Vakacava se Yaga Tiko ga na iVakavuvuli Rawarawa Vakaivolatabu?

1. E veisautaka vakacava nomu bula na ivakavuvuli rawarawa vakaivolatabu?

E VEISAUTAKA noda bula na ivakavuvuli rawarawa vakaivolatabu. Kena ivakaraitaki, na gauna eda vulica kina ni yaca ni Kalou o Jiova, eda vinakata sara ga meda nona itokani. (Aisea 42:8) Nida vulica na kedra ituvaki dina na mate, eda lomavakacegu nida kila nira sega ni rarawa tiko. (Dauv. 9:10) Nida vulica tale ga na yalayala ni Kalou ni na Parataisi na vuravura, eda sega ni lomaleqataka noda veisiga nimataka. Eda nuidei ni na sega ni lekaleka wale ga noda bula me 70 se 80 na yabaki, ia ena tawamudu.​—Same 37:29; 90:10.

2. Eda kila vakacava ena 2 Pita 1:​12, 13 ni se yaga tiko ga na ivakavuvuli rawarawa vakaivolatabu vei ira na lotu vaKarisito matua?

² Meda kua ni vakawalena se taura vakamamada na ivakavuvuli rawarawa vakaivolatabu. E vola na yapositolo o Pita na ikarua ni nona ivola vei ira na lotu vaKarisito era ‘dei ena ka dina.’ (Wilika 2 Pita 1:​12, 13.) Ni toso na gauna, e leqataki nodra bula vakayalo ena ivavakoso, nira basika na qasenivuli lasu kei ira na sega ni doka na Kalou. (2 Pita 2:​1-3) E vinakata o Pita me vakayaloqaqataki ira na mataveitacini me rawa nira dei ena gauna dredre qori. E cakava qori ni vakadreti ira ena so na ivakavuvuli era sa vulica oti. Nira muria, era na yalodina tiko ga me yacova na icavacava.

3. Na cava mera vakasamataka tiko ga kina vakatitobu na lotu vaKarisito na ivakavuvuli rawarawa vakaivolatabu? Vakatauvatana.

³ Nida toso tiko meda lotu vaKarisito matua, eda rawa ni vulica eso tale na ka ena ivakavuvuli rawarawa vakaivolatabu. Kena ivakatautauvata: Ni rau vakasaqa e dua sa dede kei na dua e tekivu vou ga, rau na rairai vakayagataka e dua vata ga na isaluwaki rawarawa ni vakasaqa. Ni toso na gauna, e vulica o koya sa dede ena vakasaqa eso tale na ivakavakayagataki ni isaluwaki vata ga qori me vakarautaka kina eso na kakana vou qai kana vinaka. Ena va tale ga qori o ira sa dede ena dina kei ira na gonevuli vou ni iVolatabu, e duidui nodra rai me baleta na ivakavuvuli rawarawa vakaivolatabu. Nida papitaiso oti, de dua ena veisau na keda ituvaki se noda ilesilesi. Nida muria ena gauna qori na ivakavuvuli eda sa vulica makawa mai, de dua eda na vulica eso tale na ka. Meda raica mada na ka era vulica na lotu vaKarisito matua ena tolu na ivakavuvuli rawarawa vakaivolatabu qo.

E DAUVEIBULI O JIOVA

4. E yaga vakacava noda kila ni Dauveibuli o Jiova?

⁴ “O koya e tara na ka kece ga na Kalou.” (Iper. 3:4) Eda kila ni bulia noda vuravura kei na kabula kece e tiko kina na Dauveibuli vuku, e kaukaua tale ga. E buli keda, kena ibalebale ni kilai keda vinaka sara ga. Sega ni koya ga qori, e kauaitaki keda. E kila na ka e vinaka vei keda. Nida kila na ka dina rawarawa ni o Jiova na Dauveibuli, e veisautaka sara ga noda bula, e vakainaki.

