Sala Mo Vakavinakataka Kina Nomu Masu

1-2. (a) Na cava e rawa ni tarova noda talaucaka vei Jiova na lomada? (b) Eda kila vakacava ni rogoca vinaka o Jiova noda masu?

VAKACAVA o vakila ena so na gauna ni sa duadua tu ga na qaqa ni nomu masu se sega ni vu mai lomamu? Ke dina qori, sega ni o iko ga o sotava tiko. Ena levu ni noda osooso, eda na rairai vakatotolotaka ga noda masu. Se da sega ni talaucaka vei Jiova na lomada nida nanuma ni sega ni ganiti keda meda masu vua.

² E vakavulica na iVolatabu ni kauaitaka o Jiova na masu e vu mai lomada, sega ni vakayatuyatu. E rogoca “na nodra kerekere na yalomalua.” (Same 10:17) Ni kauaitaki keda dina, e rogoca vinaka na vosa yadua eda cavuta.—Same 139:1-3.

3. Na taro cava ena saumi ena ulutaga qo?

³ De dua eda na taroga: Na cava meda masu kina ena nuidei vei Jiova? Sala cava ena vakaibalebale kina vakalevu noda masu? Ena vakavinakataka vakacava noda masu nida vakasamataka vakatitobu na masu era tu ena iVolatabu? Na cava tale ga meda cakava ke da sega ni kila na ka meda tukuna ena levu ni noda nuiqawaqawa? Meda dikeva mada na kena isau.

NUIDEI NI MASU VEI JIOVA

4. Na cava ena uqeti keda meda masu vei Jiova ena nuidei? (Same 119:145)

⁴ Nida kila ni noda itokani yalodina o Jiova, e vinakata meda marau, qori ena uqeti keda meda masu vua ena nuidei. E saga o koya e vola na ika119 ni Same me nuidei va qori ni masu vei Jiova. E levu na ka dredre e sotava. Eso era tukuna na ka lasutaki me baleti koya. (Same 119:23, 69, 78) E dau vakayalolailaitaki koya tale ga nona malumalumu. (Same 119:5) Ia e sega ni rere me talaucaka vei Jiova na lomana.—Wilika Same 119:145.

5. Na cava me kua ni tarova kina noda masu na rai cala? Vakatauvatana.

⁵ E vinakata o Jiova mera masu mada ga vua o ira na cala bibi. (Aisea 55:6, 7) Me kua gona ni tarova noda masu na rai cala. Meda vakatauvatana mada: E kila o pailate ke vinakata na veivuke, ena veivosaki kei ira na kenadau ena rara ni waqavuka. Ia ke sega mada ga ni kila na ka me cakava, se cakava e dua na cala, vakacava ena tu suka me qiri? Sega! Ke da cala tale ga ena so na gauna, se da sega ni kila na ka meda cakava, meda nuidei ni masu vei Jiova.—Same 119:25, 176.

SALA ME VAKAIBALEBALE KINA VAKALEVU NOMU MASU

6-7. Ena vakaibalebale vakacava noda masu nida vakasamataka vakatitobu na itovo i Jiova? Tukuna e dua na ivakaraitaki. (Raica tale ga na ivakamacala e ra.)

⁶ Ena vakaibalebale vakalevu na noda masu nida talaucaka vei Jiova na lomada kei na noda vakasama. Cava gona meda cakava me titobu kina na ivakarau ni noda masu?

⁷ Vakasamataka vakatitobu na itovo i Jiova.a Na levu ga ni noda vakasamataka vakatitobu na nona itovo, eda na talaucaka tale ga vua na ka kece e tu e lomada. (Same 145:8, 9, 18) Dikeva mada nona ivakaraitaki e dua na tacida yalewa o Kristine, e dau voravora o tamana. E kaya: “E dredre meu raici Jiova me tamaqu, meu vosa tale ga vua. Au nanuma ni na sega ni lomani au ena vuku ni noqu malumalumu.” Na itovo cava i Jiova e veisautaka nona rai? E kaya: “Au nuidei niu vakasamataka na dei ni loloma i Jiova. Au kila ni na sega ni biuta na ligaqu. Keu lutu mada ga, ena vakaduri au vakamalua. Qori e uqeti au meu tukuna vua na ka au marautaka kei na ka au rarawataka.”

