GEORGIA
Au Nanuma Niu Marautaka tu na Bula
Madona Kankia
SUCU 1962
PAPITAISO 1990
KENA ITUKUTUKU A lewena tu e liu na ilawalawa vaKominisi e Georgia, sa vukea e levu mera mai kila na ka dina. A tauri ivola ena imatai ni kalasi ni Koronivuli ni iTalatala ni Matanitu e Tbilisi ena 2015.
AU SE rogoca sara na ka dina mai na iVolatabu ena 1989. Au lewena tu ena gauna qori na ilawalawa vaKominisi e Senaki na vanua au susu kina. Au lewe ni matabose cecere ni matanitu makawa na Soviet, qori e via tautauvata ga kei na palimedi nikua. Keirau sa veimusumusuki tale tu ga kei na dua na cauravou, au nanuma kina niu sa marautaka tu na bula.
Erau vakavulici au o Na kei Ta meu lomana na Kalou. Au vakabauta kina na Kalou, dina ga niu lewena tu na ilawalawa vaKominisi. E saumi kece noqu lomatarotaro niu vulica na iVolatabu, au mani vakatulewataka meu yalataka noqu bula vei Jiova. Ia era sega ni duavata kei au na wekaqu, noqu itokani, ira keimami cakacaka vata, kei na noqu itau.
Era cati au na wekaqu ena vuku ni lotu vou au sa lewena. E veisaqasaqa tale ga kei na veika au sa vulica na veika vakapolitiki. Au mani nanuma meu biubiu mai neitou, tagutuva noqu veimusumusuki, meu kere vakacegu tale ga mai na ilawalawa vaKominisi kei na matabose au lewena tu. Niu papitaiso oti, sa qai kaukaua ga nodra veivakacacani na noqu itokani kei na wekaqu. Au mani toki i Kutaisi niu kilai levu e Senaki, au lai painia sara.
Nira tarogi au eso me baleta na veika au vakanadakuya ena vuku ni noqu lotu vou, au dau tukuna niu sega ni veivutunitaka noqu vakatulewa. Erau sega ni duavata noqu itubutubu ena vakatulewa au cakava, ia au vakavinavinaka ni rau vakavulici au meu lomana na Kalou kei ira na kainoqu. E yaga sara vakalevu qori ena noqu bula.