5. Na ka dina cava eda na vulica kina na yalomalumalumu? (Aisea 45:​9-12)

⁵ Na noda mai kila na ka dina ni o Jiova na Dauveibuli, eda vulica kina na bibi ni yalomalumalumu. Kena ivakaraitaki, dua na gauna balavu nona kauaitaka vakasivia o Jope na kena ituvaki kei na ka era tukuna eso tale. Oti sa qai tukuna vua o Jiova me nanuma tiko ni o koya ga na Dauveibuli kaukaua duadua. (Jope 38:​1-4) E liaca kina o Jope ni ka kece e cakava o Jiova e donu tu ga ni vakatauvatani kei keda. Sa rauta me vola na parofita o Aisea: “Ena tukuna na qele vua na Dautulituli: ‘Na cava o tulia tiko?’”​—Wilika Aisea 45:​9-12.

6. Na gauna cava eda na rairai vakasamataka kina vakatitobu na vuku kei na cecere ni Dauveibuli? (Raica tale ga na iyaloyalo.)

⁶ Ni sa dede nona tiko ena dina e dua na lotu vaKarisito, sa na rawa ni tekivu nuitaki koya ga, sa sega ni nuitaka na veidusimaki i Jiova kei na nona Vosa. (Jope 37:​23, 24) Ia vakacava ke vakasamataka vakatitobu na levu ni nona vuku na Dauveibuli kei na nona cecere? (Aisea 40:22; 55:​8, 9) Na ka dina bibi qori ena rawa ni yalomalumalumu tiko ga kina, ena donu tale ga nona rai.

7. Na cava e cakava o Rahela me ciqoma e dua na veisau?

⁷ E vakadinadinataka e dua na tacida yalewa o Rahela, e tiko mai Slovenia, ni nona vakasamataka na Dauveibuli e rawarawa kina me ciqoma e dua na veisau ena isoqosoqo. E kaya: “Eso na gauna e sega ni rawarawa meu muria na nodra vakatulewa na tacida era liutaka na cakacaka ena isoqosoqo. Kena ivakaraitaki, niu sa sarava oti mada ga na iKawalu ni iRogo Mai na iLawalawa Dauvakatulewa 2023, au se sega ga ni vakabauta noqu raica ena imatai ni gauna me vunau e dua na tacida tagane e vakumi. Au mani masu vei Jiova me vukei au meu ciqoma na veisau qo.” Ni vakadeitaka o Rahela ni Dauveibuli ni lomalagi kei na vuravura o Jiova, o koya duadua ga e kila na sala me dusimaka kina na isoqosoqo ena sala dodonu. Ke dredre mo veisautaka nomu rai se ciqoma e dua na veisau vou, vakacava mo vakasamataka vakatitobu na levu ni nona vuku kei na nona kaukaua na Dauveibuli?​—Roma 11:​33-36.

VUNA E VAKATARA KINA NA KALOU NA RARAWA

8. E yaga vakacava noda kila ni vakatara tiko na Kalou na rarawa?

⁸ Na cava e vakatara kina na Kalou na rarawa? Nira sega ni kila na isaunitaro qori eso, era cudruva kina na Kalou se ra vakabauta ni sega ni bula dina tiko o koya! (Vkai. 19:3) Ia o vulica ena iVolatabu ni sega ni vakavuna o Jiova na rarawa, e vu qori ena noda ivalavala ca se noda malumalumu eda sucu kaya mai. Kena ikuri, o vulica ni nona vosovoso o Jiova e rawa kina nira mai kilai koya e vica vata na milioni, era vulica tale ga na sala ena vakaotia kina vakadua na veika rarawa. (2 Pita 3:​9, 15) E vakacegui iko sara ga na ka dina qori, o volekati Jiova tale ga kina.

9. Na gauna cava meda vakasamataka tale kina na vuna e vakatara kina o Jiova na rarawa?

⁹ Eda kila ni bibi na vosovoso nida waraki Jiova me vakaotia na rarawa. Ia na gauna eda yalolailai kina, e caka vei keda na ka tawadodonu, e mate e dua na wekada voleka, se ra sotava tale ga qori na wekada, eda na rairai taroga na vuna e sega ni vukei keda totolo kina o Jiova. (Apak. 1:​2, 3) Ena gauna qori, e ka vakayalomatua meda vakasamataka tale na vuna e vakatara kina mera sotava na yalododonu na veika dredre.a (Same 34:19) Meda vakasamataka tale ga na nona inaki me vakaotia vakadua na rarawa.