8-9. Na cava eso na yaga ni noda vakasamataka rawa na ka meda tukuna ni bera nida masu? Tukuna e dua na ivakaraitaki.

⁸ Vakasamataka rawa na ka mo tukuna. Ni bera ni o masu, o rawa ni taroga eso na taro. Kena ivakaraitaki: ‘Na ituvaki dredre cava au sotava sara tiko ga qo? Vakacava e tiko e dua e vinakati meu vosota? Au se qai sotava vakadua e dua na ituvaki e vinakati kina na veivuke i Jiova?’ (2 Tui 19:15-19) Eda rawa tale ga ni vakatotomuria na ivakaraitaki i Jisu nida vakasamataka rawa na ka meda kerea vei Jiova e vauca na yacana, nona Matanitu, kei na lomana.—Maciu 6:9, 10.

⁹ Ni kila e dua na tacida yalewa o Aliska ni laurai vei watina na kenisa ni mona, e dredre sara ga me masu. E vakasamataka lesu: “Na levu ni vusolo ni lomaqu, au sega sara ga ni vakasamataka rawa na ka meu masulaka.” Na cava e qai cakava? E kaya: “Ni bera niu masu, au na vakasamataka rawa na ka meu tukuna, qori e vukei au meu kua ni masulaka tiko ga na noqu leqa. Niu cakava qori au vakila kina na vakacegu, e tu donu tale ga noqu vakasama niu masu.”

10. Na cava meda saga kina meda masu vakabalavu? (Raica tale ga na iyaloyalo.)

¹⁰ Mo masu vakabalavu. E rawa ni vakaibalebale na masu leleka, ia nida masu vakabalavub eda na talaucaka na lomada vei Jiova. E kaya o Elijah na wati Aliska: “Au saga meu masu vakavica vata ena dua na siga, au sa qai volekati Jiova ga niu masu vakabalavu. E vosovoso o Jiova me rogoca noqu masu me yacova ni oti, au na sega gona ni vakatotolotaka.” Tovolea mada qo: Mo qara na gauna kei na vanua mo masu kina, de dua mo masu vakadomoilevu, me kua ni dua na ka e vakasosani iko, mo vakamatauna tale ga mo masu vakabalavu.

VAKASAMATAKA VAKATITOBU NA NODRA MASU ENA GAUNA VAKAIVOLATABU

11. Ena yaga vakacava nida vakasamataka na nodra masu mai vu ni lomadra na dauveiqaravi i Jiova ena gauna vakaivolatabu? (Raica tale ga na kato “O Kila Vinaka na ka Era Sotava?”)

¹¹ Ena rawa tale ga ni yaga nomu vakasamataka vakatitobu na nodra masu mai vu ni lomadra na dauveiqaravi i Jiova ena gauna vakaivolatabu, na nodra sere vakayalo se same. Ni o dikeva na nodra talaucaka na lomadra, ena uqeti iko mo talaucaka tale ga na lomamu vei Jiova. O na rawa tale ga ni raica eso na vosa vou ni veivakacaucautaki mo tukuna ena nomu masu. De dua o na raica tale ga eso na masu ena tautauvata sara ga kei na kemu ituvaki.

12. Na cava meda taroga nida wilika e dua na qaqa ni masu ena iVolatabu?

¹² Ni o wilika e dua na qaqa ni masu ena iVolatabu, mo taroga: ‘O cei e tukuna qo, na ituvaki cava e sotava tiko? Au dau sotava tale ga na ka e tukuni tiko ena masu qo? Cava au vulica kina?’ De dua o na vakekeli tale mo kila na isaunitaro qori, ia ena yaga dina na nomu sasaga. Raica mada qo e vica na ivakaraitaki.

