ULUTAGA NI VULI 43
SERE 41 Moni Rogoca Noqu Masu
Meda Dau Veinanumi ena Masu
“ Ni veinanumi ena masu . . . Me kua ni beci na vakamamasu ni tamata yalododonu ni na yaga vakalevu.”—JEME. 5:16.
KA E VAKABIBITAKI
Na vuna e bibi kina meda masulaki ira eso tale, kei na vakatutu ena sala meda cakava kina.
1. Eda kila vakacava ni bibi vei Jiova na noda masu?
E DUA na isolisoli talei na masu. Vakasamataka mada qo: O Jiova e lesia na nodra dui itavi na agilosi. (Same 91:11) E lesia tale ga vei Luvena eso na itavi bibi. (Maciu 28:18) Ia o cei e lesia me rogoca noda masu? O koya sara ga. E “Daurogo masu” o Jiova, e rogoci keda yadudua.—Same 65:2.
2. E ivakaraitaki vinaka vakacava na yapositolo o Paula ni masulaki ira eso tale?
2 Eda dau masulaka vei Jiova na ka eda lomaleqataka, ia meda masulaki ira tale ga eso tale. E cakava qori na yapositolo o Paula. Kena ivakaraitaki, e vola ina ivavakoso e Efeso: “[Au] nanumi kemuni [tiko ga] ena noqu masu.” (Efeso 1:16) E dau masulaki ira yadudua tale ga na mataveitacini o Paula. Kena ivakaraitaki, e tukuna vei Timoci: “Au vakavinavinaka vua na Kalou, . . . niu sega sara ni guilecavi iko ena noqu kerekere, ena bogi kei na siga.” (2 Tim. 1:3) E tu mada ga na ka e nuiqawaqawataka o Paula me masulaka. (2 Kor. 11:23; 12:7, 8) Ia e tiko na gauna me masulaki ira kina eso tale.
3. Na cava eda na rairai guilecava kina meda masulaki ira eso tale?
3 Eso na gauna eda na guilecava meda masulaki ira eso tale. Na vuna? E tukuna e dua na vuna na tacida o Sabrina.a E kaya: “Dua na ka na levu ni noda osooso. Eda rawa ni kauaitaka tiko ga vakalevu na noda leqa da qai masulaka tiko ga.” Vakacava o dau cakava tale ga qori? Ke dina qori, ena yaga vei iko na ulutaga qo. Ena (1) vakamacalataka na vuna e bibi kina meda masulaki ira eso tale, kei na (2) eda na vulica eso na vakatutu meda cakava kina qori.
CAVA MEDA MASULAKI IRA KINA ESO TALE?
4-5. Sala cava ena “yaga” kina “vakalevu” noda masulaki ira eso tale? (Jemesa 5:16)
4 Ena “yaga vakalevu” noda masulaki ira eso tale. (Wilika Jemesa 5:16.) Vakacava ena rawa ni vinaka na kedra ituvaki eso tale nida masulaki ira? Io, e rawa. Ni kila o Jisu ni sa vakarau cakitaki koya na yapositolo o Pita, e kaya: “Au sa masulaki iko oti me kua ni malumalumu nomu vakabauta.” (Luke 22:32) E kila tale ga o Paula na yaga ni masu. Ni vesu vakatawadodonu e Roma, e vola vei Filimoni: “[Au] nuitaka tu niu na soli tale yani vei kemuni ena vuku ni nomuni masu.” (Fmon. 22; raica study note “for I am hoping that through your prayers.”) Io, e mani sere o Paula qai tomana nona vunau.
5 Ia nida masu, e sega ni kena ibalebale nida vakasaurarataki Jiova me rogoca noda kerekere. E kauaitaka na ka era masulaka nona dauveiqaravi, eso na gauna e vakatulewataka me cakava na ka era kerea. Qori ena uqeti keda meda masulaka vagumatua vei Jiova na keda ituvaki, eda nuidei tale ga ni na rawa ni cakava kina e dua na ka.—Same 37:5; raica 2 Korinica 1:11 kei na study note.
6. E yaga vakacava noda masulaki ira eso tale? (1 Pita 3:8)
6 Nida masulaki ira eso tale, eda na bucina kina na “veinanumi.” (Wilika 1 Pita 3:8.) Na veinanumi, ya noda kila vinaka na nona rarawa e dua tale da qai vinakata sara ga meda vakacegui koya. (Mari. 1:40, 41) E kaya e dua na qase ni ivavakoso o Michael: “Niu masulaka na ka era gadreva eso tale, au na kila vinaka na ka dredre era sotava tiko, au sa qai lomani ira ga vakalevu. Au volekati ira, ke ra sega mada ga ni kila.” E dua tale na kena yaga e tukuna e dua na qase ni ivavakoso o Richard: “Nida masulaka e dua, eda na vinakata sara ga meda vukei koya. Nida vukei koya, e vaka ga eda veivuke tiko me saumi na ka eda masulaka me baleti koya.”
7. Ena donu vakacava noda rai me baleta na noda leqa nida masulaki ira eso tale? (Filipai 2:3, 4) (Raica tale ga na iyaloyalo.)