10. E vosota vakacava o Anne na mate nei tinana?

¹⁰ Nida kila na ka dina me baleta na vu ni noda rarawa, eda na rawa kina ni vosota. E kaya e dua na tacida o Anne, e tiko ena yanuyanu o Mayotte, ena Wasawasa vakaIdia: “Au rarawataka sara ga nona takali o Na ena vica na yabaki sa oti. Ia au kaya tu ga ni sega ni vakavuna o Jiova na rarawa. E vinakata sara ga me vakaotia na rarawa kece, ena vakaturi ira tale ga na wekada lomani. Niu dau vakasamataka vakatitobu na ka dina qori, e totolo ga noqu vakila na vakacegu.”

11. Nida kila na vuna e vakatara kina o Jiova na rarawa, e uqeti keda vakacava meda vunau tiko ga?

¹¹ Nida kila na vuna e vakatara kina na Kalou na ka rarawa, ena uqeti keda meda vunau tiko ga. Ni vakamacalataka oti o Pita nira na vakabulai na veivutuni ena vuku ni vosovoso i Jiova, e vola: “Ni vakasamataka vinaka na ivalavala moni muria moni savasava kina, moni qarava tale ga na Kalou.” (2 Pita 3:11) Dua na sala eda ‘qarava kina na Kalou’ ya ena noda cakacaka vakaitalatala. Eda lomani ira na tamata me vakataki Jiova. Eda vinakata mera bula ena vuravura vou e vakarautaka na Kalou vei ira na yalododonu. E vosovoso o Jiova ni solia tiko na gauna vei ira ena yalava mera sokalou vua. E dua dina na ka dokai mo cakacaka vata kei na Kalou qai vukea e levu tale mera vulici koya ni bera ni rusa na ituvaki ca qo!​—1 Kor. 3:9.

EDA BULA TIKO ENA “IOTIOTI NI VEISIGA”

12. E yaga vakacava noda vulica nida sa bula tiko ena “iotioti ni veisiga”?

¹² E donu vinaka na ka e vakamacalataka na iVolatabu me baleta na itovo ni tamata ena “iotioti ni veisiga.” (2 Tim. 3:​1-5) Eda raica sara ga na vakayacori ni parofisai qori ena vanua eda tiko kina. Nida raica na torosobu ni itovo ni tamata, eda sa qai vakadeitaka ga ni nuitaki na Vosa ni Kalou.​—2 Tim. 3:​13-15.

13. Me salavata kei na ivakatautauvata nei Jisu ena Luke 12:​15-21, cava meda taroga?

¹³ Noda kila nida sa bula tiko ena iotioti ni veisiga, e rawa kina nida yadrayadravaki tiko ga. Dikeva na sala eda vulica kina na yadrayadravaki ena vosa vakatautauvata i Jisu ena Luke 12:​15-21. (Wilika.) Na cava e tukuni kina ni “sesewa” na turaga vutuniyau qori? A sega ni tukuna baleta ni vutuniyau, ia e cala ga na ka e vakaliuca. E “binia vakalevu na nona iyau, ia [a] sega ni vutuniyau ena mata ni Kalou.” Na cava e leqataki kina qori? E tukuna vua na Kalou: “Ena tarogi vei iko nomu bula ena bogi ga nikua.” Nikua, ni sa vakarau vakarusai na ituvaki ca qo, meda taroga: ‘E kilai vakacava ena noqu isausau niu yadrayadravaki tiko? Na isausau cava au uqeti ratou tiko kina na luvequ? Vakacava au vakayagataka tiko noqu kaukaua, noqu gauna, kei na noqu ilavo meu binia kina na iyau me noqu, seu binia na iyau vakalomalagi?’

