvatana. (Raica tale ga na iyaloyalo.)

¹⁰ E sega ni rawarawa mera veivakasalataki na qase ni ivavakoso ke sega ni kerei. Na vuna? E tukuna na yapositolo o Paula ni rawa ni sega ni liaca e dua tacida ni sa butucala. Kena ibalebale me rawa ni ciqomi na nona ivakasala na qase, e tiko eso na ka me cakava rawa ni bera ni veivakasalataki.

¹¹ Dikeva mada e dua na kena ivakatautauvata. Na ivakasala e sega ni kerei, e vaka na noda via teitei ena qele kaukaua. Ni bera ni kaburaki na sorenitei, e vinakati meda cukita rawa na qele. Qori ena malumu kina, sa na rawa na teitei. Oti eda na kaburaka na sorenitei qai vakasuasuataka me rawa ni tubu. Ena va tale ga qori nona veivakasalataki na qase ke sega ni kerei, ena cakava rawa eso na ka me ciqomi kina nona ivakasala. Kena ivakaraitaki, ena qara na qase e dua na gauna veiganiti me rau veivosaki kina qai vakadeitaka vua ni kauaitaki koya vakalevu. Ke kilai ni dau loloma qai veikauaitaki o koya e veivakasalataki, ena rawarawa me ciqomi nona ivakasala.

¹² Ni toso nodrau veivosaki, ena vakamalumutaka tiko ga na qele na qase ni tukuna vua nida dau cala kece, e vinakati gona meda vakasalataki ena so na gauna. (Roma 3:23) Ena veidokai vakalevu na qase, ena vosa vakamalua tale ga ni vakaraitaka vua mai na iVolatabu ni sa butucala tiko. Ni sa liaca na tacida nona cala, ena “tea [sara] na sorenitei” na qase ni vakamatatataka vua na ka me veisautaka. Oti qori ena “vakasuasuataka” na qase na sorenitei ni vakavinavinakataki koya na tacida, rau na masu vata tale ga.​—Jeme. 5:15.

13. Era na kila vakacava na qase ni sa matata nodra ivakasala?

¹³ Eso na gauna, na ka e tukuna o koya e veivakasalataki ena sega ni matata vei koya e rogoca. Na cava me cakava na qase ni ivavakoso me kua ni yaco qori? Me veidokai ni taroga vakamaqosa eso na taro. (Dauv. 12:11) Na ka e tukuna o koya e vakasalataki ena kila kina o qase ni sa matata na nona ivakasala.

VEIVAKASALATAKI ENA GAUNA DONU QAI CAKA ENA VEIDOKAI KEI NA LOLOMA

14. Vakacava meda veivakasalataki ena dela ni cudru? Vakamacalataka.

¹⁴ Eda sega ni uasivi kece, eda na tukuna se cakava gona eso na ka ena vakacudrui ira eso tale. (Kolo. 3:13) E tukuna na Vosa ni Kalou ni so mada ga na gauna era na vakacudrui keda eso tale. (Efeso 4:26) Ia meda kua vakadua ni veivakasalataki nida cudru tiko. Na vuna? Ni “sega ni kauta mai na yalododonu ni Kalou na cudru ni tamata.” (Jeme. 1:20) Ke da veivakasalataki ena dela ni cudru, e rawa ni vakalevutaka ga na leqa. Sega ni kena ibalebale qori meda sa kua ni tukuna noda rai kei na lomada vei ira na vakacudrui keda. Ia ena vinaka sara na ivakarau ni veivosaki ke da waraka me oti noda cudru. Dikeva mada na ivakaraitaki vinaka nei Ilaiu, na daunivakasala nuitaki nei Jope.

15. Na cava eda vulica vei Ilaiu? (Raica tale ga na iyaloyalo.)

¹⁵ E vica toka na siga nona vakarogoci Jope tiko o Ilaiu ni tukuna ni ratou cala nona itokani dauveivakacegui vakatuburarawa. E lomani Jope vakalevu o Ilaiu. E cudruvi Jope tale ga vakalevu ni sa cala nona rai me baleti Jiova, e kauaitaka ga vakasivia na kena ituvaki. Ia e waraka na gauna me vosa kina vakayalovinaka, e vakaraitaka tale ga na veidokai ni vakasalataki Jope. (Jope 32:2; 33:​1-7) Na cava eda vulica vei Ilaiu? E bibi meda veivakasalataki ena gauna donu qai caka ena veidokai kei na loloma.​—Dauv. 3:​1, 7.

VEIVAKASALATAKI TIKO GA, CIQOMA TALE GA NA IVAKASALA

16. Na cava o vulica ena Same 32:8?

¹⁶ E tukuni ena tikinivolatabu e yavutaki kina noda vuli ni ‘raici keda tiko e matana o Jiova.’ (Wilika Same 32:8.) Qori e vakaraitaka ni na tokoni keda tiko ga. Ena sega wale ga ni vakasalataki keda, ena vukei keda tale ga meda muria. Eda vuli ena nona ivakaraitaki! Nida vakasalataka eso, meda raici ira tiko e matada qai vukei ira mera vakatulewa vinaka.

17. Era vakatauvatani kei na cava na qase era veivakasalataki vakadodonu qai yavutaki ena iVolatabu? Vakamacalataka. (Aisea 32:​1, 2)

¹⁷ Sa qai bibi tiko ga ena gauna qo meda veivakasalataki, meda vakasalataki tale ga. (2 Tim. 3:1) O ira na qase ni ivavakoso era veivakasalataki vakadodonu qai yavutaki ena iVolatabu, era “vaka na uciwai ena vanua dravuisiga.” (Wilika Aisea 32:​1, 2.) Eda vakavinavinaka nira tu na itokani era sega ni tu suka mera vakasalataki keda vakadodonu. Na yaga ni nodra ivakasala e vaka “na yapolo koula ena iyaya ceuti ena siliva.” (Vkai. 25:11) Meda vakaraitaka tiko ga na vuku me rawa nida veivakasalataki, meda ciqoma tale ga na ivakasala.