7 Nida masulaki ira eso tale, ena donu noda rai me baleta na noda leqa. (Wilika Filipai 2:3, 4.) E dui tu na leqa eda sotava ena vuravura e lewa tiko na Tevoro. (1 Joni 5:19; Vkta. 12:12) Nida vakamatauna meda masulaki ira eso tale, eda na kila tiko ni “veika rarawa vata ga qori era vakila tiko na [tacida] kece e vuravura.” (1 Pita 5:9) E kaya e dua na painia o Katherine: “Niu masulaki ira eso tale, au na nanuma tale tiko ga nira sotava tiko na veika dredre. Niu vakasamataka tiko qori, au na sega ni kauaitaka vakasivia na noqu leqa.”
Nida masulaki ira eso tale, ena donu noda rai me baleta na noda leqa (Raica na parakaravu 7)d
E BIBI MEDA MASULAKI IRA
8. O cei eda rawa ni masulaka?
8 O cei eda rawa ni masulaka? Eda rawa ni masulaki ira raraba na tacida, kena ivakaraitaki o ira na tauvimate, ira na itabagone era vakalialiai e koronivuli se ra temaki mera caka ca, se o ira na itabaqase. Levu na tacida era vosota tiko na nodra veitusaqati na vuvale, se na matanitu. (Maciu 10:18, 36; Caka. 12:5) Eso na tacida era biuta na nodra vale ena vuku ni tikoyavavala vakapolitiki. Eso tale era vakila na vakacaca ni leqa tubukoso. De dua eda na sega ni kilai ira na tacida qori. Ia nida masulaki ira, eda sa vakaraitaka tiko nida muria na ivakaro i Jisu meda “veilomani.”—Joni 13:34.
9. Na cava meda masulaki ira kina na liutaka tiko na cakacaka ena isoqosoqo i Jiova kei na dui watidra?
9 Eda rawa tale ga ni masulaki ira na liutaka tiko na cakacaka ena isoqosoqo i Jiova. Qo e wili kina na iLawalawa Dauvakatulewa kei ira na dauveivuke, ira na Komiti ni Tabana, ira na ovasia nuitaki ena valenivolavola ni tabana, ira na ivakatawa ni tabacakacaka, ira na qase kei na dauveiqaravi ni ivavakoso. Levu vei ira qori e tu na ka era nuiqawaqawataka nira veiqaravi tiko ena vukuda. (2 Kor. 12:15) Kena ivakaraitaki, e kaya e dua na ivakatawa ni tabacakacaka o Mark: “E dredre sara ga niu sa yawaki rau noqu itubutubu itabaqase. Rau sa tautauvimate. E qaravi rau tiko o ganequ kei watina, ia e dau mosi vei au ni vakaiyalayala ga na ka au rawa ni cakava vei rau.” Ke da kila mada ga se sega na ka era nuiqawaqawataka na tacida gugumatua qori, e vinaka ga meda dau masulaki ira. (1 Ces. 5:12, 13) Rawa tale ga nida masulaki ira na watidra, ni nodra veitokoni ena yalodina era qarava rawa kina na dui watidra na nodra ilesilesi.
10-11. E marautaka o Jiova noda masulaki ira raraba na tacida? Vakamacalataka.
10 Me vaka eda vulica mai, meda dau masulaki ira raraba na tacida. Kena ivakaraitaki, nida sega mada ga ni vakasamataka tiko e dua, eda rawa ni kerei Jiova me vukei ira na vesu tu se vakacegui ira e takali na wekadra voleka. E kaya e dua na qase ni ivavakoso o Donald: “E levu sara na tacida era sotava tiko na veika dredre, nida masulaki ira raraba era sa wili tale tiko ga kina na rarawa tiko.”
11 Vakacava e marautaka o Jiova na masu va qori? Io! Eda sega ni kila na ka era dui gadreva tu na tacida. E veiganiti gona meda masulaki ira raraba. (Joni 17:20; Efeso 6:18) Na masu va qori e vakaraitaka nida “lomani ira na mataveitacini kece.”—1 Pita 2:17.
MASULAKI IRA YADUDUA NA TACIDA
12. Eda na vakamatatataka vakacava noda masu nida dau kauai?
12 Meda kauai. Me ikuri ni noda masulaki ira raraba na tacida, e vinaka tale ga meda masulaki ira yadudua nida cavuta na yacadra. Vakacava e tauvimate bibi tiko e dua ena nomu ivavakoso? E yalolailai tiko e dua na itabagone, de dua ni temaki e koronivuli? E sasaga tiko e dua na itubutubu ledua me tuberi luvena “ena ivakavuvuli kei na ivakasala i Jiova”? (Efeso 6:4) Ni o kauai, o na lomani ira vakalevu na tacida, ena uqeti iko tale ga mo masulaki ira.b—Roma 12:15.