14. Me vakataki Miki, na cava meda dau vakasamataka kina noda sa bula tu ena iotioti ni veisiga?

¹⁴ Nida raica na ivakadinadina nida sa bula tu ena iotioti ni veisiga, ena veisautaka sara ga noda rai. Qori na ka e yaco vua e dua na tacida yalewa o Miki. E kaya: “Ni oti ga noqu vuli ena sekeneri, au vinakata me dua noqu cakacaka meu vulica kina na veika me baleta na manumanu. E noqu isausau tale ga meu painia tudei meu lai veqaravi ena vanua e vinakati kina na veivuke. Era vakasalataki au eso na itokani matua meu vakasamataka vinaka, keu rawa ni saga na cakacaka kei na noqu isausau vakayalo ena dua vata ga na gauna. Era kaya vei au ni sa vakarau vakarusai na ituvaki qo. Ia ena vuravura vou, au na vulica na veika me baleti ira na manumanu me tawamudu. Au sa qai digia ga e dua na vuli lekaleka. E dua sara kina noqu cakacaka me tokona noqu painia tudei, oti au lai veiqaravi sara i Ecuador ni vinakati vakalevu kina na veivuke.” Sa tomani watina tiko o Miki ena veiqaravi vakaivakatawa ni tabacakacaka ena vanua qori.

15. Na cava meda kua kina ni soro ena vunau? Tukuna e dua na ivakaraitaki. (Raica tale ga na iyaloyalo.)

¹⁵ Meda kua ni yalolailai nira sega ni taleitaka na lewenivanua na itukutuku vinaka ena imatai ni gauna. E rawa nira veisau. Dikeva mada nona ivakaraitaki o Jemesa na taci Jisu vakacabecabe. E raica nona tubucake o Jisu me yacova sara ni sa Mesaia, e raica tale ga ni sega ni dua e tautauvata kei Jisu ena veivakavulici. Ia e vica vata na yabaki e sega ni muri koya o Jemesa. Toso na gauna e qai tisaipeli i Jisu ni sa vakaturi oti, e gumatua tale ga!b (Joni 7:5; Kala. 2:9) Cava eda vulica? Meda kua ni soro ni vunau tiko ga vei ira na wekada era se bera ni tataleitaki, kei ira na dau sega ni vakarorogo. Meda nanuma tiko nida sa bula tu ena iotioti ni veisiga, e rui bibi na noda vunau. Na ka o tukuna vei ira ena gauna qo ena rawa ni veisautaki ira ena dua na gauna mai muri, de dua ni sa tekivu na veivakararawataki levu.c

MEDA VAKAVINAVINAKATAKA TIKO GA NA VEIVAKADRETI I JIOVA

16. E yaga vakacava vei iko na veivakadreti i Jiova? (Raica tale ga na kato “Vakayagataka na ka Dina Vakaivolatabu Mo Vukea Eso Tale.”)

¹⁶ E vakarautaki eso na kakana vakayalo me baleti ira era se bera ni rogoca vakadua na ivakavuvuli rawarawa vakaivolatabu. Kena ivakaraitaki, e vakarautaki na ivunau soqovi levu e veimacawa, eso na ulutaga kei na vidio ena jw.org, kei na itabataba ni mekesini e veisoliyaki vei ira na sega ni iVakadinadina i Jiova. Ia e yaga tale ga vei keda na veivakadreti kece qori. E vakalevutaka noda lomani Jiova, eda na nuitaka vakalevu nona Vosa, e rawa tale ga nida kenadau ena veivakavulici.​—Same 19:7.

17. Na ituvaki cava meda vakasamataka kina na ivakavuvuli rawarawa vakaivolatabu?

¹⁷ Eda dau marautaka na iVakadinadina i Jiova ni vakamatatataki e dua na kilaka vakaivolatabu. Ia eda vakavinavinakataka tale ga noda mai kila eso na ivakavuvuli bibi vakaivolatabu eda mai ciqoma kina na dina. Ke da temaki meda nuitaka ga noda rai, sega ni veidusimaki ni isoqosoqo i Jiova, meda dau vakasamataka ni veidusimaki tiko na Dauveibuli kaukaua duadua, e levu tale ga nona vuku. Ni sotava tiko o keda se dua na wekada voleka na ituvaki dredre, meda vosovoso qai vakasamataka na vuna e vakatara kina o Jiova na rarawa. Nida vakatulewataka tale ga na sala meda vakayagataka kina noda gauna kei na iyau, meda nanuma tiko nida sa bula tu ena iotioti ni veisiga. Me vakayaloqaqataki keda tiko ga na veivakadreti i Jiova, me uqeti keda, me vakavukui keda tale ga.