13. Na cava e dua na ka eda vulica ena masu nei Ana? (1 Samuela 1:10, 11) (Raica tale ga ena waqana.)

¹³ Wilika 1 Samuela 1:​10, 11. Ni cavuta o Ana na masu qo, e sotava tiko e rua na leqa levu. A sega ni rawa ni vakaluveni, e dau vakalialiai koya tale ga o karuana. (1 Sam. 1:4-7) Ke o sotava tale tiko ga e dua na ituvaki dredre, cava o vulica ena masu nei Ana? E vakila na vakacegu ni masu vakabalavu vei Jiova, e talaucaka tale ga vua na lomana. (1 Sam. 1:12, 18) Eda na vakila tale ga na vakacegu nida “biuta vei Jiova na [noda] icolacola bibi,” qori nida vakamatatataka vua na kena vakararawataki keda na ituvaki dredre eda sotava tiko.—Same 55:22.

14. (a) Na cava tale eda vulica ena ivakaraitaki nei Ana? (b) Eda na vakavinakataka vakacava noda masu nida vakasamataka vakatitobu na masu ena iVolatabu? (Raica na ivakamacala e ra.)

¹⁴ Ni sa oti e vica na yabaki na sucu nei Samuela, e kauti koya o Ana me lai soli koya vua na Bete Levu o Ilai. (1 Sam. 1:24-28) E masu mai vu ni lomana o Ana, e vakavinavinakataki Jiova ni dau taqomaki ira nona dausokalou yalodina, e karoni ira tale ga.c (1 Sam. 2:1, 8, 9) A rairai sega ni oti rawa na ituvaki e sotava tiko e vale o Ana, ia e kauaitaka tiko ga na sala e vakalougatataki koya kina o Jiova. Cava eda vulica? Eda na vosota rawa na ituvaki dredre ke da kauaitaka tiko ga na sala e tokoni keda kina o Jiova me yacova mai nikua.

15. Nida sotava na veika tawadodonu, na cava eda vulica ena vakamamasu nei Jeremaia? (Jeremaia 12:1)

¹⁵ Wilika Jeremaia 12:1. Dua na gauna e vakayalolailaitaki Jeremaia nona raica nodra rawaka na tamata ca. E yalolailai tale ga ena ka era cakava vua na nona itokani Isireli. (Jere. 20:7, 8) Eda na rawa ni kila vinaka na ituvaki qori nida raica nodra rawaka na dau veivakaisini se nida vakalialiai. E vakaraitaka vei Jiova o Jeremaia na nona rarawa, ia e sega ga ni taroga na lewadodonu i Jiova. Ni raica o Jeremaia nona vakadodonutaki ira na tamata talaidredre o Jiova, sa qai nuitaka ga vakalevu na nona lewadodonu. (Jere. 32:19) Eda rawa tale ga ni vakaraitaka noda rarawa nida masu, da qai nuitaka ni na vakadodonutaka o Jiova na veika tawadodonu eda sotava tiko ena nona gauna lokuci.

16. Ke vakaiyalayala na ka eda rawa ni cakava ena keda ituvaki, cava eda vulica vua na Livai e kau vakavesu? (Same 42:1-4) (Raica tale ga na iyaloyalo.)

¹⁶ Wilika Same 42:1-4. E vola na sere qo e dua na Livai a kau vakavesu, sa sega ni rawa ni veimaliwai kei ira na tacina vakayalo. E kilai ena nona same na ivakarau ni lomana. Eda na rawa ni kila vinaka na ituvaki qori ke da sa tu ga e vale ena vuku ni tauvimate, se da vesu ena vuku ni noda vakabauta. Ena rawa ni veiveisau na ivakarau ni lomada, ia e vinaka meda talaucaka qori nida masu vei Jiova. Nida cakava qori, ena rawa nida dikeva vinaka noda rai qai vakadodonutaka tale. Kena ivakaraitaki, e qai liaca na Livai ni qori e dua na gauna vinaka me vakacaucautaki Jiova kina. (Same 42:5) E dau vakasamataka tale ga na sala e kauaitaki koya kina o Jiova. (Same 42:8) Nida masu vagumatua vua na Kalou, eda na kila kina na vu ni noda rai cala, eda na vakadodonutaka tale, eda na vakayaloqaqataki tale ga meda vosota.