13. Eda na masulaki ira vakacava na tacida eda se bera ni veikilai?
13 Meda cavuta na yacadra nida masu. Eda rawa ni cakava qori vei ira mada ga eda se bera ni veikilai. Kena ivakaraitaki, vakasamataki ira na tacida era vesu tu ena veivanua me vakataki Crimea, Eritrea, Rusia, kei Sigapoa. O rawa ni raica na yacadra na vesu tuc ena jw.org. E kaya e dua na ivakatawa ni tabacakacaka o Brian: “Niu vola na yacana e dua na tacida e vesu tu, oti au qai cavuta vakadomoilevu, au rawa kina ni nanuma na yacana qai cavuta ena noqu masu.”
14-15. Eda na vakamatatataka vakacava noda masu?
14 Meda vakamatatataka noda masu. E tukuna o Michael, sa cavuti oti mai: “Niu dau vakawilika ena jw.org na kedra italanoa na tacida era vesu tu, au dau saga meu biuti au ena kedra ituvaki. Au kila kina niu na lomaleqataki watiqu, au na via vakadeitaka tale ga me qaravi vinaka. Niu cakava qori, au na kila kina e dua na ka meu vakamatatataka ena noqu masu me baleti ira na tacida vakawati era vesu tu.”—Iper. 13:3, vmr.
15 Eda na kila tale ga eso na ka meda vakamatatataka ena noda masu, nida vakasamataka na ka era sotava tiko e veisiga na tacida e valeniveivesu. Kena ivakaraitaki, meda masulaka mera yalovinaka na ovisa ni valeniveivesu vei ira na tacida, mera solia tale ga na galala ni sokalou o ira na veiliutaki. (1 Tim. 2:1, 2) Kena ikuri, meda masulaka mera vuli na tacida ena ivavakoso ena nodra ivakaraitaki na tacida yalodina era vesu tu, se ra vuli o ira na sega ni tiko ena dina ena nodra ivakaraitaki vinaka na tacida qori, mera rogoca tale ga na itukutuku vinaka. (1 Pita 2:12) Eda na masulaki ira tale ga na tacida era vosota tiko eso tale na veika rarawa. Nida kauai, nida cavuta na yacadra ena masu qai vakamatatataka noda masu, eda vakaraitaka tiko nida “veilomani sara vakalevu.”—1 Ces. 3:12.
ME DONU NODA RAI NIDA MASU
16. Ena donu tiko ga vakacava noda rai nida masu? (Maciu 6:8)
16 Me vaka eda sa raica mai, e rawa ni yaga vakalevu na noda masu me veisau kina eso na ituvaki. Ia e bibi me donu noda rai. Nida masu, eda sega ni tukuna tiko vei Jiova e dua na ka se bera ni kila, se meda vakasalataki koya ena ka me cakava ena ituvaki ya. Sa kila rawa tu o Jiova na ka eda gadreva ni bera mada ga nida kila. (Wilika Maciu 6:8.) Na cava gona meda masulaki ira kina na tacida? Eso na vuna eda sa veivosakitaka mai ena ulutaga qo. Qo tale e dua, nira dau cakava qori o ira na dau veikauaitaki. Na loloma ena uqeti keda meda masulaki ira eso tale. E marau tale ga o Jiova nira vakaraitaka na nona tamata na nona loloma.
17-18. Eda vakatauvatana vakacava noda masulaki ira na tacida?
17 Ke sega mada ga ni veisautaka na ituvaki na noda masu, ia e vakaraitaka tiko ga noda lomani ira na mataveitacini, e kila vinaka qori o Jiova. Qo e dua na kena ivakatautauvata: Vakasamataka e dua na vuvale e tiko kina e dua na gonetagane kei na dua na goneyalewa lailai. E tauvimate o gonetagane. E vakamasuti tamana o goneyalewa: “Kerekere cakava mada e dua na ka vei taciqu. E tauvimate vakalevu!” Sa kila tiko o tamana na ka me cakava, e lomani luvena tagane, e qaravi koya tale tiko ga vakavinaka. Ia ena marau vakalevu o tamana ni raici luvena yalewa ni kauaitaki tacina vakalevu qai vakamasuti koya me vukei koya.
18 Qori sara ga na ka e vinakata o Jiova meda cakava, meda dau kauaitaki ira na tacida qai masulaki ira. Nida cakava qori, ena kilai ena noda masu na levu ni noda kauaitaki ira na tacida, eda sega ni nanumi keda ga. E raica vinaka tu qori o Jiova. (2 Ces. 1:3; Iper. 6:10) Eda sa vulica tale ga ni so na gauna na noda masu e rawa ni veisautaka eso na ituvaki. Koya gona, meda kua ni guilecava meda dau masulaki ira na tacida.
SERE 101 Cakacaka ena Duavata
a Sa veisau eso na yaca.
b Sarava ena jw.org na vidio Takeshi Shimizu: E “Daurogo Masu” o Jiova
c Mo kila na yacadra na tacida era vesu tu, vaqara ena jw.org “iVakadinadina i Jiova Era Vesu ena Vuku ni Nodra Vakabauta—Vanua.”
d IVAKAMACALA NI IYALOYALO: E dui tu na nodratou leqa na tacida qo, ia ratou se masulaki ira tiko ga na mataveitacini.