Na Cava Mo Qara iVakasala Kina?

1. Ena vinaka vakacava noda vakatulewa qai rawati na ka eda lalawataka? (Vosa Vakaibalebale 13:10; 15:22)

EDA vinakata kece me vinaka noda vakatulewa. Eda vinakata tale ga me rawati na ka eda lalawataka. Ena rawati ruarua qori nida rai ena Vosa ni Kalou.​—Wilika Vosa Vakaibalebale 13:10; 15:22.

2. Na cava e yalataka vei keda o Jiova?

² E macala ni Tamada ga o Jiova ena vakarautaka vei keda na vuku kei na ivakasala. E yalataka me vukei keda ni kaya: “Au na vakasalataki iko niu raici iko tiko e mataqu.” (Same 32:8) Eda vakadeitaka e keri ni sega wale ga ni vakasalataki keda o Jiova, ia e kauaitaki keda sara ga, e vukei keda tale ga meda muria nona ivakasala.

3. Na cava eda na veivosakitaka ena ulutaga qo?

³ Ena ulutaga qo, eda na vakayagataka na Vosa ni Kalou me saumi kina na va na taro qo: (1) Na itovo cava me tiko vei au me yaga kina na ivakasala? (2) O cei e rawa ni vakasalataki au vakavinaka? (3) Au na vakaraitaka vakacava ni sega ni qiqo noqu rai? (4) Na cava meu kua ni kerea kina eso tale mera vakatulewa vei au?

NA ITOVO CAVA ME TIKO VEI AU?

4. Me yaga vei keda na ivakasala vinaka, na itovo cava me tiko vei keda?

⁴ E bibi meda yalomalumalumu me yaga kina vei keda na ivakasala vinaka. Meda nanuma tiko ni sega ni tu vei keda na kila me rawa nida vakatulewa ga kina vakataki keda, eso tale ga na ituvaki e vou vei keda. Ke da sega ni yalomalumalumu, ena sega ni rawa ni vukei keda o Jiova. Koya gona, ena matewale na ivakasala kece eda wilika ena nona Vosa. (Maika 6:8; 1 Pita 5:5) Ia ke da yalomalumalumu, ena totolo ga noda muria na ivakasala vakaivolatabu, ena yaga vakalevu vei keda.

5. Na cava e rawa ni vakavuna me dokadoka o Tui Tevita?

⁵ Meda dikeva mada na ka eda rawa ni vulica vei Tui Tevita. Na ka e rawata e rawa sara ga ni dokadoka kina. Ni bera mada ga ni dabe ena idabedabe vakatui, e kilai levu ni kenadau ena qiriqiri. E kerei mada ga me lai qiriqiri vua na tui. (1 Sam. 16:​18, 19) Ni sa lumuti Tevita oti o Jiova me tui, e vakaukauataki koya nona yalo tabu. (1 Sam. 16:​11-13) E rogo vei ira na kainona ni vakamatei ira na kedra meca, wili kina na tuawa ni Filisitia o Koliaci. (1 Sam. 17:​37, 50; 18:7) Ke dua na tagane dokadoka e rawata na veika lelevu va qori, ena rawa ni nanuma ni sega ni dua me vakasalataki koya. Ia e sega ni va qori o Tevita.

6. Eda kila vakacava ni dau rogoca o Tevita na ivakasala? (Raica tale ga ena waqana.)

⁶ Ni sa tui o Tevita, e maliwai ira tiko ga na tagane era dau vakasalataki koya. (1 Vei. 27:​32-34) E sega ni kurabuitaki qori, ni dau kilai o Tevita ena nona yalorawarawa me rogoca na ivakasala vinaka. E sega ni rogoca wale ga nodra ivakasala na tagane, ia e rogoca tale ga nodra ivakasala na yalewa, me vakataki Apikali. Na watina o Nepali e dau veibeci, viavialevu qai dokadoka. Ia o Tevita, e yalomalumalumu me rogoca na ivakasala nei Apikali, mani sega ni cakava kina na ka lialia.​—1 Sam. 25:​2, 3, 21-25, 32-34.

7. Na cava eso na ka eda vulica vei Tevita? (Dauvunau 4:13) (Raica tale ga na iyaloyalo.)

⁷ Na cava eso na ka eda vulica vei Tevita? De dua e tiko eso nomu taledi, se o lesi ena so na itavi mo veiliutaki. Meda kua vakadua ni nanuma nida sa kila e levu na ka, se nanuma ni sega ni ganiti keda na ivakasala. Me vakataki Tevita, meda yalorawarawa ni rogoca na ivakasala, se o cei ga e veivakasalataki. (Wilika Dauvunau 4:13.) Ke da cakava qori, de dua eda na sega ni vakatulewa vakalialia me vakaleqai keda kei ira eso tale.