17. (a) Na cava eda vulica ena nona masu na parofita o Jona? (Jona 2:1, 2) (b) Ena rawa ni vakacegui keda vakacava eso na matavosa ena Same ni dredre na ituvaki? (Raica na ivakamacala e ra.)

¹⁷ Wilika Jona 2:1, 2. E cavuta na parofita o Jona na masu qori ni tiko ena kete ni ika levu. A talaidredre vei Jiova, ia e nuidei tu ni na rogoca na Kalou na domona. Ni vakamamasu, e vakayagataka e levu na matavosa ena Same.d De dua e kila vinaka na Same qori. Ni vakasamataka vakatitobu, e vakadeitaka sara ga ni na vukei koya o Jiova. Ke da saga tale ga meda cavuqaqataka eso na tikinivolatabu, eda na rawa ni nanuma qai vakacegui keda ena gauna eda masu kina vei Jiova ni dredre na ituvaki.

TORO VOLEKA TIKO GA VEI JIOVA ENA MASU

18-19. Ke dredre ena so na gauna meda tukuna na lomada nida masu, e veivakacegui vakacava na Roma 8:26, 27? Tukuna e dua na ivakaraitaki.

¹⁸ Wilika Roma 8:26, 27. Eso na gauna nida nuiqawaqawa, eda sega ni kila meda tukuna vakacava na ivakarau ni lomada ena masu. Ia e tiko na noda ivukevuke. Ena gauna va qori, ena “vakamamasu” ena vukuda na yalo tabu ni Kalou. Ena sala cava? E uqeti ira na dauvola iVolatabu o Jiova mera vola e levu na masu ena nona Vosa ena veivuke ni nona yalo tabu. Nida sega gona ni talaucaka rawa na lomada, ena rawa ni raica o Jiova eso na matavosa ena qaqa ni masu qori me vaka sara ga e noda masu, ena rawa ni sauma.

¹⁹ E vakadinadinataka qori e dua na tacida mai Rusia o Yelena. E vesu ni dau masu qai wilika na iVolatabu. E nuiqawaqawa sara ga o Yelena, e dredre mada ga me masu. E kaya: “Au qai vakasamataka mai keu nuiqawaqawa vakasivia, au sega tale ga ni kila na ka meu masulaka, o Jiova ena raica nodra qaqa ni masu na nona dauveiqaravi ena gauna vakaivolatabu . . . me vaka sara ga na qaqa ni masu au via tukuna tiko. . . . E vakacegui au sara ga qori ni dredre na ituvaki.”

20. Nida nuiqawaqawa, eda na vakarautaka vakacava noda vakasama ni bera nida masu?

²⁰ Nida nuiqawaqawa, ena rawa ni tu cala noda vakasama nida masu tiko. Meda vakarautaka noda vakasama, e rawa nida rogoca na katokatoni ni Same, se wilika vakadomoilevu. Eda rawa tale ga ni vola na ka e tu e lomada me vakataki Tui Tevita. (Same 18, 34, 142; ulu ni same.) Ia e sega ni dua na lawa ena sala meda vakarautaka kina noda masu. (Same 141:2) Mo cakava ga na ka o kila ni yaga vei iko.

21. Na cava meda masu kina mai vu ni lomada?

²¹ E veivakacegui ni kila vinaka tu o Jiova na ivakarau ni lomada ni bera mada ga nida masu vua. (Same 139:4) Ia e marau vakalevu me rogoca nida masu vua ena nuidei. Kua gona ni tu suka mo masu vua na Tamamu vakalomalagi. Mo vulica na masu era volai tu ena nona Vosa. Masu mai vu ni lomamu. Tukuna vua na ka o marautaka kei na ka o rarawataka. Ni nomu iTokani dina o Jiova, ena tu ga e yasamu ena gauna kece!