Au Bula Mai na Nodra Veivorati na Kominisi

ENA imatai ni Okotova, 1965, eratou labati e ono na jenerali. Era veivakamatei na sotia era lewena e dua na ilawalawa vaKominisi e Idonisia ena sasaga ni vuaviri. E yavala totolo na matanitu qai veivakalolomataki dina na ka e cakava. Era vakamatei e rauta ni le 500,000 na lewenivanua e tukuni nira kominisi, era nanuma e levu “ni sa rui voravora tale” na ka e yaco.

Era via vakamatei ira eso na italatala keimami yasayasa vata na kominisi. E qai tukuna vei au e dua na turaganivalu niu a biu sara tu ga me imatai ni yaca. A via lai vakaraitaka mada ga vei au na vanua sa keli rawa toka kina na noqu ibulubulu, ia au tukuna vakavinaka vua niu na sega ni gole. Ni kaukaua na tiko yavavala vakapolitiki, au sega ni vinakata me keirau laurai vata vakalevu de qai nanumi niu sa sega ni tawaveitovaki.