O CEI ENA VAKASALATAKI AU VAKAVINAKA?

8. Na cava e ganiti Jonacani kina me vakasalataki Tevita?

⁸ Na cava e dua tale na ka eda vulica vei Tevita? E rogoca nodra ivakasala o ira e vinaka nodra veiwekani kei Jiova, era kila vinaka tale ga na kena ituvaki. Kena ivakaraitaki, ni via kila o Tevita ke rawa ni rau veimaliwai vinaka tale kei Tui Saula, e rogoca vinaka na ivakasala nei Jonacani, na luvei Saula. Na cava e vinaka kina na ivakasala nei Jonacani? E sega wale ga ni vinaka nona veiwekani kei Jiova, e kilai Saula vinaka tale ga. (1 Sam. 20:​9-13) Cava eda rawa ni vulica kina?

9. O cei meda kerea nodra ivakasala? Vakamacalataka. (Vosa Vakaibalebale 13:20)

⁹ Nida kere ivakasala, e vinaka meda taroga e dua e vinaka nona veiwekani kei Jiova, e kila vinaka tale ga na keda ituvaki.a (Wilika Vosa Vakaibalebale 13:20.) Kena ivakaraitaki, kaya mada ke vaqara tiko e dua na tacida cauravou na kena isa ni vakawati vinaka. O cei e rawa ni vakasalataki koya vakavinaka? E rawa ni dua na tacida dawai, ke yavutaka nona ivakasala ena ivakavuvuli vakaivolatabu. Ia ke vinakata na ivakasala e matata qai yaga, ena vinaka cake me taroga e dua na veiwatini matua vakayalo rau kilai koya vinaka, rau marautaka tale tu ga nodrau bula vakawati.

10. Na cava eda na dikeva qo?

¹⁰ Eda sa veivosakitaka mai e dua na itovo me tiko vei keda, vaka kina o koya e rawa ni veivakasalataki vinaka. Meda dikeva mada qo na vuna me kua ni qiqo kina noda rai nida vakasalataki, kei na vuna meda kua kina ni kerea eso tale mera vakatulewa ena vukuda.

ENA SEGA NI QIQO VAKACAVA NODA RAI?

11-12. (a) Na cava ena rairai cakava e dua ena so na gauna? (b) Cava e cakava o Tui Riopoami ni vinakati me vakatulewa?

¹¹ Eso na gauna ena rairai nanumi ni kere ivakasala tiko e dua, ia na kena dina ni sa vakatulewa oti tu, e vinakata ga me kila ke ra tokona nona vakatulewa eso tale, se sega. O koya qori e sega ni vinakata dina na ivakasala. E vinakati me vuli ena nona ivakaraitaki o Tui Riopoami.

¹² Ni sa mate o Tui Solomoni, e tui Isireli sara o Riopoami. E liutaka o Riopoami e dua na matanitu vutuniyau, ia era nanuma na Isireli ni sa sivia tale na ka e lavaka vei ira o Solomoni. Era lako vei Riopoami, era vakamasuti koya me vakamamadataka na nodra icolacola. E tukuna o Riopoami me soli mada vua na gauna me lai vakasamataka na ka me cakava. E donu na ka e cakava o Riopoami ni lai kere ivakasala vei ira na qase ni Isireli era vukei Solomoni. (1 Tui 12:​2-7) Ia e sega ni muria na nodra ivakasala na qase qori. Na vuna? De dua sa vakatulewa oti tu o Riopoami qai vaqara ga eso mera tokona nona vakatulewa. Ke dina qori, kena ibalebale e taleitaka na nodra ivakasala na cauravou era susu vata. (1 Tui 12:​8-14) Sa qai tukuna o Riopoami vei ira na Isireli na nodra ivakasala na nona itokani. Cava e yaco? E tawase na matanitu o Isireli. Tekivu mai na gauna qori, e yaco tu ga na leqa vei Riopoami.​—1 Tui 12:​16-19.

13. Eda na kila vakacava ni qiqo tiko noda rai?

¹³ Na cava eda vulica ena ivakaraitaki nei Riopoami? Nida kere ivakasala, me kua ni qiqo noda rai. Eda na kila vakacava qori? Meda taroga: ‘Vakacava au dau kere ivakasala qai sega ni muria niu cata?’ Dikeva mada e dua na kena ivakaraitaki.

14. Na cava meda nanuma tiko nida vakasalataki? Tukuna e dua na kena ivakaraitaki. (Raica tale ga na iyaloyalo.)

¹⁴ Kaya mada ke soli vua e dua na tacida tagane e dua na cakacaka saulevu. Ni bera ni vakadonuya, e kere ivakasala vua e dua na qase ni ivavakoso. E kaya vua na tacida qori ni cakacaka qori ena yawaka kina nona vuvale me dua na gauna balavu. E vakaraitaka vua e dua na ivakavuvuli vakaivolatabu ni nona itavi bibi me vakarautaka na ka vakayalo vei ratou nona vuvale. (Efeso 6:4; 1 Tim. 5:8) Kaya mada ke sega ni taleitaka na tacida na ivakasala qori, qai lai kere ivakasala vei ira eso tale na tacida tagane me yacova ni donu vua na ka e rogoca. Vakacava e vinakata dina na tacida qori na ivakasala, se sa vakatulewa oti tu ia e qara ga e dua me tokoni koya? Meda nanuma tiko ni dau veivakaisini na lomada. (Jere. 17:9) Eso na gauna na ivakasala vinaka duadua, na kena eda sega sara ga ni taleitaka.

MEU TAROGA ESO TALE MERA VAKATULEWA VEI AU?

15. Na cava meda qarauna? Na vuna?

¹⁵ E noda itavi yadua meda vakatulewataka na ka meda cakava. (Kala. 6:​4, 5) Eda sa veivosakitaka mai ni o koya e yalomatua ena qara ivakasala ena Vosa ni Kalou, kei ira na lotu vaKarisito matua ni bera ni vakatulewa. Ia na cava meda qarauna? Meda kua ni kerea eso tale mera vakatulewa ena vukuda. Era cakava qori eso nira taroga e dua era nuitaka: “Na cava o na cakava ke o sotava na ituvaki qo?” Eso era sega tale ni qai vakasama, era sa vakatulewa sara ga nira vakatotomuria na ka era cakava eso tale.

16. Na ituvaki cava e basika e Korinica me baleta na lewenimanumanu e cabori ena matakau? O cei me vakatulewa kina? (1 Korinica 8:7; 10:​25, 26)

¹⁶ Dikeva na ituvaki e basika ena ivavakoso e Korinica ena imatai ni senitiuri me baleta na lewenimanumanu e rairai cabori ina matakau. E vola o Paula vei ira na lotu vaKarisito qori: “Eda kila ni ka wale e vuravura na matakau, ia e dua ga na Kalou.” (1 Kor. 8:4) Ena ka e vola qori, era vakatulewataka kina eso ena ivavakoso ni rawa nira kania na lewenimanumanu e cabori ena matakau, oti qai volitaki ena makete. Eso era vakatulewataka mera kua ni kania na lewenimanumanu va qori me kua ni ca nodra lewaeloma. (Wilika 1 Korinica 8:7; 10:​25, 26.) E dui nodra na vakatulewa. E sega vakadua ni vakasalataki ira e Korinica o Paula mera vakatulewa ena vukudra eso tale, se ra vakatotomuria na ka era cakava eso tale. Era na “dui saumitaro . . . vua na Kalou.”​—Roma 14:​10-12.

17. Na cava e rawa ni yaco nida vakatotomuria na ka era cakava eso tale? Tukuna e dua na kena ivakaraitaki. (Raica tale ga na iyaloyalo.)

¹⁷ Ena rawa ni yaco vakacava qori nikua? Kaya mada na iwasewase lalai ni dra. E dui noda na vakatulewa meda vakadonuya na iwasewase lalaib qori se sega. Ena rairai dredre meda kila vinaka na ulutaga qo, ia eda na dui vakatulewa sara ga kina. (Roma 14:4) Ke da vakatotomuria na ka era cakava eso tale, ena vakamalumalumutaka noda lewaeloma. Eda na vakavulica noda lewaeloma qai vakaukauataka nida vakayagataka. (Iper. 5:14) Na gauna cava gona meda kerea kina nona ivakasala e dua na lotu vaKarisito matua? Nida sa vakekeli oti, ia se sega tiko ga ni matata na sala e veisemati kina na ivakavuvuli vakaivolatabu kei na keda ituvaki.

QARA IVAKASALA TIKO GA

18. Na cava sa cakava vei keda o Jiova?

¹⁸ E vakaraitaka o Jiova ni nuitaki keda vakalevu ni solia na galala ni vakatulewa. E vakarautaka nona Vosa na iVolatabu. E vakarautaki ira tale ga na tacida matua, mera vukei keda ena sala meda muria kina na ivakavuvuli vakaivolatabu. E vakayacora dina o Jiova na nona itavi vakaTama. (Vkai. 3:​21-23) Eda na vakaraitaka vakacava noda vakavinavinakataki koya?

19. Eda na vakamarautaki Jiova tiko ga vakacava?

¹⁹ Vakasamataka mada qo: Era marau na itubutubu nira raici luvedra nira dauveiqaravi matua i Jiova, era dau veinanumi, era dau veivuke tale ga. E marau tale ga va qori o Jiova ni raica noda sasaga tiko meda matua vakayalo, meda dau qara ivakasala qai vakatulewa me rokovi kina o koya.